سەمسەرلەسۋشىلەر وليمپيادا جولداماسىن ساراپقا سالادى

22-24 ناۋرىز كۇندەرى گرۋزيانىڭ تبيليسي قالاسىندا شپاگامەن سەمسەرلەسۋدەن الەم كۋبوگى كەزەڭى بولادى. وندا الەمنىڭ 60-تان استام ەلىنەن جينالعان سپورتشىلار رەيتينگىلىك ۇپاي مەن پاريج وليمپياداسىنىڭ جولداماسى ءۇشىن باق سىنايدى، دەپ حابارلادى olympic.kz.

بۇل تۋرنيردە رۋسلان كۋربانوۆ پەن ەلمير ءالىمجانوۆ باستاعان قۇراما تاريحتا تۇڭعىش رەت كوماندالىق سىندا ليتسەنزيا جەڭىپ الۋى مۇمكىن. الەم كۋبوگىنا قازاقستان ساپىنان 12 سپورتشى قاتىسادى.

ولار — رۋسلان كۋربانوۆ، ەلمير اليمجانوۆ، ەرلىك سەرتاي، ۆاديم شارلايموۆ، الەكساندر فەدوتوۆ، الەكسەي كاساتكين، بوگدان لۋكين، كيريلل پاۆلوۆ، كيريلل پروحودوۆ، الەكساندر ساۆين، گەورگي تيننيكوۆ، نيكيتا جۋلينسكي.

22-23 ناۋرىز كۇندەرى شپاگادان جەكەلەي سىنداعى جەڭىمپازدار انىقتالسا، 24 ناۋرىزدا كوماندالىق جارىستان وليمپيادا جولداماسىنىڭ تاعدىرى شەشىلەدى.

سەمسەرلەسۋدەن مەملەكەتتىك جاتتىقتىرۋشى تيمۋر بايتاسوۆتىڭ ايتۋىنشا، تاريحي ناتيجەگە جەتۋ ءۇشىن قازىر كوماندا مۇشەلەرى تىنباي دايىندالىپ جاتىر.

جولدامانىڭ تاعدىرى شەشىلەتىن كۇن جاقىن. ءبىزدىڭ كوماندانىڭ ليتسەنزيا الاتىن مۇمكىندىگى كوپ. باستى قارسىلاسىمىز وڭتۇستىك كورەيادان 26 ۇپايىمىز ارتىق. قازاقستان شپاگاشىلارى پاريج وليمپياداسىنىڭ جولداماسىن يەلەنۋ ءۇشىن تبيليسيدە وڭتۇستىك كورەيا كومانداسى التىن مەدال الماۋى كەرەك. سپورتتا بولجام جاساۋ وتە قيىن. سوندىقتان الدىن الا تون پىشپەي، جىگىتتەردىڭ شەبەرلىگى مەن تاجىريبەسىنە سەنىپ، ساتتىلىك سەرىك بولسىن دەگىم كەلەدى. ويتكەنى، سپورتتا باپتان بولەك، باقتىڭ دا ءرولى ۇلكەن. ەگەر ءساتىن سالىپ، وسى جولداماعا يەلىك ەتەتىن بولساق، بۇل قازاقتان ءۇشىن تاريحي ليتسەنزيا بولادى. بۇگىنگە دەيىن سەمسەرلەسۋدەن قازاقستان قۇراماسى تولىق قۇرامدا وليمپياداعا قاتىسىپ كورمەگەن، — دەدى تيمۋر بايتاسوۆ olympic.kz-كە بەرگەن سۇحباتىندا.

قازىر قازاقستان كومانداسى گرۋزيادا وقۋ-جاتتىعۋ جيىنىنا قاتىسىپ جاتىر. قۇراماداعى 12 سپورتشىنىڭ ىشىنەن ءتورت سپورتشى جولداماعا تالاسادى. ولار — رۋسلان كۋربانوۆ، ەلمير اليمجانوۆ، ەرلىك سەرتاي، ۆاديم شارلايموۆ تورتتىگى.

قۇرامانىڭ ارداگەر سپورتشىسى ەلمير ءالىمجانوۆ كوماندالىق جارىسقا تۇبەگەيلى دايىندالۋ ءۇشىن جەكەلەي سىننان باس تارتىپ وتىر. بۇل ليتسەنزيانىڭ ءبىز ءۇشىن قانشالىقتى ماڭىزدى ەكەنىن وسىدان-اق اڭعارساڭىزدار بولادى. ەلمير بار كۇشىن كوماندالىق سىنعا ساقتاپ، قالپىنا كەلىپ، ارتىق كۇش جۇمساماۋ ءۇشىن وسىنداي قادامعا باردى. ال قالعان سپورتشىلاردىڭ بارلىعى جەكەلەي سىندا ونەر كورسەتەدى، — دەدى جاتتىقتىرۋشى.

ەگەر تبيليسيدەگى الەم كۋبوگى كەزەڭىندە سپورتشىلار ءساتتى ونەر كورسەتىپ، جولدامانى جەڭىپ السا، قازاقستانعا پاريج وليمپياداسىنىڭ ءتورت جولداماسى بەرىلەدى. ونىڭ ۇشەۋى جەكەلەي سىنعا، بىرەۋى تۇتاس كومانداعا تابىس ەتىلەدى.

گرۋزياداعى الەم كۋبوگى كەزەڭىندە شپاگامەن سەمسەرلەسۋدەن قازاقستان كومانداسى ازيا قۇرلىعىنداعى جالعىز جولداماعا تالاسادى. الەمدىك ۇيىم قاعيداسى بويىنشا، وليمپيادالىق رەيتينگتە العاشقى ءتورت ورىندا تۇرعان كوماندالار اۆتوماتتى تۇردە وليمپياداعا قاتىسادى. ال قالعان قۇرامالارى قۇرلىققا بولىنەتىن ءبىر جولدامانى ساراپقا سالادى.

قازىرگى كەزەڭدە قازاقستان كومانداسى وليمپيادالىق رەيتينگتە بەسىنشى ورىندا تۇر. سوڭعى رەت قازاقستان كومانداسى وڭتۇستىك كورەيامەن حانچجوۋداعى جازعى ازيا ويىندارىندا كەزدەسىپ، ءىرى ەسەپپەن جەڭگەن بولاتىن.