ۆەلوترەكتەن ۇلتتىق قۇراما وليمپيادانىڭ ليتسەنزياسىن جەڭىپ الدى

قازاقستان قۇراماسى ۆەلوترەكتەن  وليمپيادانىڭ ءبىر جولداماسىنا يە بولدى.

بۇل ليتسەنزيا جەكە سپورتشىنىڭ وزىنە ەمەس، ۇلتتىق فەدەراتسياعا بەرىلەدى. ال وليمپياداعا قازاقستان اتىنان باراتىن سپورتشى كەيرين پەن سپرينت ديستسيپليناسىندا باق سىناي الادى.

قازىر قازاقستان كومانداسىنىڭ قورجىنىندا 51 ليتسەنزيا بار.

ۆەلوترەكتەن ۇلتتىق قۇرامانىڭ باس جاتتىقتىرۋشىسى يۆان سيۆاشتىڭ ايتۋىنشا، قازىر كوماندادا باسەكە ارتقان. وليمپياداعا كىمنىڭ باراتىنى انىق ەمەس.

كاناداداعى جارىستان سوڭ رەيتينگ شىعىپ، كۆوتا الا الماعانبىز. سوعان قاراماستان كەيىن جولداماسى بار، بىراق تىركەلگەن سپورتشىسى جوق ەلدەردىڭ ورنى قالعاندارىنا ۇلەستىرىلدى. ءبىز بۇل تىزىمدە ءبىرىنشى تۇرعانبىز. ەندى كەيرين باعدارلاماسىنداعى سپورتشىمىز سپرينتتە دە ونەر كورسەتەدى.

كەشە عانا كوماندا چەحياداعى تۋرنيردەن ورالدى. قالعان دايىندىقتىڭ باسىم بولىگىن استاناداعى ترەكتە وتكىزەمىز. ماۋسىمدا ەلورداداعى حالىقارالىق جارىستان كەيىن كورشى مەملەكەتتەردە ارنايى وقۋ-جاتتىعۋ جيىنى بولادى. وليمپياداعا از ۋاقىت قالعاندا تاۋلى جەردە دايىندىقتى ءبىر پىسىقتاپ الۋىمىز كەرەك. قازىر لايىقتى ورىن ىزدەستىرىپ جاتىرمىز، — دەدى ول تمس سپورتتى دامىتۋ ديرەكتسياسىنا بەرگەن سۇحباتىندا.

وسىدان كەيىن جاتتىقتىرۋشى وليمپياداعا باراتىن سپورتشى قاشان انىقتالاتىنىن ايتتى.

بىزدە بۇل ساناتتا وليمپياداعا قاتىسۋعا مۇمكىندىگى بار (رەيتينگتە جيناعان ۇپايى بار) ەكى ۆەلوسپورتشىنى ايتا الامىز. ولار: سەرگەي پونومارەۆ پەن اندرەي چۋگاي. قازىر ەكەۋى دە تۇراقتى ناتيجە كورسەتىپ ءجۇر. الدىڭعى ويىنداردا سەرگەي پونومارەۆپەن ءبىر دەڭگەيدە جارىساتىن سپورتشى بولمادى. ال وسى تسيكلدا اندرەي چۋگاي كورسەتكىش جاعىنان يىق تىرەستىرىپ كەلەدى.

قازىر پاريجگە كىمنىڭ باراتىنىن ناقتى ايتۋ قيىن. بىزدە ءبىر-بىرىنەن كەم تۇسپەيتىن ەكى سپورتشى بار. شەشىمدى ماۋسىمنىڭ ورتاسىندا قابىلدايمىز. وعان كەيىن اندرەي دە، سەرگەي دە دايىندىقتى توقتاتپايدى، — دەدى ول.

وليمپيادا كەزىندە ۆەلوترەكتەن جارىس 5-11 تامىز ارالىعىندا فرانتسيانىڭ ۇلتتىق ۆەلودرومىندا بولادى. كەشەن ەل استاناسى — پاريجدەن وڭتۇستىك-باتىسقا قاراي 25 شاقىرىم جەردەگى مونتيني-لە-برەتوننە كوممۋناسىندا ورنالاسقان.