Eldos mergen

Jamby atýdan Qazaqstan Respýblıkasy chempıonatynyń birneshe dúrkin júldegeri, halyqaralyq mergender saıysyna qatysýshy, 2016 jylǵy «Uly dala oıyndary» festıvaliniń jeńimpazy, «Altyn tuǵyr» ıegeri atanǵan Eldos Badashev elimizdiń «Jamby atý» eresekter qurama komandasynyń kapıtany. At ústindegi mergendik saıysynda az ýaqytta sýyrylyp kózge túsken Eldos 2017 jyldan respýblıkalyq jastar men jasóspirimder komandasynyń bas jattyqtyrýshysy. Biz oraıy kelgende jas bapkermen suhbattasqan edik. Jańa qalyptasa bastaǵan ulttyq sport túriniń jurtshylyqqa beımálim tustary áńgimelengen sol suhbatty nazarlaryńyzǵa usyndyq.

– Eldos, eń aldymen bapkerlik qyzmetiń qutty bolsyn! Jastar, jasóspirimder komandasynyń qatary qalyń ba? Alǵashqy bapkerlik kezeń qalaı ótýde?

– Azdaǵan eńbegimizdi, osy jamby atýǵa degen qulshynysymyzdy baǵalap meni myna bapkerlikke usynyp, taǵaıyndaǵan ulttyq sport salasyndaǵy aǵalaryma myń da bir rahmet. Senim artylǵan soń endigi jerde kúsh-qaıratymyzdy osy salanyń órkendeýine arnaımyz ǵoı.

Ázirge jastar, jasóspirimder qatary sanaýly ǵana. О́zderińiz bilesizder, elimizde «Jamby atý» sportyn damytýdyń ózi tórt-bes jyl buryn ǵana qolǵa alyndy ǵoı. Naqty aıtqanda, 2013 jyly ǵana bastaldy. 2014 jyldyń jazynda Ulttyq sport túrleri qaýymdastyǵynyń uıymdastyrýymen Túrkistan qalasynda tuńǵysh ret «Jamby atý» sportyn damytýǵa arnalǵan semınar-keńes ótti. Basy-qasynda qaýymdastyqtyń prezıdenti Tileýhan Bekbolat aǵamyzdyń ózi júrgen sol jıynǵa ár óńirdiń jattyqtyrýshylarymen birge birqatar ǵalymdardyń da qatysqany esimizde. Semınar-keńeske sadaq atýdan Mońǵolııanyń birneshe dúrkin chempıony Batgerel Mıchır bilikti maman retinde shaqyrylyp, sol jıynnan soń ol kisi Jambyl oblysy, Merke aýdanynda jamby atýdan alǵashqy oqý-jattyǵý jıynyn ótkizdi. Keıinnen jamby atý Mádenıet jáne sport mınıstrliginiń Kúntizbelik josparyna engizilip, 2015 jyldan bastap respýblıkalyq chempıonat pen týrnırler uıymdastyryla bastady. Osy ýaqytqa deıin jamby atýdan elishilik chempıonat úsh ret qana ótti. Sondyqtan bizdiń elde ulttyq sadaq atýshylardyń qatary áli qalyńdaı qoıǵan joq. Onyń ishinde jastar men jasóspirimder tipti az.

(Elbasy jarysqa keldi)
Jasyratyny joq, kóp óńirde sadaqshy jastardy tek dál jarys qarsańynda ǵana izdeıdi. Chempıonattyń ózine kezdeısoq bireýler qatysyp júredi. Keıbireýi sonda tipti jap-jaqsy nátıje de kórsetedi. Talabynan úmittenip qalyp, keıin surastyrsań múlde taptyrtpaıdy. Kópshiligi sadaq atýǵa bir ret qana qatysady. Bul oblystardaǵy ulttyq sport jetekshileriniń jaýapsyzdyǵy. Jamby atý salasyndaǵy basty problemanyń biri de osy.

