EURO-2024: Baqtııardyń kóz jasy (VIDEO)

Kózinde ot, boıynda namys, minez qaırat, jigeri joq komandamen qandaı jeńiske jetesiń aıtshy aǵaıyn!

Bári qorqyp oınap uıyqtap júr. Tipti dopty alǵanda ne isterin bilmeı sasyp qaıda bolsa sonda tebe salady. Ol neni bildiredi? Ol joǵaryda aıtqanmenmen qatar sheberliktiń saıaz ekenin áıteýir oınap shyqsaq degen toıynǵan jannyń keıpin bildiredi. Al, sońǵy 30 jylǵa kelsek, Nazarbaevtyń rejımi fýtbol ǵana emes barlyq salanyń damýyna tusaý boldy. Biraq ol basty sebep dep oılamaımyn.

Ana Nıgerııa, Kot d Ivýar, Gana elderinde nege fýtboly álde qaıda joǵary? Nege álemdik deńgeıdegi juldyzdar shoǵyry jeterlik? О́ıtkeni, «altyn kúldiń arasynda jatsa da jyltyrap jatady», degen. Ekonomıkasy álde qaıda tómen elderdegi fýtboldyń qaryshtap damýyna qarap tań qalamyz. Zalqy ashqursaq bolsa da fýtbolǵa degen súıipenshiligi, mahabbaty sheksiz. Bizde bári basqasha osynyń keri túri.

Qysqasy, eshqandaı aqtalýdyń qajeti joq. Ádıevtiń de bas bapker retinde kinási bar. Astanov, Marechkın, Qaıyrov, Samorodov sekildi oıynshylardyń ornyna Ashat Taǵabergen, Abat Aıymbetovty alǵashqy mınýttan bastap shyǵarǵanda bir ózgeris bir úmit bolar ma edi dep qoıamyz. Biraq ol da sebep emes shyǵar. Degenimen de Slovenııamen sheshýshi oıynda jeńiske qalaıda jetý kerek edi. Ol jaqta da sol baıaǵy negizi oıynshylar bolymsyz jaraqatyna qatysty alańǵa shyqpady. О́kinishke qaraı, ol jeńisti syrt alańda kóre almadyq.

Álgi orystyń ataqty kommentatory komandanyń jeńilip jatqanyna kúıip ketip: «Nam takoı fýtbol ne nýjen», degen eken.Sol aıtqandaı bizge mundaı 0:5 esebimen sheshýshi oıynda jeńilý tipti kerek emes edi. Biraq solaı boldy.Qazaq jankúıreleri janyn salyp kórgen oıynda oısyraı jeńilip, elimizdi jerge qaratqany komandanyń janymyzǵa shoq salǵandaı qatty kúıindik.

Endi komanda qaıta jańaryp, namysy zor, oıyny jan súısinter jas talanttardy jınap, erteńgi kúnge úmitpen qaraýǵa týra keledi. Jastarǵa úlken múmkindikter berý kerek, fýtbol akdemııalardy kóbeıtip, fýtbol alańdaryn salý kerek.  Sosyn eń mańyzdysy qazaq jastaryn kóptep tartý mańyzdy. О́ıtkeni, qazaqtar ǵana el úshin,jer úshin jan ashyp, namysty bermeýge tyrysady. Altaıdan Alataýǵa deıin sozylyp jatqan keń baıtaq dalamyzdy naızanyń ushymen, bilektiń kúshimen qazaqtyń ǵana batyrlary jaýlardan qorǵap qalǵanyn umytpasaq eken. Basqa ulttyń ulttyq quramaǵa alýdyń esh qajeti joq. Olardyń shaban qımyly, «pas berse tebemin bermese júre beremin», degen qalaı bolsa solaı oıyndaryn kórip qarnyń ashyp osyndaı oıǵa eriksiz kelesiń. Baby joq komandanyń taǵy joq boldy. Basqa aıtar ýáj joq. Aıta berseń jeńilistiń sebep-saldary bir túıege júk artqandaı. О́te ókinishti.

Túndegi oıyndaǵy jeńilsten keıin Baqtııar Zaınýtdınovtyń kóz jasy kóp nársege jaýap berip turǵandaı.

Aqyn ORDABAIULY,

ALMATY