Astanada Olımpıada joldamasyna talasatyn boksshylar anyqtaldy

 Astanada sparrıngtik týrnırdiń fınaldyq jekpe-jekter boldy.

Búgin erler arasynda 63,5 keli salmaqtaǵy jeńimpaz anyqtaldy. Bul salmaqtaǵy fınalda Muhammedsabyr Bazarbaıuly men Dýlat Bekbaýov sharshy alańǵa shyqty. Jekpe-jekte Muhammedsabyr Bazarbaıuly jeńiske jetti. Ol osy salmaqqa jaqynda aýysqan Bekbaýovtan fınalda aılasyn asyrdy.

Buǵan deıin ol týrnırde Ertýǵan Zeınýllınov pen Jandos Qarabalıevti jeńgen bolatyn.

Osylaısha, boksshy Taılandtaǵy sońǵy lıenzııalyq týrnırde Olımpıada joldamasyna talasatyn múmkindik aldy.

Muhammedsabyr osy salmaqta byltyr Qazaqstan Spartakıadasyn jeńgen bolatyn.

Qyzdar arasyndaǵy jekpe-jekter de tartysty bolyp jatyr.

Ázirshe Uljan Sársenbek pen Natalıa Bogdanova Taılandta ótetin lıenzııalyq týrnırge baratyn bolyp sheshildi.

Uljan Sársenbek 54 keli salmaqta Symbat Álıasqarmen kezdesti. Bul aıqasta Sársenbek qarsylasynan myqty boldy.

Jekpe-jekte tóreshilerdiń biraýyz sheshimimen Uljan Sársenbek jeńiske jetti.

66 keli salmaqta Natalıa Bogdanova men Jasmın Qızatova qolǵap túıistirdi.

Tóreshiler sheshimimen jekpe-jekte Bogdanova jeńimpaz dep tanyldy. Natalıa Bogdanova bıylǵy maýsymda úshinshi ret Olımpıadaǵa irikteý týrnırine qatysady.

Ol Hanchjoýdaǵy jazǵy Azııa oıyndary men Italııadaǵy álemdik lıenzııalyq týrnırde baq synaǵan edi.

75 keli salmaqta da Olımpıada joldamasyna talasatyn boksshy anyqtaldy.

Bul salmaqtaǵy fınaldyq synda Valentına Halzova men Gúlsaıa Erjan judyryqtasty.

Jekpe-jekte tájirıbeli Halzova qarsylasyna esh amal qaldyrǵan joq.

Sóıtip, sparrıngtiń qorytyndysy boıynsha erler quramasynda 63,5 kelige deıingi salmaqta Muhammedsabyr Bazarbaıuly, qyzdar komandasynda Uljan Sársenbek (54 kg), Natalıa Bogdanova (66 kg) men Valentına Halzova (75 kg) Taılandta 26 mamyr men 3 maýsym aralyǵynda bolatyn lıenzııalyq týrnırge qatysady.

Dastan KENJALIN,

ASTANA