Sol sebepti, biz osy bastan jastar men jasóspirimder komandasyn turaqty sportshylarmen toltyrýǵa tıispiz. Dál qazirgi kezde jastar komandasynyń músheleri – Sarybaı Aıtbek (OQO), Abzal Týlybekov (Jambyl oblysy), Shámen Temirlan (Almaty), jasóspirimder komandasynyń músheleri – Rýslan Bılıalov (Aqmola oblysy), Aıkóz Eralhan (OQO), Babajan Baıdáýlet (Jambyl oblysy), Dáýlethan Raqyman (Aqmola oblysy), Dáýren Keńesbaev (Aqtóbe oblysy), О́telbaı Baıdáýlet (OQO) bolashaǵynan úlken úmit kúttirgen talapty jastar. Elishilik chempıonattar men týrnırlerde jaqsy nátıje kórsetken, osy jamby atýǵa qumar bul sportshylar áli qazaq eliniń atyn álemge áıgileıdi dep senemin.

– Olardyń arasynda ózińniń tól shákirtteriń de bar shyǵar?

– О́zim alǵash ulttyq sadaqty qolǵa alǵanymda jasym otyzdan endi asa bastaǵan edi. Jastaıymyzdan sportpen shuǵyldanyp óskendiktiń paıdasy shyǵar, jamby atýdaǵy nátıjemiz jaman bolǵan joq. Alǵashqy elishilik chempıonatta kúmis júlde aldyq. Biraq, ár jarystan-aq kórip júrmiz, jamby atýǵa jas balalar óte ıkemdi keledi. Mine, sodan kókeıimde «erterek shákirt tárbıeleýdi bastaý kerek» degen oı keldi. Sóıtip, osynyń beıimi bar-aý degen balalardy jaılap sadaq atýǵa tarta bastadym. Shákirtterim az da bolsa bar. Mysaly, Temirlan Seıitjan esimdi shákirtim byltyr Aqtóbede jastar arasynda ótken respýblıkalyq chempıonatta úshinshi oryn aldy. Jasóspirimder arasyndaǵy qurama komandasynyń múshesi Babajan Baıdáýlettiń de kórsetkishi jaman emes. Abzal Týlybekov Tarazda ótken chempıonattyń jeńimpazy, sport sheberi. Qol kúresinen Azııa chempıony, halyqaralyq dárejedegi sport sheberi bolǵan Jarqynaı Rahımbaeva esimdi qyz birtalaı ýaqyttan beri osy jamby atýǵa qatty qumar bolyp júr. Bulardy bári sol ózim turatyn Merke aýdanynyń jastary.

(Aıtbek Sarybaı)
Jamby atýdyń basty talaby – atqa jaqsy otyrý kerek. Sadaqqa yńǵaıy bar bala kóp, biraq, ony at ústinen atýǵa beıimdeý óte qıyn. Ulttyq sadaqta sporttyq sadaq sııaqty kózdeıtin qural joq. Jańadan sadaq ustaǵan balaǵa bári tosyn. Eshteńege ıkemi joq. Shapqan attyń ústinde terbelis, shaıqalý, qozǵalys bar. Sony sezinip, daǵdylaný, dál kózdeýge úırený óte qıyn. Aınaldyrǵan 150 metrdi at onshaqty sekýndta shaýyp ótedi. Ereje boıynsha sadaqshy 14-25 sekýnd aralyǵynda úsh oqty da atyp úlgerýge tıis. Kózmergendik, qolmergendik boıynda bar bala kezige qalsa jaqsy, jolyńnyń bolǵany. Áıtpese, kóp eńbektiń esh keteri anyq.

– Túrkııada ótken sadaqshylar festıvaline baryp qaıttyń ǵoı? Halyqaralyq jarysqa qatysýdyń talaby qandaı bolady eken?

