«Qazaq kúresiniń qara narlary» jastarǵa tanystyryldy

Kózi qaraqty oqyrman jaqsy bilýge tıis, osy jyldyń sáýir aıynda Abaı atyndaǵy Qazaq ulttyq pedagogıkalyq ýnıversıtetinde zııaly qaýym ókilderiniń qatysýymen belgili sport jýrnalısi, Qazaqstan Jýrnalıster odaǵynyń múshesi, Seıdahmet Berdiqulov atyndaǵy syılyqtyń ıegeri, Jeltoqsan batyry Aqyn Ordabaıulynyń «Qazaq kúresiniń qara narlary» atty kitabynyń tusaýkeseri ótkizilgen bolatyn.

Ǵıbratty bólek, tálimi mol is-shara qazaq kúresiniń rýhyn asqaqtatyp, mártebesin taǵy bir márte bıiktetkeni sózsiz edi. Aqyn Ordabaıulynyń súbeli eńbegi, jarqyn týyndysy kúlli qazaq oqyrmandaryna jol tartyp, bilikti mamandar tarapynan joǵary baǵaǵa ıe bolyp jatqany da aıta keterlik dúnıe.

Keshe osy ónegeli is-shara Almaty qalasyndaǵy Jambyl atyndaǵy jasóspirimder kitaphanasynda da jalǵasyn taýyp, qazaq kúresiniń arǵy-bergi tarıhynan syr shertken qazynaly eńbek jas oqyrmandarǵa tanystyrylyp, mán-mańyzy jaıynda salıqaly áńgime órbidi.

Aqyn Ordabaıuly óz sózinde tól týyndysynyń jazylý tarıhyna jan-jaqty toqtalyp, paıymdy pikirlerin ortaǵa saldy. Aıtýynsha, «Qazaq kúresiniń qara narlary» kitaby jıyrma jyldyq izdenistiń nátıjesinde ómirge kelgen eken. Sonaý saq, ǵun dáýirlerin tartyp qazaq kúresiniń barlyq tarıhı kezeńderi baıan etilgenin, sondaı-aq qazaq kúresiniń jıyrma bir bapkeriniń eńbegi zerdelengenin tilge tıek etti. Oqyrmanǵa jol tartqan týyndysy qazaq kúresiniń tarıhyna, búgini men erteńine qyzyǵýshylyq tanytatyn jastar úshin paıdaly bolaryna senim bildirdi.

Is-sharaǵa qatysqan Qazaqstan Respýblıkasynyń eńbek sińirgen jattyqtyrýshy, dúnıejúzilik «Qazaq kúresi» federaııasynyń tuńǵysh prezıdenti, professor Erǵalı Muhıtdınov, PQ «Jeltoqsan aqıqaty» qoǵamdyq birlestiginiń tóraǵasy Bolat Qurymbaev, «Aqıqat» ulttyq qoǵamdyq-saıası jýrnalynyń bas redaktory Dáýirjan Tólebaev, Jambyl atyndaǵy jasóspirimder kitaphanasynyń dırektory Baný Dáýletbaeva kitaptyń tusaýkeser rásimin ótkizip, súbeli eńbek jaıynda oı-pikirlerin ortaǵa salyp, jyly lebizderin bildirdi. Qazynaly dúnıeniń ult rýhanııatynda alatyn orny jaıynda sóz qozǵap, ulttyq qundylyqty dáripteý, ata-baba muralaryn saqtaý, qazaq kúresiniń shejiresin tanyp bilýge qatysty mańyzdy tustardy atap ótti. Is-sharany ádebıettanýshy ǵalym, jazýshy Álibek Baıbol júrgizdi.

Joǵaryda atap ótkenimizdeı, «Qazaq kúresiniń qara narlary» – tolaǵaı izdenistiń, qajyrly eńbektiń nátıjesinde ómirge kelgen. Endeshe qazynaly eńbektiń qazaq kúresiniń aldaǵy ýaqytta da qanat jaıyp damýyna, órkendep, ósýine septigi tıe bersin degen aqjarma tilegimizdi bildiremiz.

D. JUMAJANULY,

ALMATY