Búgin fýtboldan Qazaqstan men Ázerbaıjan quramalary oınaıdy

Búgin Majarstannyń Sombatheı qalasyndaǵy «Haladash» stadıonynda fýtboldan Qazaqstan men Ázerbaıjan elderiniń ulttyq quramalarynyń joldastyq matchy bolady.

Oıyn saǵat 21:00-den bastap Qazsport telearnasynan tikeleı efırde kórsetiledi.

Osy kezge deıin ulttyq qurama komandalar bir-birimen segiz ret oınaǵan. Onyń ekeýinde Ázerbaıjan jeńiske jetse, tórteýinde Qazaqstan quramasy basym tústi. Eki oıyn teń nátıjemen aıaqtalǵan.

FIFA reıtınginde Qazaqstan 100-orynda tursa, Ázerbaıjan 113-orynda keledi.

Bul oıynda Qazaqstan quramasy bas jattyqtyrýshynyń mindetin Rýslan Baltıev atqarady. Ulttyq quramaǵa jańa taǵaıyndalǵan bas jattyqtyrýshy Stanıslav Cherchesov osy oıynnan keıin komandanyń tizginin óz qolyna alady.

О́tken aptada Qazaqstan quramasy Erevanda Armenııa quramasynan 1:2 esebimen jeńilgen bolatyn.

Dastan KENJALIN,

ASTANA