Astanada nemis qyzy balalarǵa asyq úıretedi

Qazaqtyń ulttyq oıyny Asyq atý men bes asyqpen aınalysyp, júldegerler qatarynan tabylyp júrgen ózge ult ókilderi aramyzda kóptep sanalady.Ásirese, Asyq atý sportymen shuǵyldanatyn ózge ult ókilderi Qostanaı oblysynda óte kóp. Olardyń arasynda Qazaqstan chempıonatynyń birneshe dúrkin kúmis júldegerleri Mılana Iarmolenko, Ekaterına Teslenko, Anastasııa Trofımova sııaqty orys qyzdaryn, Vıoletta Melnıchenko, Varvara Chýmak, Vasılısa Lıhopıı sııaqty ýkraın qyzdaryn, Raıhan Mýstafına degen bashqurt qyzyn, eki márte Qazaqstan chempıony Anjela Polıveva degen orys qyzyn jáne basqalaryn atap ótýge bolady. Bulardan bólek Qostanaı oblysynyń namysyn qorǵap júrgen belarýs, ózbek, orys ultynyń ókilderi barshylyq.

Sonymen qatar Astana qalasyndaǵy «Alaqaı» balabaqshasynyń tárbıeshisi, nemis qyzy Olesıa Pfafengýt ta 13 jasynan beri bes asyqpen aınalysyp, kóptegen jetistikterdi baǵyndyryp úlgiripti. Búgin Olesıa Evgenııqyzyn merekemen quttyqtap, az-kem tildesip qaıttyq.

— Olesıa bes asyqpen qaı kezden beri shuǵyldanasyń?

—  Men Aqmola oblysy, elınograd aýdany, Mánshúk aýylynda týyp-óstim. Mektep qabyrǵasynda júrgende 13 jasymda besasyqpen shuǵyldana bastadym. Alǵashqy bapkerim – Dúısenbaı Qojamjar. Oıyndy alǵash kórgende birden unady. Qazir bolashaǵymdy asyqsyz elestete almaımyn.

— Jetken jetisterińdi aıtyp berseń?

—  Bes asyqpen aınalysyp júrgennen beri biraz jetistikke jettim. Onyń ishinde birneshe ret Aqmola oblysynyń chempıony jáne júldegeri atandym. Astana qalasynyń ashyq chempıonaty men «Qulager» Spartakıadasynda qola júlde alsam, «Astana altyn saqasy» týrnırinde kúmispen kúpteldim. Bes asyqtan sport sheberligine úmitkermin.

— Áli asyq oınaısyń ǵoı?

— Árıne, búginde Astana qalasyna qonys aýdaryp, osy jerdegi «Alaqaı» balabaqshasynda qyzmet etemin. Asyqtan ótetin jarystarǵa únemi qatysamyn.

Balabaqsha búldirshinderine de bar bilgenimdi úıretip júrgen jaıym bar. Maqsatym – bes asyqtan Qazaqstan chempıony atanyp, halyqaralyq jarystarda el namysyn qorǵaý.

О́zim qazaq halqynyń dástúri men mádenıetine oń kózqaraspen qaraımyn.  Meniń asyq atý sportyna kelýimniń ózi de qazaq halqyna degen qurmetten týǵan sekildi. Qazaqstan sekildi tamasha elde turyp jatqanyma ózimdi baqytty sanaımyn. Búgingi Qazaqstan halyqtarynyń birligi kúni qutty bolsyn! Elimiz aman, jurtymyz tynysh bolsyn!

— Rahmet, Olesıa. Saǵan da mereke qutty bolsyn! Ulttyq oıynymyzdy damytýǵa óz úlesińdi qosa ber.

Áńgimelesken Musaǵalı TASQALIEV,

ASTANA