SportPress.kz Qazaqstan sport jańalyqtary
Týrızm jáne sport mınıstri Ermek Marjyqpaev Qorǵanys mınıstrligi Armııa ortalyq sport klýby sport komıtetiniń ókilderin Otan qorǵaýshylar kúnimen quttyqtady, dep habarlady TSM-niń Baspasóz qyzmeti.
Saltanatty is-sharaǵa Qorǵanys mınıstrliginiń ókilderi, AOSK SK basshylyǵy, bokstan Olımpııalyq oıyndardyń qola júldegeri Sáken Bıbosynov, qazaq kúresinen «Ásker barysy» Erasyl Qajybaev, «Qazaqstan barysy» týrnıriniń jeńimpazy Ǵalymjan Qyryqbaı qatysty.
Mınıstr Armııa ortalyq sport klýby áskerı jumys pen halyqaralyq dárejedegi sportshylar daıarlaýdy qatar jolǵa qoıǵanyn atap ótti. Buǵan áskerı qyzmetshiler arasynan 9 sportshy Parıj Olımpıadasyna joldama jeńip alǵany dálel. Atap aıtqanda, boksshylar – Sáken Bıbosynov pen Mahmud Sabyrhan, taekvondoshylar – Somırhon Ababakırov pen Batyrhan Tileýǵalı, qazirgi bessaıys ókili Elena Potopenko, nysana kózdeýden Islam Sátbaev, grek-rım balýandary – Aıdos Sultanǵalı men Álimhan Syzdyqov jáne sporttyq gımnastıkadan Narıman Qurbanov Parıjde el namysyn qorǵaıdy.
Áskerı sportshylardyń negizgi jetistikteriniń kilti – dástúrdi saqtaı otyryp, árqashan óz-ózin damytyp júrgen jattyqtyrýshylar quramynyń eńbegi. Sizderdiń kásibıligińizdiń arqasynda bizdiń kóptegen sportshymyz kóshbasshyǵa aınalyp, kópke úlgi bolyp júr. Sonymen qatar sizderdiń sportqa degen adaldyq pen jeńiske degen umtylysyńyz sportshylardy shabyttandyryp, armııa qabyrǵasynda qalyptasqan rýhanı kúsh pen minezdiń beriktigi jeńiske jetý jolyndaǵy kez kelgen kedergini eńserýge múmkindik beredi, – dedi Ermek Marjyqpaev.
Sonymen qatar is-sharada AOSK SK ókilderi – Sáken Bıbosynov pen Erasyl Qajybaevqa ofıer ataǵy berildi.
