Astanada Azııa chempıonatynyń jalaýy jelbireıdi

Astanada Teńge ilýden  jáne Aýdaryspaqtan  Azııa chempıonattaryn ótkizýge baılanysty baspasóz máslıhaty ótti. Oǵan Mádenıet jáne sport mınıstri Arystanbek Muhamedıuly men Qazaqstan Ulttyq sport túrleri qaýymdastyǵynyń prezıdenti, Májilis depýtaty Bekbolat Tileýhan qatysyp, Astanada 1-2 maýsymda ótetin Azııa chempıonattary týraly aıtyp, jýrnalısterdiń suraqtaryna jaýap berdi. 

Jıynda mınıstr men qaýymdastyq prezıdenti Azııa chempıonattary jaıly ǵana emes, jalpy ulttyq sport salasyndaǵy atqarylyp jatqan aýqymdy sharýalar týraly da aıtty. Arystanbek Muhamedıuly elimizdegi ulttyq sporttyń jaı-kúıin, aldaǵy halyqaralyq jarystar týraly aıta kelip, 2021 jyly ulttyq sport olımpıadasynyń Qazaqstanda ótkizilýi múmkin ekenin málimdedi. Al,   Ulttyq sport qaýymdastyǵynyń prezıdenti, Májilis depýtaty Bekbolat Tileýhan:

• Osy jyly sadaq atýdan álem chempıonaty ótedi. Buǵan búkil qurlyqtan, tipti Afrıkadan qatysýǵa nıet bildirip otyrǵan adamdar bar. Sodan keıin kókpardyń nasıhaty úshin «Juldyzdy kókpar» jarysyn uıymdastyramyz. Onda at ústinde oınaǵan ónerpazdar men sportshylar baq synaıdy. Mádenıet jáne sport mınıstrligi de jańa jobaǵa qoldaý bildirip otyr. Bul kókpardyń nasıhatyna úlken áseri bolatyn dúnıe. «Juldyzdy asyq» degen jobamyz da bar. Osylar arqyly biz ulttyq sportymyzdy nasıhattaýǵa múmkindik jasaımyz. Sonymen birge, mınıstrlik pen ulttyq sport qaýymdastyǵy josparlap otyrǵan jobalardyń biri –  «Altyn tulpar» alaman báıgesi. Buǵan baılanysty bir nárseni aıta ketsem, «Aq jol» partııasy ulttyq sportqa qaraı moıyn bura bastady. Alaman báıge qyrkúıektiń birinshi jeksenbisinde bolady. Mádenıet jáne sport mınıstrligi jobalarymyzǵa árdaıym qoldaý kórsetedi. «Samuryq-Qazyna» ál-aýqat qory men  «Samruk-Kazyna Trust» qory da kómektesemiz dep otyr, — dedi ol.

Sondaı-aq, Bekbolat Tileýhan kókpardan II álem chempıonatyn ótkizýge Túrkııa qyzyǵýshylyq tanytqanyn atap ótti. Onyń aıtýynsha, qazirgi kezde  naqty kelissózder júrgizilýde. Aýdaryspaq pen Teńge ilýden ótetin Azııa chempıonattaryna IýNESKO-nyń Dástúrli sporttar men oıyndar komıteti ókilderiniń qatysýy josparlanǵan. «IýNESKO ókilderi sharaǵa qatysatynyn rastady. Bizdiń ulttyq oıyndardan ótetin Azııa chempıonattaryna halyqaralyq uıym ókilderiniń nazar aýdarýy – etnosporttyń bolashaqta álemdik deńgeıge shyǵýyna múmkindik beredi. Bul rette Mádenıet jáne sport mınıstrligi ulttyq sportty órkendetý jónindegi bastamalarymyzǵa únemi qoldaý bildirip jatqanyn aıtqym keledi», –  dedi qaýymdastyq prezıdenti.

Bul chempıonattarǵa 9 elden (Qazaqstan, О́zbekstan, Qyrǵyzstan, Tájikstan, Mońǵolııa, Reseı, Aýǵanstan, Qytaı, Túrkııa) 54 sportshy, al jalpy jarysqa qatysatyn delegaııa múshelerin qosqanda, 100-ge tarta adam qatysady.

Teńge ilýden II Azııa jáne Aýdaryspaqtan III Azııa chempıonattarynyń jalpy júlde qory – 14 000 000 teńge. Jarystyń bas seriktesi – «Samuryq-Qazyna» ulttyq ál-aýqat qory.

Qazaqstan ulttyq sport túrleri qaýymdastyǵy