SportPress.kz قازاقستان سپورت جاڭالىقتارى
بۇگىن قىتايدىڭ گونكونگ قالاسىندا ءوتىپ جاتقان دزيۋدودان ازيا چەمپيوناتىنىڭ ەكىنشى جارىس كۇنى ۇلتتىق قۇراما ساپىنان بەس دزيۋدوشى تاتاميگە شىعىپ، تەك ەسميگۋل كۋيۋلوۆا (-63 كگ) عانا جۇلدەگەر اتاندى، دەپ حابارلادى تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى.
ۇلتتىق قۇرامانىڭ سپورتشىسى جۇلدە جولىندا زۋلحۋمار داشكينوۆاعا (تۇركمەنستان) ەش مۇمكىندىك بەرمەي، مەرزىمىنەن بۇرىن جەڭدى. بۇل — ونىڭ سارى قۇرلىق چەمپيوناتىنداعى ءبىرىنشى جۇلدەسى. تاڭعى سەسسيادا ەسميگۋل (-63 كگ) ەكىنشى اينالىمدا جاپون بالۋانى كيراري ياماگۋچيدەن جەڭىلىپ قالعان. سوسىن، جۇبانىش بەلدەسۋىندە ۇندىستاندىق سپورتشىدان ايلاسىن اسىردى.
جاپون دزيۋدوشىسىنان جەڭىلىپ قالعانىما قاراماستان مەدال ءۇشىن كۇرەسە الدىم. بۇل مەنىڭ العاشقى ازيا چەمپيوناتىم، العاشقى جۇلدەم. جاراقاتىم بولدى. وسى جارىسقا قاتىسۋ، قاتىسپاۋىم بەلگىسىز بولعان. وليمپياداعا از ۋاقىت قالدى. ۇپاي جينايتىن ءار مۇمكىندىكتى پايدالانۋىم كەرەك، — دەدى ەسميگۋل سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.
قولا مەدال ءۇشىن بولعان بەلدەسۋدە تاعى ءبىر دزيۋدوشىمىز ابىلايحان جۇبانازار (-81 كگ) سومون ماحمادبەكوۆتەن (تاجىكستان) جەڭىلىپ قالدى.
وسىعان دەيىنگى ازيا چەمپيوناتىندا (استانا، 2022 جىل) 73 كگ دەيىنگى سالماقتا التىن مەدال العان دانيار شامشاەۆ العاشقى اينالىمدا، اسقار نارقۇلوۆ ەكىنشى اينالىمدا ءسۇرىندى. ەكاتەرينا توكارەۆا (-70 كگ) شيرەك فينالدا شوحيستا نازاروۆادان، سوسىن جۇبانىش بەلدەسۋدە تاعى ءبىر وزبەكستاندىق گۇلنوزا ماتنيازوۆادان ارى وتە المادى.
كەشە چەمپيوناتتىڭ العاشقى كۇنى عاليا تىنباەۆا (48 كگ) مەن جانارىس راحمەتقالي (66 كگ) قولا جۇلدەگە يە بولعان.
ازيا چەمپيونى رەيتينگتە 700، كۇمىس جۇلدەگەر 490 ۇپاي السا، قولا مەدال العان ەكى دزيۋدوشىعا 350 بالل قوسىلادى. قولا جۇلدە جولىندا جەڭىلگەن تاعى ەكى سپورتشى 250 ۇپايعا يە بولادى.
View this post on Instagram
