قوش بول، حامزە باۋىرىم!

ءومىر دەگەن قامشىنىڭ سابىنداي قىسقا دەگەنگە ادامنىڭ كوزى جەتپەي ءاي سەنە قويماس. «تاس تۇسكەن جەرىنە اۋىر»، — دەگەن عوي بابالارىمىز، ءبىز ەت جاقىن، كوز كورگەن قۇرمەتپەن ارالاساتىن دوستارىمىزدان ايرىلىپ قالعاندا بارىپ اھ ۇرىپ قالامىز.

بۇگىن جەر قوينىنا جانىمىزعا جارىق بەرىپ، ارالاسىپ جۇرگەن ارداقتى دوس، قايىرىمدى ءارى سابىرلى جان، تۇعىرلى تۇلعا، فۋتبول شەبەرى، ايالۋى ازامات حامزە باقىت ۇلى باۋىرىمىزدى جەر قوينىنا تاپسىردىق.

حامزە 50 جاستان اسقان ارداگەرلەر اراسىندا قالا بىرىنشىلىگىندە دوپ دوداسىندا ونەر كورەستۋشى ەدى. كورسەتكەندە قانداي، كومانداسىنىڭ كوشباسشى شەبەرلىگى جوعارى ويىنشىسى ەدى.

مەن حامزەمەن تالاي رەت ۇلكەن جارىستار مەن كىشىگىرىم تالاسقا تولى شاعىن تۋرنيرلەردە بىرىگىپ، ءبىر كوماندادا دوپ تەپكەن سەرىكتەسى ەدىم. حامزەنىڭ ادامگەرشىلىگى، كىسىلىگى، كىشىلىگى تۋرالى ايتىپ ايىل جيا الماسپىز.

كەشە سول العاشقى تايمدا الاڭدا جۇرەگى قىسىلىپ شەتكە شىعىپ وتىرعان جەردە باقيلىق دۇنيەگە كەتە بارعان ەكەن. قاپىدا كەلگەن قازا دەگەن وسى. بارىمىزگە اللانىڭ ولشەپ بەرگەن ءومىرى بار عوي.فۋتبول دەسە ىشكەن اسىن جەرگە قوياتىن اسىل دوسىمىزدىڭ ءومىرى دە سول فۋتبول الاڭىندا ۇزىلگەن ەكەن.

باۋىرىمىزدىڭ سوڭعى ساعاتى سوعىپ، كەلمەستىڭ كەمەسىنە ءمىنىپ كەتە باردى. الماتىنىڭ «ماياك» اتتى شاعىن اۋدانىنداعى زيراتقا دەنەسى قويىلدى. مارقۇمنىڭ قايعىسىنا ورتاق بولىپ كەلگەن حالىقتا ەسەپ بولمادى. اللا باۋىرىمىزدى راحىمىنا الىپ، جانىن جانناتتان قىلسىن دەپ دۇعا تىلەيمىز. اللا ءساتىن سالسا جان دوسىمىزدىڭ ارۋاعىنا ارناپ بولاشاقتا فۋتبولدان قالالىق جارىس وتكىزىپ، ارتىنان قۇران وقىپ دۇعا باعىشتاساق ارۋاعى رازى بولار ەدى. ءيا، ول الداعى كۇننىڭ ۇلەسىندە شىعار.

PS.

ءبىر-ءبىرىمىزدى كوزىمىز ءتىرى كەزدە سىيلار، قۇرمەتتەپ، ارالاسىپ، حابارلاسىپ تۇرساق ودان ارتقان بۇل فانيدە نە بار دەپ ويلايمىن.

ەرتەڭ ايىرىلىپ قالعان كەزدە قاپ مەن كەشە حابارلاسپاعانىم-اي، دەپ وكىنىش وزەگىمىزدى ورتەپ قايعىعا قامالىپ قالماساق بولعانى. اماندىقتى ءبىلىپ تۇرايىق اعايىن-تۋىس، دوس، باتىرلار!.

اقىن ورداباي ۇلى،

الماتى