SportPress.kz قازاقستان سپورت جاڭالىقتارى
قازاقستان كوركەم گيمناستيكا فەدەراتسياسىنىڭ پرەزيدەنتى ءاليا يۋسۋپوۆا حالىقارالىق دارەجەدەگى اتاققا يە بولدى، دەپ حابارلادى olympic.kz.
30-31 مامىردا قىتايدىڭ شانحاي قالاسىندا وتكەن حالىقارالىق گيمناستيكا فەدەراتسياسى (FIG) اتقارۋشى كوميتەتىنىڭ وتىرىسىندا ءاليا يۋسۋپوۆاعا «قۇرمەتتى جاتتىقتىرۋشى» اتاعى بەرىلدى.
ءاليا يۋسۋپوۆا وتاندىق گيمناستيكا فەدەراتسياسىنىڭ باسشىسى قىزمەتىنەن بولەك، كوركەم گيمناستيادان ۇلتتىق قۇرامانىڭ باس جاتتىقتىرۋشىسى قىزمەتىن اتقارادى.
ونىڭ شاكىرتتەرى تۇراقتى تۇردە وليمپيالىق ويىندارعا قاتىسىپ كەلەدى. پاريج وليمپياداسىندا ەلجاڭا تانيەۆا كوركەم گيمناستيكادان ەل نامىسىن قورعايدى.
ءاليا ماقسۇتقىزى — قازاقستان نامىسىن وليمپيادادا ابىرويمەن قورعاعان العاشقى گيمناسشى. ول 2004 جىلعى افينا وليمپياداسىندا ءتورتىنشى، 2008 جىلعى بەيجىڭ وليمپياداسىندا بەسىنشى ورىن العان.
ودان باسقا، ول — ازيا ويىندارىنىڭ جەڭىمپازى، ازيانىڭ ءابسوليۋتتى چەمپيونى.
