Elimizde alǵash ret Ulttyq sport kúni jalaý kóterdi (FOTO)

Búgin Astanadaǵy «Arǵymaq» at-sporttyq saýyqtyrý kesheninde Naýryz meıramy aıasynda Ulttyq sport kúnine arnalǵan «NAÝRYZNAMA: Ulttyq sport kúni» atty merekelik is-shara ótti, dep habarlady Týrızm jáne sport mınıstrligi.

Oǵan Týrızm jáne sport mınıstri Ermek Marjyqpaev, Astana qalasy ákiminiń orynbasary Eset Baıken, Ulttyq sport qaýymdastyǵynyń prezıdenti Islambek Saljanov, ulttyq sport ardagerleri, ulttyq sport federaııalarynyń prezıdentteri, sportshylar, dıplomatııalyq mıssııalardyń basshylary men ókilderi, sondaı-aq qala turǵyndary men qonaqtary qatysty.

Týrızm jáne sport mınıstri Ermek Marjyqpaev óziniń quttyqtaý sózinde búgingi tańda bizdiń elimizde ulttyq sport túrlerine degen erekshe qyzyǵýshylyq pen tanymaldylyq artyp kele jatqanyn erekshe atap ótti.

Qazaqtyń ulttyq oıyndary – mádenı-patrıottyq tárbıe berýde utymdy qural. Densaýlyqty nyǵaıtýǵa, salaýatty ómir saltyn nasıhattaýǵa eleýli septigin tıgizedi. Búgin el ishinde ótkizilip jatqan at jarystar, qusbegilik jáne asyq atý, toǵyzqumalaq, sadaq tartý sııaqty týrnırler azamattarǵa shynaıy mereke saltanatyn sezinýge múmkindik berýde, — dedi mınıstr.

О́z kezeginde Ulttyq sport túrleri qaýymdastyǵynyń prezıdenti Islambek Saljanov elimizde Naýryz meıramyn toılaýdyń jańa tujyrymdamasy aıasynda 20 naýryzdyń ulttyq sportqa arnalýy búkil ulttyq sport úshin qýanyshty jańalyq ekenin atap ótti.

Sońǵy jyldary memleket basshysy Qasym-Jomart Kemeluly Toqaevtyń qoldaýymen elimizde ulttyq sport qarqyndy damyp keledi. Bıyl qyrkúıek aıynda elimizde Prezıdenttiń bastamasymen, 5-shi Dúnıejúzilik kóshpendiler oıyndary ótedi. Bul aýqymdy halyqaralyq is-shara ulttyq sportty odan ári damytýǵa tyń serpin beredi, — dedi Islambek Saljanov.

Budan soń sóz sóılegen Astana qalasy ákiminiń orynbasary Eset Baıken jınalǵandardy meırammen quttyqtap, osy mereke kúnderi elordanyń barlyq aýdanynda ulttyq sport túrleri boıynsha jarystar ótetinin atap ótti.

Merekelik is-shara aıasynda kókpar, aýdaryspaq, teńge ilý, qyz qýýdan kórsetilimder jáne toǵyzqumalaq pen asyq atýdan sheberlik synyptary ótti. Qonaqtarǵa qazaqy tazy jáne búrkit kórsetilip, qusbegilik óner tanystyryldy.

Sonymen qatar, kókpardan Astana men AQSh quramalary arasyndaǵy joldastyq kezdesý kórermender úshin keremet tosynsyı boldy.

Merekege oraı óziniń jetistikterimen ulttyq sportty dáriptep júrgen ulttyq sport ardagerleri men qaıratkerler marapattaldy.

Olardyń qatarynda kókpardan KSRO-nyń toǵyz dúrkin chempıony Ábilhan Daýylbaev, toǵyzqumalaqtan Qazaqstannyń eki dúrkin chempıony Meıramqul Noǵaıbaev, Qazaq KSR eńbek sińirgen jattyqtyrýshysy Jumabek Meıramǵalıev, belgili sport jýrnalısi, jazýshy Nesip Júnisbaıuly, QR eńbek sińirgen jattyqtyrýshy Qulamhan Jaqypov, asyq atýdan ulttyq quramanyń bas bapkeri Jomart Sabyrjanov, atbegi Meırambek Chakenov bar.

Ulttyq sport ardageri retinde eńbegimizdi elep, marapattap jatqanyna qýanyshtymyz. Qazir elimizdegi jas sportshylarǵa múmkindik kóp. Aldaǵy 5-shi Dúnıejúzilik kóshpendiler oıyndarynda ulttyq quramamyzǵa jeńis tileımin, — dedi Ábilhan Daýylbaev.

Aıta keteıik, Ulttyq sport qaýymdastyǵynyń quramyna búginde 10 federaııa kiredi. Atap aıtqanda, báıge, kókpar, aýdaryspaq, sadaq atý, jamby atý, teńge ilý, qusbegilik, asyq atý, «JORYQ» jáne basqa da federaııalar bar. О́tken jyly federaııa sportshylary 12 halyqaralyq jarysqa qatysyp, 95 medal jeńip aldy. Onyń 35-i – altyn júlde.