تەننيستەن قازاقستان قۇراماسى شيرەك فينالعا شىقتى

شىمكەنت قالاسىندا 16 جاسقا دەيىنگى جاسوسپىرىمدەر اراسىندا ءوتىپ جاتقان بيللي دجين كينگ كۋبوگىنىڭ ازيا — تىنىق مۇحيت ايماعى بويىنشا ىرىكتەۋ تۋرنيرىندە قازاقستان قۇراماسى مەرزىمىنەن بۇرىن شيرەك فينالعا شىقتى، دەپ حابارلادى قازاقستان تەننيس فەدەراتسياسى.

ا توبىندا ياروسلاۆا شۆەدوۆا جاتتىقتىراتىن جاسوسپىرىمدەر كومانداسى يندونەزيا قۇراماسىن 3:0 ەسەبىمەن جەڭدى.

الدىمەن ەۆا كورىشەۆا يندونەزيالىق ءناوميدى 6:0، 6:0 ەسەبىمەن جەڭسە، اريانا گوگۋلينا سينكلەردەن 6:4، 6:2 ەسەبىمەن باسىم ءتۇستى.

جۇپتىق سىندا اريانا گوگۋلينا البينا كاكەنوۆامەن بىرگە كومانداعا ءۇشىنشى ۇپايدى اكەلدى. ولار قارسىلاستارىن 6:0، 6:2 ەسەبىمەن جەڭدى.

ەندى ەرتەڭ قازاقستان قۇراماسى جاپونيامەن وينايدى. وسى ماتچتا قاي كوماندانىڭ ا توبىنان ءبىرىنشى ورىنمەن شيرەك فينالعا شىعاتىنى بەلگىلى بولادى.

جاپونيالىقتار دا قازاقستان سەكىلدى مەرزىمىنەن بۇرىن شيرەك فينالعا جولداما الدى.

ىرىكتەۋ تۋرنيرىندە جارتىلاي فينالعا شىققان ءتورت كوماندا الەم چەمپيوناتىنا بارادى.