16 mamyr kúni Abaı atyndaǵy Qazaq ulttyq pedagogıkalyq ýnıversıtetiniń 90 jyldyǵyna oraı Almaty qalasyndaǵy joǵary oqý oryndary stýdentteri arasynda jastar arasynda qazaq kúresin keńinen nasıhattaý, ulttyq sport túrimen aınalysatyn jas palýandardyń úlesin arttyrý maqsatynda tól kúresimizden «Ýnıversıtet barysy» jarysy ótkizildi. Ol bilim ordasynyń kúrdeli jóndeýden ótip, jańadan tusaýy kesilgen sport kesheninde jalaýyn kóterdi.
Alaman jarystyń ashylý saltanatynda sóz sóılegen ýnıversıtet rektory, professor Takır Balyqbaev bilim ordasynyń 90 jyldyǵy aıasynda uıymdastyrylyp jatqan aýqymdy sharalarǵa toqtalyp, barsha qatysýshylarǵa sáttilik tiledi. Sóz kezegin alǵan qurmetti qonaqtar Qazaqstan Respýblıkasy Ulttyq qaýipsizdik komıtetiniń qurmetti qyzmetkeri, ulttyq sport óneriniń janashyry, general-leıtenant Ádil Shaıahmetov, Qazaqstannyń eńbek sińirgen jattyqtyrýshysy, Qazaq kúresi federaııasynyń tuńǵysh prezıdenti Erǵalı Muhıtdınov, Almaty qalasy máslıhatynyń depýtaty, ýnıversıtetimizdiń baqylaý keńesiniń múshesi Kenjehan Matyjanov, «Dınamo» sport qoǵamy Ortalyq keńesi tóraǵasynyń orynbasary, KSRO jáne Qazaqstan Respýblıkasynyń eńbek sińirgen jattyqtyrýshysy Marat Qoshaev, Qazaqstannyń eńbek sińirgen artısi Lıýııa Týleshova sportshylarǵa jyly lebizderin bildirip, aldaǵy oıyndaryna jeńister tiledi.
Jarysqa qalamyzdyń 20 joǵary oqý ornynan 120-dan astam sportshy qatysyp, 60 kg, 74 kg jáne 100 kg salmaq dárejesi boıynsha kúsh synasty. Dodaǵa halyqaralyq sanattaǵy tóreshiler tórelik etip, ádil baǵasyn berdi.
Týrnır qorytyndysy boıynsha 60 kg salmaq dárejesinde 3 oryndy Qazaq sport jáne týrızm akademııasynyń palýany Madııar Jambyl jáne Abaı atyndaǵy Qazaq ulttyq pedagogıkalyq ýnıversıtetiniń palýany Azamat Yqyn ózara bólisse, 2 oryndy Qazaq sport jáne týrızm akademııasynyń sportshysy Samat Saǵatbek qanjysyna baılady. Dál osy bilim ordasynyń palýany Jomart Ámiráli júldeli 1 oryndy jeńip aldy.
74 kg salmaq dárejesi boıynsha «Narhoz» ýnıversıtetiniń palýany Bolat Ábdikárim men Qazaq sport jáne týrızm akademııasynyń palýany Almas Turarbek qola medal ıegerleri atandy. Qazaq sport jáne týrızm akademııasynyń eki birdeı palýany Davron Davaev jáne Bıjan Elibaı kúmis jáne altyn medaldi jeńip aldy.
100 kg salmaq dárejesi boıynsha «Qaınar» ýnıversıtetiniń stýdenti Janserik Jumabaı pen Qazaq sport jáne týrızm akademııasynyń stýdenti Kenesary Orynbasar 3 orynǵa ornalassa, 2 oryndy Qazaq sport jáne týrızm akademııasynyń palýany Erasyl Janataev jeńip aldy. Abaı atyndaǵy Qazaq ulttyq pedagogıkalyq ýnıversıtetiniń palýany Meırambek Barah altyn medal ıegeri atandy. Sonymen qatar Meırambek Barahqa 100 kg salmaq dárejesinde beldesken Qazaq KSR-niń eńbek sińirgen jattyqtyrýshysy, KSRO sport sheberi, sambo kúresinen 100 kg salmaqta elimizdiń birneshe dúrkin chempıony, joǵary oqý oryndary arasyndaǵy aýyl sharýashylyǵy stýdentteri arasynda ótetin respýblıkalyq týrnırdiń jeńimpazy, elimizge tanymal kóptegen palýandardy jattyqtyrǵan Amangeldi Ismaǵulovtyń arnaıy júldesi men 100 000 teńge kóleminde aqshaılaı syılyq tabys etildi.
Jalpy qazaq kúresiniń júlde qory I orynǵa 150 000 teńgeni, II orynǵa 100 000 teńgeni, III orynǵa 50 000 teńge boldy.
Úzdik óner kórsetken sportshylar «Jas palýan», «Shapshań palýan», «Jigerli palýan», «Qajyrly palýan», «Sheber palýan» atalymdarymen jáne baǵaly syılyqtarmen marapattaldy.
Barlyq qatysýshy sportshylar men jarys barysyn ádil baǵalaǵan tóreshiler alqasy baǵaly syılyqtar jáne alǵys hattarmen marapattaldy.
Saýyqtyrý dene mádenıeti kafedrasynyń meńgerýshisi Amantaı Qaraqovtyń qazaq kúresinen osyndaı alamandy qala deńgeıinde aıtýly bilim shańyraǵynda uıymdastyryp, iske asyrý ońaı bolmaǵany da anyq. Degenmen de jumyla kótergen júk jeńil demeksh, ýnıversıtet rektorynyń tikeleı qoldaý-kómegi men bilgir de bilikti basshynyń, ulttyq kúreske degen durys kózqarasynyń nátıjesinde jarys óte jaqsy ótti. Sonymen qatar, osyndaı baıraqty jarystyń basynan baqaıshyǵyna deıin, qara jumystyń bárin tııanaqty atqaraǵan qazaq kúresinen alǵashqy álem chempıonatynyń kúmis júldegeri Erkin Saıdoqovtyń jasta bas bolǵan óreli isine kópshilik bas barmaqpen baǵa berdi.
Tartysty ótken alaman jekpe-jekterdiń sońynda ýnıversıtet basshysy Takır Balyqbaev qara shańyraqtyń mereıli merekesi aıasynda tuńǵysh ret uıymdastyrylǵan bul sporttyq doda, aldaǵy ýaqytta dástúrli sharaǵa aınalatyndyǵyna úlken senim bildirdi. Bul jarys stýdentterdiń ulttyq kúresimizge degen súıispenshiligin arttyratyn berekeli bastama ekendigi kóńil qýantady. Aldaǵy jyly qatysýshylardyń sany eki ese kóbeıe túsetindiginde kúmán joq. Sondyqtan da tusaýy jańadan kesilgen bul básekeniń bolashaǵy jarqyn dep bilemiz.
Janatbek IShPEKBAEV,
Abaı atyndaǵy QazUPÝ-niń
Tárbıe jumysy jáne áleýmettik damý jónindegi prorektory,
professory
Foto: Serik IMANQULOV
ALMATY