«Shardara Armsport» shaǵyn klýbynan 107 álem chempıony shyqty (FOTO, VIDEO)

Bıyl Túrkistan oblysynyń Shardara aýdanyndaǵy «Shardara Armsport» klýbyna 26 jyl bolyp otyr. Bul klýbtyń negizin 1997 jyly aýdannyń qazirgi ákimi Arman Qarsybaev qalaǵan. Sodan beri klýbta armrestlıngpen aınalysatyn jergilikti turǵyndar Álem jáne Azııa chempıonattarynda el namysyn qorǵap, jeńistiń bıik tuǵyryna shyǵyp, elimizdiń ánuranyn shyrqatyp, kók baıraǵymyzdy kóterip keledi.

Búgin biz klýbtyń qazirgi tynysymen tanysý úshin «Shardara Armsport» ujymynyń pıar menedjeri, jattyqtyrýshysy ári sportshysy, qol kúresinen eki dúrkin álem chempıony Maǵjan Shamıevpen habarlasqanymyzda, ol qazir klýbta 500-den asa sportshy armrestlıngpen aınalysatynyn, onda 35 jattyqtyrýshynyń jumys isteıtinin aıtty.

Sonymen birge onyń aıtýynsha, klýbta qol kúresinen basqa sporttyń gir kóterý, dzıýdo, aýyr atletıka, karate, asyq atý, ıadro men naıza laqtyrý, taekvondo, boks, paýerlıftıng sport túrleri de bar.

-Qazir «Shardara Armsport» elimizdiń betkeustar klýbyna aınalyp,  eldiń  atyn aıdaı álemge tanytyp keledi. Bul klýbty aýdan ákimi Arman Qarsybaev ashqan eken. Ony ózińizden jańa ǵana estip, bildim. Qazir de aýdan ákimi klýbqa kelip, jattyǵa ma?

-Iá, Arman aǵaıymyz klýbqa kelip, jattyǵý jasap turady. О́ziniń aqyl-keńesin aıtyp, bizge jol kórsetip keledi.

Ulaǵatty ustazymyz Arman Romanuly 1997 jyly Shardada aýdanynda tuńǵysh osy sportty alyp kelgen bolatyn. Alǵashynda temir-tersekterden, shoıyn batareıalardan, DT traktorynyń dóńgelekterin qurastyryp, óz qorasynda jattyǵyp bastaǵan ustazymyzdy kórgen aýyl jastary qyzyǵyp, kóptep osy sportqa qatysa bastaǵan. Mine, qazirgi tańda sol qoradan bastalǵan jattyǵý zaly búkil álem tańdanyp qaraıtyn «Shardara Armsport» klýbyna aınaldy.

Ustazymyz qazir ózi jumys ýaqytynan keıin klýbqa kelip, jattyǵý jasap, aqyl-keńesin aıtyp otyrady.

-Klýbtyń qurylǵanyna 27 jyl bolady eken. Osy ýaqytta Shardaradan neshe álem chempıony shyqty?

-107 álem chempıony shyqty. Álem chempıonattarynyń 106 júldegeri de Shardara aýdanynda týyp-ósken. 31 Álem kýbogynyń, 75 Azııa kýbogynyń ıegeri, 327 Azııa chempıony, Qazaqstannyń 500 chempıony, halyqaralyq týrnırlerdiń 85 jeńimpazy da bar. 75 adam halyqaralyq sport sheberi. 130 adam sport sheberligine kandıdat bolyp otyr.

Bizdiń klýbta qyzdar men áıelder de mektep oqýshylary da jattyǵady. Balalarǵa arnaıy avtobýs qarastyrylǵan. Klýbta sport túrlerimen kúnine eki mezgil jattyǵady. Tústen keıin jáne keshke jattyǵýlar bolady.

-Sońǵy álem chempıonatynda klýbtyń sportshylary neshe medal aldy?

-Álem chempıonatyna sońǵy ret byltyr qatysqanbyz. Almatyda álemdik doda bolǵan. Onda bizdiń klýbtyń sportshylary 28 altyn medal jeńip aldy. Onyń ishinde jasósirimder men jastar da boldy. 2022 jyly Túrkııanyń Antalıa qalasynda jalaýy jelbiregen álem chempıonatyna da qatystyq. Anadoly elinde 29 altyn júldeni jeńip aldyq.

Bizdiń klýbqa alys-jaqyn shetelden kelip, tájirıbe almasyp ketedi. Mysaly, Shardara aýdanyna AQSh-tan, Horvatııa, Malaızııa, Latvııa, Franııa, Ońtústik Koreıa, Grýzııa, Ýkraına, Reseı elderinen sportshylar men jattyqtyrýshyldar kóptep kelip júr.

-Klýbta jattyǵyp, álem chempıony atanýdyń qandaı syry bar? Múmkin, biz bilmeıtin ádis-tásil bar shyǵar?

-Iá, ózimiz biletin metod, ıaǵnı ádis-tásil bar. Ony kezinde Arman aǵaıymyz oılap tapqan. Áli kúnge deıin sol ádis-tásilmen daıyndalamyz. Arman aǵaıymyz bizge: «Jaqsy chempıon bolýdan buryn, jaqsy adam bolý mindet», deıdi. Klýbtan chempıondardyń kóptep shyǵýynyń basty sebebi, bizde tártip bar. Iaǵnı, dısıplına, tártip bolǵan jerde adam alańsyz súıiksti isimen aınalysyp, kóńilin esh jerge aýlamaıdy. Jattyqtyrýshylar da adamnyń kóńilin taýyp, jaqsy daıyndaıdy.

Maǵjan Shamıevtiń bizge bergen shaǵyn suhbaty osy. Onyń aıtýynsha, qazir armrestlıng Sharadara aýdanynda eń tanymal sport túri. Onymen aınalysqysy keletinder de kún ótken saıyn kóbeıip keledi. Onyń arasynda balalar men jasósipirimder de bar.

Qazir armrestlıngten Qazaqstan quramasynyń teń jartysynan kóbi Shardara aýdanynyń sportshylarynan jasaqtalǵan. Olar jarysqa barǵan saıyn mindetti túrde jeńis tuǵyrynan kórinip keledi.

 

Áńgimelesken Dastan KENJALIN,

ASTANA