«شاردارا ارمسپورت» شاعىن كلۋبىنان 107 الەم چەمپيونى شىقتى (فوتو، ۆيدەو)

بيىل تۇركىستان وبلىسىنىڭ شاردارا اۋدانىنداعى «شاردارا ارمسپورت» كلۋبىنا 26 جىل بولىپ وتىر. بۇل كلۋبتىڭ نەگىزىن 1997 جىلى اۋداننىڭ قازىرگى اكىمى ارمان قارسىباەۆ قالاعان. سودان بەرى كلۋبتا ارمرەستلينگپەن اينالىساتىن جەرگىلىكتى تۇرعىندار الەم جانە ازيا چەمپيوناتتارىندا ەل نامىسىن قورعاپ، جەڭىستىڭ بيىك تۇعىرىنا شىعىپ، ەلىمىزدىڭ ءانۇرانىن شىرقاتىپ، كوك بايراعىمىزدى كوتەرىپ كەلەدى.

بۇگىن ءبىز كلۋبتىڭ قازىرگى تىنىسىمەن تانىسۋ ءۇشىن «شاردارا ارمسپورت» ۇجىمىنىڭ پيار مەنەدجەرى، جاتتىقتىرۋشىسى ءارى سپورتشىسى، قول كۇرەسىنەن ەكى دۇركىن الەم چەمپيونى ماعجان شاميەۆپەن حابارلاسقانىمىزدا، ول قازىر كلۋبتا 500-دەن اسا سپورتشى ارمرەستلينگپەن اينالىساتىنىن، وندا 35 جاتتىقتىرۋشىنىڭ جۇمىس ىستەيتىنىن ايتتى.

سونىمەن بىرگە ونىڭ ايتۋىنشا، كلۋبتا قول كۇرەسىنەن باسقا سپورتتىڭ گىر كوتەرۋ، دزيۋدو، اۋىر اتلەتيكا، كاراتە، اسىق اتۋ، يادرو مەن نايزا لاقتىرۋ، تاەكۆوندو، بوكس، پاۋەرليفتينگ سپورت تۇرلەرى دە بار.

-قازىر «شاردارا ارمسپورت» ەلىمىزدىڭ بەتكەۇستار كلۋبىنا اينالىپ،  ەلدىڭ  اتىن ايداي الەمگە تانىتىپ كەلەدى. بۇل كلۋبتى اۋدان اكىمى ارمان قارسىباەۆ اشقان ەكەن. ونى وزىڭىزدەن جاڭا عانا ەستىپ، ءبىلدىم. قازىر دە اۋدان اكىمى كلۋبقا كەلىپ، جاتتىعا ما؟

-ءيا، ارمان اعايىمىز كلۋبقا كەلىپ، جاتتىعۋ جاساپ تۇرادى. ءوزىنىڭ اقىل-كەڭەسىن ايتىپ، بىزگە جول كورسەتىپ كەلەدى.

ۇلاعاتتى ۇستازىمىز ارمان رومان ۇلى 1997 جىلى شاردادا اۋدانىندا تۇڭعىش وسى سپورتتى الىپ كەلگەن بولاتىن. العاشىندا تەمىر-تەرسەكتەردەن، شويىن باتارەيالاردان، دت تراكتورىنىڭ دوڭگەلەكتەرىن قۇراستىرىپ، ءوز قوراسىندا جاتتىعىپ باستاعان ۇستازىمىزدى كورگەن اۋىل جاستارى قىزىعىپ، كوپتەپ وسى سپورتقا قاتىسا باستاعان. مىنە، قازىرگى تاڭدا سول قورادان باستالعان جاتتىعۋ زالى بۇكىل الەم تاڭدانىپ قارايتىن «شاردارا ارمسپورت» كلۋبىنا اينالدى.

ۇستازىمىز قازىر ءوزى جۇمىس ۋاقىتىنان كەيىن كلۋبقا كەلىپ، جاتتىعۋ جاساپ، اقىل-كەڭەسىن ايتىپ وتىرادى.