– Meniń alǵash ret baryp qatysyp qaıtqanym Túrkııada uıymdastyrylǵan dúnıejúzilik «Altyn oq» atty festıvali. Arnaıy shaqyrtý bireý-aq bolǵandyqtan jarysqa jalǵyz bardym. Festıvalǵa Fınlıandııa, Iordanııa, Bolgarııa, Polsha, Mońǵolııa, Malaızııa, Qyrǵyzstan, Ýkraına sııaqty jıyrmaǵa jýyq memlekettiń sadaqshy-mergenderi qatysty. Stambuldan kólikpen júrgende bes saǵattyq qashyqtyqtaǵy Balaksır degen qalada ótti.

Jarysty óte jaqsy uıymdastyryldy. Tek at ústinen sadaq atýshylardyń ózi júzden asty. Qatysýshylardyń 80-85 paıyzy Túrkııanyń ár óńirinen kelgen óz mergenderi. Bas-aıaǵy bes júzdiń tóńiregindegi sportshynyń arasynda júrdik.

Túrikter bizge elýge jýyq at daıarlapty. Ishinen tańdap alyńdar deıdi. Nebir attaryn kórdik. Aldynda arnaıy jol turmasa qansha tebinseń de, qamshylasań bir ornynda sekirip, qarǵyp turyp alýǵa ábden úırengen attary bar. Al, jetektep baryp arnaıy jolǵa salyp jiberse boldy, shaýyp kete beredi.

Qatysýshylarǵa tórt túrli jarys usynyldy. Ár sportshy sonyń ekeýine tańdap qatysýǵa quqyly. Tilin túsinbegendikten alǵashqyda jarys tártibin bilmedim. Sóıtip, sharty qıyn jarysqa qatysyp kettim. Atpen quıǵytyp kelip qylyshpen bilezikterdi túırep alýdy buryn kim kórgen? Odan qaıtar jolda qylyshty tastaı salyp, uzyn naızamen jerdegi alaqandaı tórtburyshty tabaqshalardy shanshyp alýyń kerek.

(Mergender)
Ekinshi saıys sadaqty úsh nysanaǵa atý. Bul – túrikterdiń ulttyq oıyny. Birin alǵa, birin artqa atasyń. Úshinshi nysana on bes metr qashyqtyqqa, ıaǵnı, alysqa qoıylǵan. Taǵy bir saıysy – «Qabaq atý» dep atalady. Osy «Qabaq atý» meni qatty qyzyqtyrdy. Buryn da túrik saıttarynan kórip, tanysqanym bar. Qabaqty, ıaǵnı, nysanany 8 metr bıiktikke ornalastyrǵan. Qalqanǵa uqsas nysana. Oq tıse jańǵyrǵan dybys shyǵady. Ony jaı oqpen atpaıdy. Qabaqty atatyn jebe de, jebeleriniń qaýyrsyny da múlde bólek. Jebeniń ushy doǵal. Keıbiri temirden, keıbiri rezeńkeden jasalǵan. Alysqa ushyp ketpeýi úshin qaýyrsyny spıral sııaqty bekitilgen. Jurttyń tóbesine tik shanshylyp túspesin degen saqtyq qoı.

Bul da buryn qatysyp kórmegen saıys. Jarys aldynda esh jattyǵý bolǵan joq. Arnaıy oq bolmaǵan soń, qabaqty óz oǵymyzben attyrmady. Bul saıysta qabaqty atpas buryn eń aldymen jerdegi alaqandaı nysanaǵa at ústinen bir oq atýǵa tıissiń. Alǵashqy múmkindikte meniń jebem múlde aıdalaǵa ushty. Qaıta ekinshi, úshinshi múmkindikte qol úırenip, jebemiz nysanaǵa jýyqtady. Eger birneshe kún daıarlyq bolǵanda júldeger atanýǵa bolatyn-aq edi. Negizi bizdiń jamby atýshylar osyndaı halyqaralyq jarysqa jıi qatyssa mol tájirıbe jınap qaıtar edi. Eki kúndik jarysta kórgenimiz de, kókeıge túıgenimiz de az emes.

