قازاقستان مەن بەلارۋس دەنە شىنىقتىرۋ مەن سپورت سالاسىنداعى كەلىسىمگە كەلدى

شىۇ-عا مۇشە مەملەكەتتەردىڭ سپورت مينيسترلەرى كەڭەسى اياسىندا تۋريزم جانە سپورت ءمينيسترى ەرمەك مارجىقپاەۆ بەلارۋس رەسپۋبليكاسىنىڭ سپورت جانە تۋريزم ءمينيسترى سەرگەي كوۆالچۋكپەن ەكىجاقتى كەلىسسوز وتكىزدى، دەپ حابارلادى تۋريزم جانە سپورت مينيسترلىگى.

ۆەدومستۆو باسشىلارى ەكى ەل اراسىنداعى ارىپتەستىكتى ودان ءارى دامىتۋدىڭ ماڭىزدى ماسەلەلەرىن تالقىلادى. قازاقستان مەن بەلارۋس اراسىنداعى ىنتىماقتاستىق ەكونوميكانىڭ نەگىزگى سالالارىندا جان-جاقتى دامىپ كەلەدى.

ەكىجاقتى بايلانىستار تاۋەلسىز مەملەكەتتەر دوستاستىعى جانە ەۋرازيالىق ەكونوميكالىق وداق سياقتى حالىقارالىق ۇيىم اياسىندا دا جەمىستى جالعاسۋدا.

كەزدەسۋدە ەكى ەل مينيسترلەرى 2024-2028 جىلدارعا ارنالعان دەنە شىنىقتىرۋ جانە سپورت سالاسىنداعى ىنتىماقتاستىق باعدارلاماسىنا قول قويدى.

ەڭ الدىمەن سىزدەردى قازاقستان قۇراماسى سپورتتىڭ 14 تۇرىنەن قاتىسقان II تمد ەلدەرىنىڭ ويىندارىن ءساتتى وتكىزگەندەرىڭىزبەن قۇتتىقتايمىن! مۇنداي سپورتتىق جارىستار سپورتشىلاردىڭ رۋحىن نىعايتۋعا ىقپال ەتەتىنىنە سەنىمدىمىن. سونىمەن قاتار ءبىز بەلارۋس سپورتشىلارىن قازاقستان اۋماعىنداعى حالىقارالىق جارىستاردا كورگەنىمىزگە قۋانىشتىمىز.

2023-2024 جىلدارى ءسىزدىڭ ەلدىڭ سپورتشىلارى جەڭىل اتلەتيكا، كاراتە، ساداق اتۋ، شايبالى حوككەي، ۇستەل تەننيسى، وق اتۋ جانە باسقا دا جارىستاردا باق سىنادى.

بيىلعى قىركۇيەك ايىندا استانادا 5-ءشى دۇنيەجۇزىلىك كوشپەندىلەر ويىندارى بولادى. بەلارۋس سپورتشىلارىنىڭ شەبەرلىگى مەن دايىندىعىن ەسكەرە وتىرىپ، ويىنداردا ولاردان جوعارى ناتيجە كۇتەمىز، — دەدى ەرمەك مارجىقپاەۆ.

سونىمەن قاتار كەزدەسۋدە ۆەدومستۆو باسشىلارى ەكى ەلدىڭ تۋريستىك سالاسىن دامىتۋ ماسەلەلەرىن تالقىلادى. ەرمەك مارجىقپاەۆ 2023 جىلى قازاقستانعا بەلارۋس رەسپۋبليكاسىنان كەلگەن تۋريستەر سانى 2022 جىلمەن سالىستىرعاندا 1،5 ەسە ارتقانىن اتاپ ءوتتى.

تۋريزم جانە سپورت ءمينيسترى ۇلتتىق پاركتەردە ەكوتۋريزمدى، اگرو، مەديتسينالىق جانە بالالار ءتۋريزمىن دامىتۋدا تاجىريبە الماسۋدى ۇسىندى. سونداي-اق قازاقستان مەن بەلارۋس تاۋ كۋرورتتارىندا بىرىڭعاي بىرلەسكەن «سكي-پاسسالاردى» ەنگىزۋ يدەياسى ايتىلدى.