ناريمان كۋربانوۆ وليمپيادا ليتسەنزياسى ءۇشىن جارىسقا شىعادى

17-21 ءساۋىر ارالىعىندا كاتاردىڭ استاناسى – دوحا قالاسىندا سپورتتىق گيمناستيكادان الەم كۋبوگىنىڭ كەزەڭى وتەدى، دەپ حابارلادى تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى.

جارىس قورىتىندىسى بويىنشا وليمپيادا ليتسەنزياسىن العان گيمناستار بەلگىلى بولادى. ۇلتتىق قۇراما ساپىنان ناريمان كۋربانوۆ ات سناريادىندا ويىندار جولداماسىنا يەلىك ەتۋگە ءبىر تابان جاقىن تۇر.

قازاقستان ەرلەر قۇراماسىنىڭ باس جاتتىقتىرۋشىسى الەكساندر كيم كۋربانوۆتىڭ جولدامانى الۋعا مۇمكىندىگى جاقسى ەكەنىن ايتتى.

دوحاداعى شەشۋشى كەزەڭدە ناريمانعا ۇزدىك ۇشتىككە كىرۋ قاجەت. سول كەزدە ءىزىن قۋعان ەشقانداي قارسىلاسى قۋىپ جەتە المايدى. قازىر ءۇش كەزەڭنەن كەيىن ونىڭ ەنشىسىندە 66 ۇپاي بار. كايردە 16 بالل، كوتبۋستا 30 بالل، باكۋدا  20 بالل العان. قازىر ول رەيتينگتە ەكىنشى ورىندا.

ەگەر لي چي كاي دوحادا ات سناريادىندا توپ جارسا، 30 بالل قوسىلىپ، ونىڭ ۇپاي سانى 68-گە جەتەدى. سول سەبەپتى ناريمان كەم دەگەندە ۇزدىك ۇشتىكتەن تۇسپەۋى كەرەك. يا بولماسا تايپەي سپورتشىسى التىن جۇلدەسىز قالۋى قاجەت. بارلىق 4 كەزەڭنەن كەيىن ەڭ جوعارى 3 جارىستاعى ۇپايلار ەسەپكە الىنادى. دەمەك، ناريمان دوحادا جاقسى ونەر كورسەتسە، كايردەگى ناتيجەسى ەسەپكە الىنبايدى، — دەدى الەكساندر كيم.

قازىر قازاقستان ەنشىسىندە سپورتتىق گيمناستيكادان وليمپيادانىڭ 1 جولداما يەگەرى بار. بىلتىر انتۆەرپەندەگى الەم چەمپيوناتىندا ميلاد كاريمي قولا مەدالمەن بىرگە كوپسايىستا جولدامانى ۋىسىنا تۇسىرگەن.

كاتاردىڭ استاناسىنداعى الەم كۋبوگىنا ەرلەر قۇراماسىندا ميلاد كاريمي، دميتري پاتانين، دياس تويشىبەك، ناريمان كۋربانوۆ بارادى.

ەركىن جاتتىعۋ، قوسسىرعاق پەن تىرەنىپ سەكىرۋدە كاريمي مەن پاتانين، ات سناريادىندا كۋربانوۆ پەن تويشىبەك، قوس شىعىرشىقتا پاتانين، كەرمەدە تويشىبەك پەن كاريمي ونەر كورسەتەدى.

ايەلدەر جارىسىندا ايدا باۋىرجانوۆا، داريا ياسينسكايا سىنعا تۇسەدى. ولار تىرەنىپ سەكىرۋ، ءار بيىكتىكتەگى قوسسىرىقتا، ەركىن جاتتىعۋ مەن بورەنەدە جارىسادى.