Túrikte bizdegideı báıge, kókpar joq. Esesine sadaq atýǵa arnalǵan sport keshenderi kóp, ári keremet salynǵan. Sadaq atýdan apta saıyn bir jarys uıymdastyryp jatady. Biz «Altyn oq» festıvalin aıaqtap jatqanda Stambulda taǵy bir úlken jarys jańa bastalyp jatty. Ár óńir-óńirde sadaq atý jarysy toqtaýsyz ótedi. Eger ınternettegi aqparattaryna sensek, aı saıyn kem degende úsh elishilik josparly jarys bar eken.

Tek Túrkııada ǵana emes, álemniń kóptegen elinde ulttyq sadaq atý keń óris alǵan. Mysaly, mońǵoldar da ulttyq sadaq atýdy múlde toqtatpaǵan. Mergendik jarys olarda tutas bir maýsymda kádimgi úlken mereke retinde ótedi. Batgerel Mıchırdiń aıtýynsha, kóktem shyǵa bes-alty mergen bas qosyp eldi mekendegi bir syıly adamnyń úıine barady. Amandyq-saýlyqtan soń mergenniń biri sadaqty qolǵa alyp, bir jebeni shańyraqtan zý etkizip syrtqa atady. Boldy. Bári túsinikti. Jarys sol úıden bastalady degen sóz. Úı ıesi tóbesi kókke jetkendeı qýanyp, dereý malyn soıyp, sadaqshylardyń jaǵdaıyn jasaýǵa kirisedi. Mońǵol úshin mergender jarysynyń óz úıinen bastalǵanynan artyq qýanysh joq kórinedi. Kórdińiz be, ulttyq dástúrdi qanǵa sińirdi degen osy. Mońǵol jurty balýany men mergenin qatty qurmetteıdi. Ulttyq bas kıimderine taǵylatyn jeńimpazdyq belgileri bar. Sony kıip tipti memlekettik mekemelerge bara qalsa da chempıonnyń aldynan qyzmetkerler quraq ushyp shyǵady. Al, koreılerde sadaq atý memlekettik emtıhanǵa engizilgen. Orta mektepti bitiretin árbir túlek ulttyq sadaq atýdan emtıhan tapsyrady. Mundaı el tek sadaqshy-mergen ǵana emes, naǵyz otanshyl-patrıot tárbıelep jatyr degen sóz ǵoı.

Biz ǵoı alǵashqy kezderi bir jylda bir ret qana ótetin jalǵyz chempıonatty kútip júretinbiz. Jarysqa shamaly ýaqyt qalǵanda ǵana sadaqty qolǵa alamyz. Basqa eshqandaı jarys joq edi ǵoı. Qaıta keıingi jyldary respýblıkalyq týrnırlerdiń barlyǵyna jamby atý saıysyn qosyp, jaqsy boldy. О́tken jyly sadaqshylar úshin jarys tipti kóbeıip ketti. Sonyń nátıjesinde jastardyń jamby atýǵa degen qyzyǵýshylyǵy da molaıdy. «Altyn jebe» halyqaralyq týrnıri ótti. Osynyń bári elimizde jamby atý sportynyń damýyna úlken sebep qoı.

– Jańa «jastaıymyzdan sportpen shuǵyldanyp óstik» dep qaldyń. Sonda buryn qandaı sport túrimen aınalystyń?

– Biz týyp-ósken Jambyl oblysynyń Merke aýdany jastarynyń sportpen shuǵyldabaı ósetini neken-saıaq qoı. Aýdandaǵy sport mektebinde birneshe sekııa bar. Sonyń ishinde, kúres básekesi kóp ótetin bolǵandyqtan ba, kópshiligi kúreske qatysýǵa qumar. О́zim de orta mektepti támamdaǵansha erkin kúresten qol úzgen joqpyn. Talaı márte aýdandyq jarystardyń jeńimpazy boldyq. Eń sońǵy ret mektepti aıaqtar jyly Qyrǵyzstanda ótken halyqaralyq jasóspirimder jarysynda birinshi oryn alǵan soń kúresti qoıyp, fýtbolmen áýestenip kettim. Osy kúnge deıin fýtbolqumarlyq báseńdegen joq. О́zim qurǵan «Botbaı» atty jeke fýtbol komandam Merki aýdanynyń qatarynan toǵyz dúrkin chempıony atandy. О́zim Merki fýtbol qurama komandasynyń jetekshisi ári oıynshysy da bolyp júrmin.

