Olımpıada-2024: Qazaqstan 31 joldama aldy

Batýttyq gımnastıkadan Álem kýbogynyń besinshi kezeńiniń qorytyndysy boıynsha Danıl Musabaev Parıj Olımpıadasynyń joldamasyn jeńip aldy.

25 jastaǵy sportshy byltyr Qytaıdyń Hanchjoý qalasynda ótken jazǵy Azııa oıyndarynda batýttyq gımnastıkadan jeke jattyǵýda birinshi ret kúmis júldeni ıelengen bolatyn.

Buǵan deıin batýttyq gımnastıkadan 2016 jyly Rıo-de-Janeıro Olımpıadasynda alǵash ret Pırmammad Alıev qatysyp, 12-orynǵa ıe bolǵan edi.

Qazir Qazaqstan sportshylarynda Olımpıadanyń 31 joldamasy bar. Danıl Musabaevqa deıin. Rýslan Qurbanov, Vadım Sharlaımov, Erlik Sertaı men Elmır Álimjanov Grýzııanyń Tbılısı qalasynda semserlesýden ótip jatqan Álem kýbogynyń sheshýshi kezeńinde sapy jattyǵýy boıynsha Olımpıadanyń joldamasyn jeńip aldy.

Dastan KENJALIN,

ASTANA