استانادا جاڭا دزيۋدو ورتالىعى اشىلدى

استانانىڭ جاڭا «نۇرا» اۋدانىندا Kodokan Spirit اتتى كوپ قىزمەتتى سپورت كەشەنىنىڭ اشىلۋ سالتاناتى بولدى. بۇقارالىق  سپورتتى دامىتۋ جانە جاس  ۇرپاقتى سالاماتتى ءومىر سالتىنا باۋلۋ ماقساتىندا ەلىمىزدە ەكىنشى Kodokan Spirit كوپ قىزمەتتى سپورت كەشەنى ىسكە قوسىلدى.

بۇعان دەيىن العاشقى ورتالىق 2021 جىلى ورال قالاسىندا اشىلعان بولاتىن.

اۋماعى 1200 شارشى مەتر بولاتىن عيماراتتا ءبىر مەزەتتە 1000-عا جۋىق جاس سپورتشىلار دزيۋدومەن اينالىسا الادى. زال 180 ورىندىقپەن، وليمپيادالىق ساپالى جاپون تاتامي توسەنىشتەرىمەن، زاماناۋي جەلدەتۋ جانە جارىقتاندىرۋمەن جابدىقتالعان. سونداي-اق سپورت كەشەنىندە توپتىق ساباقتارعا ارنالعان ەكى شاعىن بولمە، اتا-انالارعا ارنالعان ىڭعايلى كۇتۋ الاڭى جانە اتاقتى Oneshott برەندىنىڭ كوفەحاناسى بار.

اشىلۋ سالتاناتىنا استانا قالاسى اكىمىنىڭ ورىنباسارى ەسەت بايكەن، استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى ۆاسيلي لەۆيت ارنايى قاتىستى.

قازىر استانادا دزيۋدومەن اينالىسىپ جۇرگەن جاستار كۇننەن-كۇنگە ارتىپ كەلەدى. جالپى قالادا 3500 ەرەسەك جانە جاسوسپىرىمدەر دزيۋدومەن بەلسەندى اينالاسۋدا. 290 دزيۋدوشى كاسىبي تۇرعىدا شۇعىلدانادى.

قالا اكىمدىگى سپورتشىلاردى قولداۋ ماقساتىمەن استانادا العاشقى دزيۋدو ورتالىعىن اشىپ وتىر. بولاشاقتا وليمپيالىق ويىنداردا التىن جۇلدەنى اپەرەتىن، ەلىمىزدىڭ ابىرويىن اسقاقتاتار جەرلەستەرىمىز وسى جەردەن شىعاتىنىنا سەنەمىن! — دەدى استانا قالاسىنىڭ اكىمىنىڭ ورىنباسارى ەسەت بايكەن.

شىندىعىندا دا، دزيۋدودان ەلىمىزدە العاشقى الەم چەمپيونى اتاعىن 2009 جىلى 100 كەلى سالماقتا ماكسيم راكوۆ السا، وليمپيادادا اسحات جيتكەەۆ، ەلدوس سمەتوۆ، گالبادراحىن وتگونتسەتسەگ كۇمىس، قولا مەدالدى جەڭىپ الدى. الايدا دزيۋدو سپورتىنا دەگەن قىزىعۋشىلىق جوعارى بولعانىمەن، وليمپيادا چەمپيونى اتاعى بۇيىرماي كەلەدى.

دزيۋدو سپورتىنىڭ مامانى جاندوس قونىسباەۆتىڭ ايتۋىنشا، 25 جىل ىشىندە استانا قالاسىندا دزيۋدو سەكتسيالارى ءار جەردە كىشىگىرىم عانا بولسا، ەندى ولاردىڭ باسىن بىرىكتىرۋ مۇمكىندىگى بەرىلدى.

ءبىر ەرەكشەلىگى، استانا قالاسى دزيۋدو فەدەراتسياسىنىڭ پرەزيدەنتى عايسا جۇماعاليەۆ بۇل كەشەندى مەملەكەتتىڭ بيۋدجەتىمەن ەمەس، ينۆەستيتسيالىق جوبانىڭ ارقاسىندا اشتى.