(Aıtbek Sarybaı)
– Jamby atýǵa qyzyǵýshylyq qalaı bastaldy?

– Aýylda asaý úıretip, atqa minýge de áýes boldyq. Bala kezimde sadaq atyp oınaýdy qatty unatatynmyn. Baǵana aıtyp óttim ǵoı, 2014 jyly jaz basynda Merkede «Jamby atýdyń» alǵashqy oqý-jattyǵý jıyny ótti dep. Sol tusta syılas aǵam, kókpardan Ulttyq qurama komandasynyń bas jattyqtyrýshysy Qýan Quramaev bir jolyqqanda «Qazir bizde «Jamby atýdan» oqý-jattyǵý ótýde. Attyń ústinen sadaq ata alatyndardy iriktep alamyz. Jasqa shekteý joq. Mońǵolııanyń mergeni jattyqtyryp jatyr» dep aıtyp qaldy. Sony estigen soń qyzyǵyp «О́zimdi synap kórsem qaıtedi?» degen oımen álgi semınarǵa bara qaldym. Bastalyp ketkenine birneshe kún bolypty. Sodan mońǵolııalyq bapker Batgerel Mıchır men sol tustaǵy almatylyq jattyqtyrýshy Aldııar Nurǵazıevke meniń sadaq atýǵa beıimdiligim unap, ekeýiniń usynysymen sadaqshylar qataryna alyndym. Sóıtip, ishteı ulttyq oıyndarǵa qatty qumartyp júrgen basym oılamaǵan jerden jamby atýshylar komandasynyń múshesi bolyp shyǵa keldim.

– Jamby atýdyń qıyndyǵy dep neni aıtar ediń?

– Shyndyǵynda jamby atýdy shyǵyny kóp sport túri der edim. Ulttyq sadaq, oq, jebeniń ushy, kirisi, adyrnasy ózimizde óndirilmese osy salaǵa jumsalǵan bizdiń qarjy áli talaı jyl shetelge quıyla beredi. Qazir eń arzan sadaq 60-70 myń teńge turady. Negizinen Qytaıdyń, Reseıdiń, Ýkraınanyń, Mońǵolııanyń sadaqtaryn satyp alamyz. Buryn daıyn oqty da satyp alyp júrdik. Árqaısysy – myńjarym, eki myń teńge turady. О́te qymbat. Ár jattyǵý saıyn keminde 4-5 oq joǵalady, synady. Kúnine eki márte jattyǵý ótkizseńiz, qansha oqty joǵaltasyz? Aqsha shaq kelmeıtin bolǵan soń, aqyrynda oqty ózimiz jasaýǵa úırendik. Internetten qaradyq, tehnologııasyn meńgerdik, stanoktaryn ornattyq. Sóıtip, oblys boıynsha oqty ózimiz óndirýdi jolǵa qoıdyq. Jebeniń ushyn jasaý úshin alǵashqy kezde aýdannyń tanys tokarlaryna ótinish jasadyq. Aǵashyna qaıyń jaqsy. Salmaqty, tózimdi keledi. Al, salmaqty oq búıirden soqqan jeldiń yǵynda ketpeıdi. Qazir tek sapaly jebe úshin keıde qaýyrsyndy ǵana satyp alamyz. Árıne, bizde de jaraıtyny bar. Mysaly, kúrketaýyqtyń qaýyrsyny óte jaqsy. О́zimiz kóbinese osy kúrketaýyq qaýyrsynyn paıdalanamyz. Qazdyń qaýyrsyny da jaman emes.