-كلۋبتىڭ قۇرىلعانىنا 27 جىل بولادى ەكەن. وسى ۋاقىتتا شاردارادان نەشە الەم چەمپيونى شىقتى؟

-107 الەم چەمپيونى شىقتى. الەم چەمپيوناتتارىنىڭ 106 جۇلدەگەرى دە شاردارا اۋدانىندا تۋىپ-وسكەن. 31 الەم كۋبوگىنىڭ، 75 ازيا كۋبوگىنىڭ يەگەرى، 327 ازيا چەمپيونى، قازاقستاننىڭ 500 چەمپيونى، حالىقارالىق تۋرنيرلەردىڭ 85 جەڭىمپازى دا بار. 75 ادام حالىقارالىق سپورت شەبەرى. 130 ادام سپورت شەبەرلىگىنە كانديدات بولىپ وتىر.

ءبىزدىڭ كلۋبتا قىزدار مەن ايەلدەر دە مەكتەپ وقۋشىلارى دا جاتتىعادى. بالالارعا ارنايى اۆتوبۋس قاراستىرىلعان. كلۋبتا سپورت تۇرلەرىمەن كۇنىنە ەكى مەزگىل جاتتىعادى. تۇستەن كەيىن جانە كەشكە جاتتىعۋلار بولادى.

-سوڭعى الەم چەمپيوناتىندا كلۋبتىڭ سپورتشىلارى نەشە مەدال الدى؟

-الەم چەمپيوناتىنا سوڭعى رەت بىلتىر قاتىسقانبىز. الماتىدا الەمدىك دودا بولعان. وندا ءبىزدىڭ كلۋبتىڭ سپورتشىلارى 28 التىن مەدال جەڭىپ الدى. ونىڭ ىشىندە جاسوسىرىمدەر مەن جاستار دا بولدى. 2022 جىلى تۇركيانىڭ انتاليا قالاسىندا جالاۋى جەلبىرەگەن الەم چەمپيوناتىنا دا قاتىستىق. انادولى ەلىندە 29 التىن جۇلدەنى جەڭىپ الدىق.

ءبىزدىڭ كلۋبقا الىس-جاقىن شەتەلدەن كەلىپ، تاجىريبە الماسىپ كەتەدى. مىسالى، شاردارا اۋدانىنا اقش-تان، حورۆاتيا، مالايزيا، لاتۆيا، فرانتسيا، وڭتۇستىك كورەيا، گرۋزيا، ۋكراينا، رەسەي ەلدەرىنەن سپورتشىلار مەن جاتتىقتىرۋشىلدار كوپتەپ كەلىپ ءجۇر.

-كلۋبتا جاتتىعىپ، الەم چەمپيونى اتانۋدىڭ قانداي سىرى بار؟ مۇمكىن، ءبىز بىلمەيتىن ءادىس-ءتاسىل بار شىعار؟

-ءيا، ءوزىمىز بىلەتىن مەتود، ياعني ءادىس-ءتاسىل بار. ونى كەزىندە ارمان اعايىمىز ويلاپ تاپقان. ءالى كۇنگە دەيىن سول ءادىس-تاسىلمەن دايىندالامىز. ارمان اعايىمىز بىزگە: «جاقسى چەمپيون بولۋدان بۇرىن، جاقسى ادام بولۋ مىندەت»، دەيدى. كلۋبتان چەمپيونداردىڭ كوپتەپ شىعۋىنىڭ باستى سەبەبى، بىزدە ءتارتىپ بار. ياعني، ديستسيپلينا، ءتارتىپ بولعان جەردە ادام الاڭسىز سۇيىكستى ىسىمەن اينالىسىپ، كوڭىلىن ەش جەرگە اۋلامايدى. جاتتىقتىرۋشىلار دا ادامنىڭ كوڭىلىن تاۋىپ، جاقسى دايىندايدى.

ماعجان شاميەۆتىڭ بىزگە بەرگەن شاعىن سۇحباتى وسى. ونىڭ ايتۋىنشا، قازىر ارمرەستلينگ شارادارا اۋدانىندا ەڭ تانىمال سپورت ءتۇرى. ونىمەن اينالىسقىسى كەلەتىندەر دە كۇن وتكەن سايىن كوبەيىپ كەلەدى. ونىڭ اراسىندا بالالار مەن جاسوسىپىرىمدەر دە بار.

قازىر ارمرەستلينگتەن قازاقستان قۇراماسىنىڭ تەڭ جارتىسىنان كوبى شاردارا اۋدانىنىڭ سپورتشىلارىنان جاساقتالعان. ولار جارىسقا بارعان سايىن مىندەتتى تۇردە جەڭىس تۇعىرىنان كورىنىپ كەلەدى.

 

اڭگىمەلەسكەن داستان كەنجالين،

استانا