ماجارلار دا قازاقتىڭ اسىق ويىنىنا قىزىعىپ جاتىر (فوتو)

ماجارستاندا سوڭعى ۋاقىتتا اسىق اتۋ سپورتىن دامىتۋ قولعا الىنا باستاپتى. بۇل جونىندە ماجار-قازاق مادەني ۇيىمىنىڭ باسشىسى جانارگۇل كوپجاساروۆا اسىق اتۋ فەدەراتسياسىنىڭ ءباسپاسوز قىزمەتىنە بايانداپ بەردى.

مەن اقتوبە وبلىسىنىڭ تۋماسىمىن. ويىل اۋدانىندا تۋىپ-ءوستىم. انام اتىراۋ قالاسىندا تۇرادى. بىزدەر ماجارستاندا 50-گە جۋىق قازاق تۇرامىز – دەيدى جانارگۇل باقتىگەرەيقىزى. – ونىڭ كوبى وسى جاقتا ءبىلىم الىپ جاتقان ستۋدەنتتەر. ءوزىم قۇرىلتايشى بولىپ ماجار-قازاق مادەني ۇيىمىن اشقانبىز. ۇلتتىق ويىندارىمىز توعىزقۇمالاقتى بىلتىردان بەرى، اسىق اتۋ مەن بەس اسىقتى ەكى-ءۇش اي كولەمىندە دامىتىپ جۇرگەن جايىم بار. جالپى، ماجارلاردا بۇرىن ءبىزدىڭ اسىق ويىنىنا وتە ۇقساس كاپۋزاش جانە بيكازاش دەگەن ويىندار بولىپتى. ءبىر قىزىعى اسىقپەن ەمەس تاسپەن وينالادى ەكەن.  بىراق ۇلكەندەر جاعى بولماسا قازىرگى ماجار جاستارى ول ويىنداردى بىلمەيدى. ءبىزدىڭ اسىعىمىزدى كورىپ، ۇمىتىلعان ويىندارى ەستەرىنە ەندى ءتۇسىپ جاتىر.

ماجارستاندا اسىق ويىنىن دامىتۋعا ماعان كومەكتەسىپ، اسىق اتۋدان كوشپەندىلەر ويىندارىنا دايىندالىپ جۇرگەن بالاج دەگەن جىگىت ءوز ەلىنىڭ تۋىن بەينەلەپ اسىق جاساپ شىعاردى. قازىر سول اسىقتارمەن ويناپ ءجۇرمىز. جاقىندا قازاقستاننان جومارت سابىرجان ۇلى اسىق جيىنتىعىن بەرىپ جىبەرگەن ەكەن. قۋانىپ قالدىق. جالپى، ماجارلاردىڭ اسىق ويىنىنا دەگەن قىزىعۋشىلىقتارى وتە جاقسى. تيمەا دەگەن ماجار قىزى بەس اسىقتان شاكىرتتەر تاربيەلەپ ءجۇر. بۇدان بولەك تيمەا ماجاردىڭ سيتەرا دەگەن ۇلتتىق اسپابىمەن قازاقتىڭ اندەرىن ايتىپ، كۇي تارتادى.

جانارگۇل بىزگە وسىنداي جاعىمدى جاڭالىقتى قۋانا جەتكىزدى. ەندى ول 8-14 قىركۇيەك كۇندەرى استانادا وتەتىن دۇنيەجۇزىلىك كوشپەندىلەر ويىندارىنا اسىق اتۋ سپورتىنان كوماندا الىپ كەلگىسى، ءسويتىپ ماجارلارعا اسىق ويىنى قالاي وينالاتىنىن كوزبە-كوز كورسەتكىسى كەلەدى. الايدا، جارىسقا كەلەتىن قارجى تابا الماي جاتىر ەكەن.

جانارگۇل ءسوز سونىندا ەگەر بىزگە كوشپەندىلەر ويىندارىنا كەلۋىمىزگە دەمەۋشىلىك كومەك كورسەتەتىن ازاماتتار تابىلىپ جاتسا دەگەن ءوتىنىشىن ءبىلدىردى. ماجارستاندا ولارعا قولداۋ كورسەتەتىن بيزنەسمەن قازاقتار جوق كورىنەدى. جاناردىڭ ەندىگى ءۇمىتى — ءوزىمىزدىڭ قالتالى ازاماتتار مەن قر ۇلتتىق سپورت تۇرلەرى قاۋىمداستىعىندا. ماجار ەلىندە قازاقتىڭ ۇلتتىق ويىندارىن دامىتىپ، بولاشاقتا فەدەراتسيا اشامىن دەپ جۇرگەن قازاق قىزىنا كومەك قولىن سوزاتىن ازاماتتار مىندەتتى تۇردە تابىلادى دەگەن سەنىمدەمىز.

اسىق اتۋ فەدەراتسياسىنىڭ ءباسپاسوز قىزمەتى

استانا