(Soldan ońǵa qaraı Aıtbek Sarybaı, Mıhaı Kozmeı, Eralhan Aıkóz)
– О́tken jylǵy «Altyn jebe» halyqaralyq týrnırine bizdiń elden qansha sportshy qatysty? Sheteldik mergenderdiń qarymy qandaı boldy?

– Iá, «Altyn jebe» bizdiń elde tuńǵysh ótken iri jarys qoı. Bul týrnırge on besten astam shet memlekettiń mergenderi qatysty. Mundaı jarysqa eshbir el osal sportshysyn jibermeıtini anyq. Osy kúni vengr, fın, bolgar, túrik, mońǵol, japon, koreı, Malaızııa sadaqshylary attyń ústinen nysana atýǵa óte myqty dep sanalady.

Qazaqstan jamby atýshylar komandasynyń quramynda bes sadaqshy boldyq. Olar: Aıtbek Sarybaı, Eralhan Aıkóz, Abzal Týlybekov, Bekqalı Úzdenbaev  jáne ózim. «Altyn jebe» týrnıri tamyzdyń 11-13 kúnderi Astanadaǵy «Qazanat» atshabarynda ótti. Qyzyq bolǵanda, jarystyń ekinshi kúngi básekesine Elbasy kelip, bizdiń mergender saıysyn sheteldik meımandarymen birge otyryp tamashalady ǵoı.
Týrnırdiń oıyn shartyna sheteldik mergen súısine bas shaıqaýmen júrdi. Alǵashqy kúngi eki kezeńniń biri «Shapshań atý». Munda sadaqshylar nysana tusyna atpen kelip toqtap, tóreshiniń «atyńdar!» degen buıryǵy boıynsha shapshańdyqpen oq atady. Ýaqyt merzimi – 10 sekýnd. Osy 10 sekýndta sportshy jebeni úlgergeninshe atýǵa tıis. Nysana on qadam jerde turady.

Al, ekinshi kezeń «Qalqan atý» dep ataldy. Munda sportshylar jolaqty arqanmen kórsetilgen, eni úsh metrlik dáliz joldan 10 metr qashyqtyqtaǵy, arasy 35 metrden, 1 metr bıiktikke ornalastyrylǵan, dıametri 60 santımetr bolatyn qalqan pishindes úsh nysanany atpen shaýyp kele jatyp kezekpen atyp ótedi. Sportshyǵa 2 múmkindik jáne ár múmkindikti oryndaýǵa 25 sekýnd ýaqyt berildi.

Úshinshi kezeń – «Jamby atý». Sportshylar dáliz-jol boıymen ár túrli qashyqtyqtaǵy 2,4 metr bıiktikke ilingen, dıametri 20 santımetr 3 nysanaǵa shaýyp kele jatyp úlgergeninshe oq atyp ótedi. 1-shi nysana «qola jamby» joldan 8 metr qashyqtyqta, 2-shi nysana «kúmis jamby» joldan 10 metr qashyqtyqqa, 3-shi nysana «altyn jamby» joldan 12 metr qashyqtyqqa ornalastyrylǵan. Nysanalardyń ózara qashyqtyǵy – 30 metr. «Altyn jebe» aıaqtalǵan soń sheteldik mergen dostarmen birtalaı áńgimelesip júrdik qoı. Bári de endigi jerde osy jamby atýmen shyndap shuǵyldanatynyn aıtty. Rasynda jamby atý – álemde joq nysana.

(Japon qyzy)
«Altyn jebege» qatysqan shet el mergenderiniń ataqtary zor. Qarańyz, Malaızııanyń áıgili surmergeni Muhammed Dakalan halyqaralyq jarystyń birneshe dúrkin júldegeri.

Túrkııanyń tarlany Murat Býnchýkkýdiń basqa ataǵyn aıtpaǵanda 2015 jyly «Altyn oq» halyqaralyq týrnırinde birinshi oryn ıelengen.

Majarstannyń mergeni Nematı Arpad Eýropada uıymdastyrylǵan kóptegen sadaq atý festıvalderi men halyqaralyq jarystardyń jeńimpazy. Majarstan ulttyq sadaq atý qurama komandasynyń múshesi.

