گولوۆكين حوك كوميسسياسىنىڭ قۇرامىنا كىردى

ۇلتتىق وليمپيادا كوميتەتىنىڭ پرەزيدەنتى گەننادي گولوۆكين حالىقارالىق وليمپيادا كوميتەتى Olympism 365 كوميسياسىنىڭ مۇشەسى بولىپ تاعايىندالدى، دەپ حابارلادى Olympic.kz.

بۇل تۋرالى حوك پرەزيدەنتى توماس باح قازاقستان ۇوك-كە رەسمي حات جازىپ، حاباردار ەتتى.

ءسىزدى كوميسسيا مۇشەسى ەتىپ تاعايىنداۋ مەن ءۇشىن ۇلكەن مارتەبە. سىزگە كوميسسيا جۇمىسىنا قوساتىن ۇلكەن ۇلەسىڭىز ءۇشىن الدىن الا العىس بىلدىرەمىن، – دەلىنگەن حاتتا.

كوميسسيالاردى حوك پرەزيدەنتى توماس باح جاساقتايدى. بۇل كوميسسيا – حوك-تىڭ قىزمەتىن ۇيلەستىرىپ، ستراتەگيالارىن جاساپ، ناقتى ءبىر شەشىم قابىلداۋ ءۇشىن ۇيىمنىڭ اتقارۋ كوميتەتى مەن جۇمىس سەسسيالارىنا ۇسىنىستار ەنگىزەتىن كوميتەتتىڭ جۇمىس ورگانى.

Olympism 365 ستراتەگياسى سەرىكتەستەرمەن ارىپتەستىك ورناتۋىمەن اينالىسادى.

جوبانىڭ باسىم باعىتى – حالىقتىڭ دەنساۋلىعىن جاقسارتىپ، سالاماتتى ءومىر سالتىن قالىپتاستىرۋ، دەنە شىنىقتىرۋدى ناسيحاتتاۋ، ادىلەتتىلىك، قاۋىپسىزدىك جانە ينكليۋزيۆتىلىك قاعيداتتارىن نىعايتۋ، بەيبىتشىلىكتى ساقتاۋ مەن ءبىلىم بەرۋ.

كوميسسيا قۇرامىنا حوك مۇشەلەرى، وليمپيالىق قوزعالىستاعى  تانىمال سپورت فۋنكتسيونەرلەرى،  سونداي-اق، يوردانيانىڭ تاق مۇراگەرى، حانزادا فەيزال ءال حۋسسەين، حالىقارالىق جەڭىل اتلەتيكا  فەدەراتسياسىنىڭ پرەزيدەنتى سەباستيان كوە، كاتار ۇوك پرەزيدەنتى، شەيح دجوان بين حاماد بين حاليفا ءال تاني، بەلگىلى سپورت قايراتكەرلەرى مەن تانىمال وليمپياداشىلار بار.