استانادا نەمىس قىزى بالالارعا اسىق ۇيرەتەدى

قازاقتىڭ ۇلتتىق ويىنى اسىق اتۋ مەن بەس اسىقپەن اينالىسىپ، جۇلدەگەرلەر قاتارىنان تابىلىپ جۇرگەن وزگە ۇلت وكىلدەرى ارامىزدا كوپتەپ سانالادى.اسىرەسە، اسىق اتۋ سپورتىمەن شۇعىلداناتىن وزگە ۇلت وكىلدەرى قوستاناي وبلىسىندا وتە كوپ. ولاردىڭ اراسىندا قازاقستان چەمپيوناتىنىڭ بىرنەشە دۇركىن كۇمىس جۇلدەگەرلەرى ميلانا يارمولەنكو، ەكاتەرينا تەسلەنكو، اناستاسيا تروفيموۆا سياقتى ورىس قىزدارىن، ۆيولەتتا مەلنيچەنكو، ۆارۆارا چۋماك، ۆاسيليسا ليحوپي سياقتى ۋكراين قىزدارىن، رايحان مۋستافينا دەگەن باشقۇرت قىزىن، ەكى مارتە قازاقستان چەمپيونى انجەلا پوليۆتسەۆا دەگەن ورىس قىزىن جانە باسقالارىن اتاپ وتۋگە بولادى. بۇلاردان بولەك قوستاناي وبلىسىنىڭ نامىسىن قورعاپ جۇرگەن بەلارۋس، وزبەك، ورىس ۇلتىنىڭ وكىلدەرى بارشىلىق.

سونىمەن قاتار استانا قالاسىنداعى «الاقاي» بالاباقشاسىنىڭ تاربيەشىسى، نەمىس قىزى ولەسيا پفافەنگۋت تا 13 جاسىنان بەرى بەس اسىقپەن اينالىسىپ، كوپتەگەن جەتىستىكتەردى باعىندىرىپ ۇلگىرىپتى. بۇگىن ولەسيا ەۆگەنيقىزىن مەرەكەمەن قۇتتىقتاپ، از-كەم تىلدەسىپ قايتتىق.

— ولەسيا بەس اسىقپەن قاي كەزدەن بەرى شۇعىلداناسىڭ؟

—  مەن اقمولا وبلىسى، تسەلينوگراد اۋدانى، مانشۇك اۋىلىندا تۋىپ-ءوستىم. مەكتەپ قابىرعاسىندا جۇرگەندە 13 جاسىمدا بەساسىقپەن شۇعىلدانا باستادىم. العاشقى باپكەرىم – دۇيسەنباي قوجامجار. ويىندى العاش كورگەندە بىردەن ۇنادى. قازىر بولاشاعىمدى اسىقسىز ەلەستەتە المايمىن.

— جەتكەن جەتىستەرىءڭدى ايتىپ بەرسەڭ؟

—  بەس اسىقپەن اينالىسىپ جۇرگەننەن بەرى ءبىراز جەتىستىككە جەتتىم. ونىڭ ىشىندە بىرنەشە رەت اقمولا وبلىسىنىڭ چەمپيونى جانە جۇلدەگەرى اتاندىم. استانا قالاسىنىڭ اشىق چەمپيوناتى مەن «قۇلاگەر» سپارتاكياداسىندا قولا جۇلدە السام، «استانا التىن ساقاسى» تۋرنيرىندە كۇمىسپەن كۇپتەلدىم. بەس اسىقتان سپورت شەبەرلىگىنە ۇمىتكەرمىن.

— ءالى اسىق وينايسىڭ عوي؟

— ارينە، بۇگىندە استانا قالاسىنا قونىس اۋدارىپ، وسى جەردەگى «الاقاي» بالاباقشاسىندا قىزمەت ەتەمىن. اسىقتان وتەتىن جارىستارعا ۇنەمى قاتىسامىن.

بالاباقشا بۇلدىرشىندەرىنە دە بار بىلگەنىمدى ۇيرەتىپ جۇرگەن جايىم بار. ماقساتىم – بەس اسىقتان قازاقستان چەمپيونى اتانىپ، حالىقارالىق جارىستاردا ەل نامىسىن قورعاۋ.

ءوزىم قازاق حالقىنىڭ ءداستۇرى مەن مادەنيەتىنە وڭ كوزقاراسپەن قارايمىن.  مەنىڭ اسىق اتۋ سپورتىنا كەلۋىمنىڭ ءوزى دە قازاق حالقىنا دەگەن قۇرمەتتەن تۋعان سەكىلدى. قازاقستان سەكىلدى تاماشا ەلدە تۇرىپ جاتقانىما ءوزىمدى باقىتتى سانايمىن. بۇگىنگى قازاقستان حالىقتارىنىڭ بىرلىگى كۇنى قۇتتى بولسىن! ەلىمىز امان، جۇرتىمىز تىنىش بولسىن!

— راحمەت، ولەسيا. ساعان دا مەرەكە قۇتتى بولسىن! ۇلتتىق ويىنىمىزدى دامىتۋعا ءوز ۇلەسىڭدى قوسا بەر.

اڭگىمەلەسكەن مۇساعالي تاسقاليەۆ،

استانا