SportPress.kz قازاقستان سپورت جاڭالىقتارى
تۋريزم جانە سپورت ءمينيسترى ەرمەك مارجىقپاەۆ شىۇ-عا مۇشە مەملەكەتتەردىڭ سپورت مينيسترلەرىنىڭ كەڭەسى اياسىندا قىتايدىڭ دەنە شىنىقتىرۋ جانە سپورت جونىندەگى باس مەملەكەتتىك باسقارما باسشىسى گاو چجيدانمەن كەزدەسىپ، ەكىجاقتى كەلىسسوز جۇرگىزدى، دەپ حابارلادى ۆەدومستۆو.
ەرمەك مارجىقپاەۆ ەڭ الدىمەن قىتاي تاراپىنا حانچجوۋداعى ازيا ويىندارىن لايىقتى دەڭگەيدە ۇيىمداستىرعانى ءۇشىن العىسىن ءبىلدىردى.
2023-2024 جىلدارى قىتايدا ەل سپورتشىلارى ەسكەك ەسۋ، بوكس، مانەرلەپ سىرعاناۋ، تاەكۆوندو جانە وزگە دە سپورت تۇرلەرى بويىنشا جاتتىعۋ جيىندارىن وتكىزدى. اڭگىمە كەزىندە مينيستر قىتاي سپورتشىلارىن الماتى وبلىسىنداعى وليمپيادالىق دايارلىق ورتالىعىنىڭ بازاسىندا وقۋ-جاتتىعۋ جيىندارىن وتكىزۋگە شاقىردى.
سپورت ۆەدومستۆولارىنىڭ باسشىلارى قازاقستان مەن قىتاي اراسىنداعى سپورتتى دامىتۋ سالاسىنداعى ىنتىماقتاستىقتى ودان ءارى كۇشەيتۋدى، ونىڭ ىشىندە 2025 جىلعى قىسقى ازيا ويىندارىنا قاتىسۋ ماسەلەلەرىن تالقىلادى.
قىتاي حالىق رەسپۋبليكاسى كوپتەگەن سپورت تۇرىندە تۇراقتى تۇردە جاقسى ناتيجە كورسەتىپ كەلەدى. بۇل – جوعارى دارەجەلى سپورتشىلاردى دايارلاۋدىڭ ساپالى جانە جان-جاقتى جۇيەسىن كورسەتەدى. ءبىز تاجىريبە الماسۋ ارقىلى سپورتتىق مەديتسينا سالاسىنداعى ىنتىماقتاستىققا مۇددەلىمىز. قىتايدىڭ ازيادا مەن وليمپيالىق ويىندار سياقتى ءىرى كەشەندى ءىس-شارالاردى ۇيىمداستىرىپ، وتكىزۋدەگى، اسىرەسە لوگيستيكا ماسەلەلەرىندەگى وڭ تاجىريبەسىن ەرەكشە اتاپ وتكەن ءجون. وسىلايشا ۆەدومستۆو اراسىنداعى قارىم-قاتىناستى نىعايتىپ، تەرەڭدەتۋگە بىرنەشە باعىت بار، — دەدى ەرمەك مارجىقپاەۆ.
سونىمەن قاتار ۆەدومستۆو باسشىسى كەزدەسۋدە قىتاي دەلەگاتسياسىن بيىلعى قىركۇيەك ايىندا استانادا وتەتىن V دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنا قاتىسۋعا شاقىردى.