Rýmynııalyq Mıhaı Kýzmı de at ústinen sadaq atýdan dańqy jaıylǵan mergen. 2014 jyly Seýl qalasyndaǵy at ústinde sadaq atý dúnıejúzilik jarysynda chempıon atanǵan.

Fınniń mergen qyzy Anna Katarına bolsa kóptegen shet memleketterde ótken dúnıejúzilik jarystardyń jeńimpazy, júldegeri atanǵan. 2015 jyly maýsym aıynda Iranda ótken parsylardyń at ústinen sadaq atý týrnırinde ataqty mergender qatarynda saıysyp, qola júldeni ıelengen.

Polıak mergeni Radoslav Kozých bolsa 2014-2015-2016 jyldary Polsha qurama komanda quramynda Eýropa Gran-prı básekesinde birinshi oryndy jeńip alǵan. 2017 jyly Majarstannyń Pomaz qalasynda ótken Eýropa Gran-prı básekesinde koreı stılinde atýdan ekinshi oryn ıelengen.

Bas júlde alǵan Rýmynııa mergeni Mıhaı Kozmeıdiń shapshańdyǵy sumdyq. Jebeni sekýnd saıyn ata alady. Mine, bizdiń básekelesterimiz osyndaı boldy. Komanda ishinde halyqaralyq jarysqa mennen ózge qatysqan eshkim joq.
«Shapshań atý» men «Qalqan atý» básekesiniń ekeýinde de nysana bir ornynda turdy. Al, «Jamby atýda» dıametri otyz santımetrlik altyn, kúmis, qola jambylar bıiktigi úsh metrlik baǵanada qyldaı jipke ilinip, jel soqsa shyr aınalyp turady. Mergenniń mergenine syn bolar nysana. Alaıda, osy shyr aınalyp turǵan jambylardy taǵy da rýmyndyq Mıhaı Kýzmı buıym qurly kórmedi. Mıhaı Kýzmıdiń qos jebesi qolaǵa darymaǵanymen kúmis pen altynǵa kezek-kezek qadaldy. 10+15 upaı. Eki oqpen 25 upaıdy julyp tústi. Qarshyǵadaı qaǵylez rýmyndyq mergenniń shapshańdyǵyna eriksiz tań qalamyz. Kánigi mergen ár nysana tusynda únemi eki jebeni atyp úlgeredi. Atpen quıǵyta shapqan qalpy alty oqty qatar atqan Mıhaı Kýzmıden ózge sadaqshy bolǵan joq. Sóıtip, rýmyn mergeni alǵashqy kúngi «Shapshań atý» men «Qalqan atýdan» 27 upaı, ekinshi kúngi «Jamby atýdan» 25 upaı, jıyny elý upaımen «Altyn jebe» mergenderiniń kóshin bastap shyǵa keldi.

Ekinshi oryn úsh kezeńde 40 upaı jınaǵan Aıtbek Sarybaıǵa buıyrdy. Úshinshi orynǵa barlyǵy 39 upaımen Eralhan Aıkóz taban tiredi. Tórtinshi oryndy 29 upaı alǵan vengrııalyq Nemotı Krıstof Arpad, al, besinshi oryndy malaızııalyq Muhammed Akmal bın Muhammed Dahalan aldy.

Elimizde alǵash ret uıymdastyrylǵan «Altyn jebe» halyqaralyq týrnırinde kúmis júldeni jeńip alǵan tuńǵysh qazaq ulany – Aıtbek, qola júldeni ıelengen Eralhan Aıkóz.

Odan beri biz eki-úsh ret Vengrııada, Túrkııada uıymdastyrylǵan mergender festıvaline qatysyp qaıttyq. Alla buıyrtsa, aldaǵy halyqaralyq jarystarda el namysyn qoldan bermeımiz degen senimdemiz.

– Endeshe, sol senim údesinen shyǵýlaryńa tilektespiz!

Suhbattasqan Tólegen JÁKITAI,

ASTANA