«Ordabasy» fýtbol klýbyna qomaqty aıyppul salyndy

Shymkenttiń «Ordabasy»fýtbol klýbyna qomaqty aıyppul salyndy.

Komandaǵa Almatynyń «Qaırat» klýbymen matchynda (1:2) jergilikti  jankúıerlerdiń tóreshige balaǵat sóz aıtqany úshin 120 AEK pen tehnıkalyq aımaqta (qosalqy tóreshi ornynda) matqa qatysý joq adamnyń bolýyna baılanysty 100 AEK mólsherinde aıyppul salynatyny týraly sheshim shyqty.

Osy eki aıyppul 812 240 teńge bolyp otyr. Ony «Ordabasy» 11 mamyrǵa deıin tóleýi tıis.

Jalpy, Premer-lıga men Qazaqstan kýbogy úshin matchtarda «Ordabasy» fýtbol klýbyna qatysty alǵash ret keleńsiz jaǵdaı bolyp jatqan joq. Buǵan deıin Qazaqstan jankúıerleri Túrkııanyń Antalııa qalasynda  alǵash ret ótken Qazaqstan sýperkýbogynyń fınaly kezinde tóbeles shyǵarǵan bolatyn.

Matchta Shymkenttiń «Ordabasy» men Qostanaıdyń «Tobyl» klýbtary kezdesken. Osy oıyn kezinde qos klýbtyń jankúıerleri otyratyn jer bólinbegen soń, ekinshi taımnyń ortasynda daý-janjal shyǵyp, onyń sońy tóbeleske ulasqan.

Qazaqstan jankúıerleri komandalarynyń jalǵan namysy úshin bir-birine oryndyq laqtyryp, bir-birin balaǵattaǵan.

Qazir «Ordabasy» Premer-lıganyń týrnır kestesinde 7 upaımen úshinshi orynda keledi. Birinshi jáne ekinshi oryndardy Almatynyń «Qaırat» klýby men Petropavldyń «Qyzyljar» komandasy ıelenip otyr.

Dastan KENJALIN,

ASTANA