كۇرەستەن ۇلتتىق قۇراماعا لەگيونەرلەردى ەمەس، قانداستاردى شاقىرۋ كەرەك!

يۋسۋپ، ەلەنا جانە ناچىن سەكىلدى لەگيونەرلەرگە ءۇمىت ارتتا بەرمەي، قانداس-سپورتشىلاردى نەگە ەلگە شاقىرمايمىز؟

كۇرەس تۇرلەرىنەن بىشكەكتە ءوتىپ جاتقان ازيالىق ىرىكتەۋ تۋرنيرىندە 18 سالماق دارەجەسىندە 36 ليتسەنزيا تىگىلىپ، 195 سپورتشى پاريجگە جولداما ءۇشىن باق سىنادى.

قازاقستاننان كۇرەستىڭ ءۇش ءتۇرى بويىنشا ون التى پالۋان قاتىستى. ءبىزدىڭ ەلدىڭ اتىنان شەتەلدەن كەلگەن لەگيونەر رەتىندە سىنعا ءتۇسىپ، پاريج وليمپياداسىنا جولداما العان يۋسۋپ باتىرمۋرزاەۆ تا بار. ول 1996 جىلى 13 ساۋىردە رەسەيدىڭ داعىستان رەسپۋبليكاسىندا تۋعان. قازىرگى كەزدە اقتوبە وبلىسىنان كۇرەسەتىن يۋ.باتىرمۋرزاەۆ ءۇش جىل بۇرىن توكيو وليمپياداسىنا قاتىسىپ، جۇلدە الا المادى.

كەشە، 20 ساۋىردە بىشكەكتەگى ليتسەنزيالىق سايىستا ايەلدەر كۇرەسىنەن 68 كگ سالماقتا سىنعا تۇسكەن ەلەنا شالىگينا قىرعىز قىزى مەيىرىم جۇمانازاروۆادان (6:2) جەڭىلدى. ودان كەيىن شالىگينا سولتۇستىككورەيالىق سپورتشى سول گۋم پاكتان ۋاقىتىنان ەرتە جەڭىلىپ، جولدامادان ايىرىلدى. وتىز سەگىز جاسار سپورتشى شىمكەنت قالاسىندا تۇرادى.

ناچىن كۋلار بيىل كۇرەستەن ەلوردادا وتكەن ەل بىرىنشىلىگىندە 65 كەلى سالماقتا ءۇشىنشى ورىن الدى. 28 جاستاعى پالۋان شىمكەنتتىڭ اتىنان قاتىسادى. ول رەسەي جانە ەۋروپا چەمپيونى مەن جۇلدەگەرى اتانعان.

جالپى كۇرەستە شەتەلدە جۇرگەن ەتنيكالىق قازاق پالۋاندار بار. ولار: ابۋسايمان حابيلا (قىتاي)، اقتەڭگە كەۋنيمجاەۆا (وزبەكستان) جانە باقالالارى.

قازاقستان كۇرەس فەدەراتسياسىنىڭ پرەزيدەنتى داۋلەت تۇرلىقانوۆقا ايتارىمىز: رەسەيدىڭ ءۇشىنشى-ءتورتىنشى ءنومىرلى سپورتشىلارىن ەلىمىزگە شاقىرعاننان پايدا جوق. ودان دا قازاق ۇل-قىزدارىنا جاعداي جاساپ، يران، ازەربايجان، اقش، جاپونيا مەن رەسەيگە وقۋ-جاتتىعۋ جيىندارى مەن جارىستارعا جىل سايىن جىبەرۋ كەرەك. سوندا عانا جەتىستىك بولادى.

ايبەك مۇحانوۆ،

ماڭعىستاۋ وبلىسى