اسىق پەن اشىك: ازەربايجان كوشپەندىلەر ويىندارىنا قاتىسادى

اسىق اتۋ فەدەراتسياسىنىڭ دەلاگاتسياسى ازەربايدان رەسپۋبليكاسىنىڭ استاناسى – باكۋ قالامسىنا بارىپ، وسى ەلدىڭ ۇلتتىق سپورت تۇرلەرى قاۋىمداستىعىنىڭ وكىلدەرىمەن كەزدەستى.

كەزدەسۋگە «سپورت جۇلدىزدارى» جۋرنالىنىڭ باس رەداكتورى، اسىق اتۋ فەدەراتسياسىنىڭ باس حاتشىسى مۇساعالي تاسقاليەۆ پەن «سپورت جۇلدىزدارى» رەسپۋبليكالىق جۋرنالىنىڭ اتقارۋشى ديرەكتورى بولاتبەك ساعىمباەۆ، ازەربايجان جاعىنان ۇلتتىق سپورت تۇرلەرى قاۋىمداستىعىنىڭ پرەزيدەنتى كازيم گۋربانوۆ، ۇيىمنىڭ ۆيتسە-پرەزيدەنتى سامير ابدۋللاەۆ پەن باس حاتشىسى سەيمۋر گۋربانوۆ قاتىستى.

جاس بولسا دا باۋىرلاس ەلدىڭ ۇلتتىق سپورتىن ورگە سۇيرەپ جۇرگەن ازامات ءبىزدى جىلىشىرايمەن قابىلداپ، قۇرمەت كورسەتتى. ءبىز دە ءوز كەزەگىمدە ولارعا بيىلعى جىلى استانادا وتەتىن V دۇنيەجۇزىلىك كوشپەندىلەر ويىندارىنىڭ شاقىرۋى مەن ەرەجەسىن جانە تۇجىرىمداماسىن تابىس ەتتىك. بۇدان بولەك ازەربايجان باۋىرلارعا ءوزىمىزدىڭ اسىق اتۋ سپورتىنىڭ ويىن كىلەمىن جانە اسىقتار جيىنتىعىن سىيلادىق. تەك سىيلاپ قانا قويماي اسىق ويىنى قالاي وينالاتىنىن كورسەتىپ، ءتۇسىندىرىپ بەردىك. كەزدەسۋگە قاتىسقان ازەربايجان ۇلتتىق سپورت تۇرلەرى قاۋىمداستىعىنىڭ ۆيتسە-پرەزيدەنتى سامير ابدۋللاەۆ پەن باس حاتشىسى سەيمۋر گۋربانوۆتار دا قاۋىمداستىق پرەزيدەنتىمەن بىرگە اسىق اتىپ كوردى، — دەدى مۇساعالي تاسقاليەۆ.

ونىڭ ايتۋىنشا، ازەربايجاندا دا اشىك دەپ اتالاتىن اسىق ويىنى بار. تەك ولار ءالى ونى سپورت تۇرىنە اينالدىرا قويماپتى.

ۇلتتىق سپورت تۇرلەرى قاۋىمداستىعىنىڭ پرەزيدەنتى ءبىزدىڭ اسىق ويىنىنا ەرەكشە قىزىعۋشىلىق تانىتىپ، كوشپەندىلەر ويىندارىنا ازەربايجان ەلىنەن مىندەتتى تۇردە كوماندا اكەلەمىز دەپ ۋادە بەردى. مامىر ايىنىڭ سوڭىندا ءوزى ەكى باپكەرىن الىپ، استاناعا كەلەتىن بولدى. سول ساپاردا ولار اسىق ويىنىن ۇيرەنىپ، ەلدەرىنە بارعاسىن كوماندا جاساقتاماقشى، — دەدى ول.

كەزدەسۋ سوڭىندا «سپورت جۇلدىزدارى» رەسپۋبليكالىق جۋرنالى اتىنان كازيم حانلاروگلىنا «حالىقتار دوستىعى» توسبەلگىسى تابىس ەتىلىپ، ءتۇبى ءبىر تۇركى ەلدەرى اراسىنداعى دوستىقتى الداعى ۋاقىتتا ۇلتتىق سپورت تۇرلەرى ارقىلى جانداندىرۋعا كەلىسىم جاسالدى.

ءوز تىلشىمىزدەن