بوكستان قازاقستان ايەلدەر قۇراماسىنا جاڭا باس جاتتىقتىرۋشى كەلدى

بوكستان قازاقستان ايەلدەر قۇراماسىنىڭ باس جاتتىقتىرۋشىسى بولىپ ەلدوس سايدالين تاعايىندالدى، دەپ حابارلادى Olympic.kz.

ەلدوس سايدالين بۇل قىزمەتتە ءشامىل ءسافيۋلليندى الماستىردى. سافيۋللين 2021 جىلدان بۇگىنگە دەيىن باس قۇرامانى جاتتىقتىرىپ كەلدى.

ول ەڭبەك جولىن 16 جىل بۇرىن قاراعاندىداعى سپورت مەكتەبىندە جاتتىقتىرۋشىلىقتان باستاعان.

2020 جىلدان بەرى قازاقستان ءجاسوسپىرىم قىزدار جانە جاستار قۇراماسىن جاتتىقتىرىپ كەلدى. ونىڭ جەتەكشىلىگىمەن قازاقستان كومانداسى 2021 جىلعى الەم چەمپيوناتىندا 2 كۇمىس، 3 قولا جەڭىپ الدى.

2022 جىلعى الەمدىك دودادا 2 التىن، 2 كۇمىس جانە 3 قولا مەدالدى يەلەندى.

بىلتىر استانادا وتكەن ازيا چەمپيوناتىندا سايدالين جاساقتاعان كوماندا 8 التىنمەن كوزگە تۇسكەن. 2023 جىلى ارمەنيادا قازاقستان ءجاسوسپىرىم قىزدار قۇراماسى 3 التىن، 5 قولا مەدالدى جەڭىپ الدى.

قازىر قازاقستان ايەلدەر كومانداسىنىڭ ەنشىسىندە وليمپيادانىڭ جالعىز جولداماسى بار. 57 كەلىدەگى كارينا يبراگيموۆا ازيا ويىندارىندا كۇمىس مەدالمەن قاتار، پاريج ليتسەنزياسىن يەلەندى.

يتاليادا وتكەن الەمدىك ليتسەنزيالىق تۋرنيردە قازاقستان ايەلدەر قۇراماسى جولداماسىز قالدى.

مۇنداي قىزمەتتى سەنىپ تاپسىرعانى ءۇشىن باسشىلىققا ۇلكەن العىسىمدى ايتامىن. ءيا، الدا ءبىر عانا ليتسەنزيالىق تۋرنير قالدى. اتقاراتىن جۇمىس كوپ. جاۋاپكەرشىلىكتەن قورقىپ، قاشسام دا بولاتىن ەدى. بىراق ۇلتتىق قۇرامانى جاتتىقتىرۋ – مەنىڭ ارمانىم! ءارى كوماندانىڭ قازىرگى جاعدايىنا قانىق بولعان سوڭ، جاۋاپتى ساتتە جالتارۋ باپكەرلىگىمە سىن بولار ەدى.

باس قۇرامانىڭ قىزدارىن جاقسى بىلەمىن. بارلىعى دا الەمدىك دەڭگەيدەگى بوكسشىلار. تالاي جارىستاردا شىڭدالعان. سول سەبەپتى، بار كۇشىمىزدى سالىپ، سوڭعى ليتسەنزيالىق جارىستا مەيىلىنشە كوپ جولداما الۋعا تىرىسامىز.

سونداي-اق، كوماندادا ءتارتىپ ورناتۋ – ەڭ ءبىرىنشى ماقسات بولماق. «تارتىپكە باس يگەن قۇل بولمايدى»، دەگەن باۋىرجان مومىش ۇلى. سوندىقتان، تارتىپكە باسا نازار اۋدارامىز. – دەدى جاتتىقتىرۋشى.

ەندى قازاقستان ايەلدەر قۇراماسىن تايلاندتاعى سوڭعى ليتسەنزيالىق جارىسقا ەلدوس سايدالين باستاپ اپارادى.