رىباكينا ەكىنشى رەت قاتارىنان مايامي ءتۋرنيرىنىڭ فينالىنا شىقتى

قازاقستاننىڭ ءبىرىنشى راكەتكاسى ەلەنا رىباكينا اقش-تا ءوتىپ جاتقان Miami Open WTA 1000 ءتۋرنيرىنىڭ فينالىنا شىقتى، دەپ حابارلادى قازاقستان تەننيس فەدەراتسياسى.

ول جارتىلاي فينالدا اسا تاجىريبەلى، كەزىندە دۇنيەجۇزىلىك رەيتينگىدە كوش باستاعان، قازىر 32-ورىندا تۇرعان بەلارۋستىڭ وكىلى ۆيكتوريا ازارەنكومەن وينادى.

ازارەنكو سپورتتىق جولىندا تالاي رەت تابىسقا جەتكەن. سونىڭ ىشىندە اۋستراليا اشىق چەمپيوناتىنىڭ ەكى رەت، Miami Open WTA 1000 ءتۋرنيرىنىڭ ءۇش دۇركىن جەڭىمپازى اتانعان.  دەگەنمەن ازارەنكو مەن رىباكينا ءبىر-بىرىمەن ءۇش رەت كەزدەسىپ، بارىندە وتانداسىمىز جەڭگەن.

بۇل جولى ءبىرىنشى پارتيادا ەسەپ 3:3 بولعان كەزدە رىباكينا برەيك جاساي الدى. سودان كەيىن سەتتى 6:4 ەسەبىمەن ءوز پايدامىنا شەشتى.

ەكىنشىسى سەتتە ازارەنكو ءۇش برەيك جاساپ، بەت قاراتپادى. ەسەپ — 6:0.

ءۇشىنشى، شەشۋشى سەتتە ەسەپ 2:2 بولعاندا، رىباكينا برەيكپەن العا شىقتى. بىراق ماتچقا دوپ بەرگەندە، ءوز مۇمكىندىگىن ءمۇلت جىبەرىپ الدى. ەسەپ 5:5 بولىپ، ويىن قىزا ءتۇستى. وسى كەزدە رىباكينا تاي-برەيكتە وتە ءساتتى وينادى. قورىتىندى ەسەپ — 7:6 (7:2).

ەندى رىباكينا فينالدا الەمنىڭ 53-راكەتكاسى، امەريكالىق دانيەل كوللينزبەن سىنعا تۇسەدى.

د.كوللينز جارتىلاي فينالدا الەمنىڭ 16-راكەتكاسى، رەسەيلىك ەكاتەرينا الەكساندروۆانى 6:3، 6:2 ەسەبىمەن جەڭگەن.

وسىلايشا، 30 ناۋرىز كۇنى رىباكينا كوللينزبەن كورتقا شىعادى. ەكەۋى بەسىنشى رەت كورتتا كەزدەسەدى. ازىرشە ەسەپ – 3:1، ەلەنا رىباكينا الدا.