توقاەۆ شاحماتتان الەم چەمپيونى قازىبەك نوگەربەكتى قۇتتىقتادى

مەملەكەت باسشىسى قاسىم-جومارت توقاەۆ شاحماتتان جاستار اراسىنداعى الەم چەمپيونى قازىبەك نوگەربەكتى قۇتتىقتادى، دەپ حابارلادى اقوردا.

پرەزيدەنت قاسىم-جومارت توقاەۆ ءۇندىستاننىڭ گانديناگار قالاسىندا وتكەن الەم چەمپيوناتىندا قۇرمەت تۇعىرىنىڭ ەڭ بيىك ساتىسىنا كوتەرىلگەن قازىبەك نوگەربەككە قۇتتىقتاۋ جەدەلحاتىن جولدادى.

ەل نامىسىن قورعاپ، ۇزدىك شاحماتشى رەتىندە گروسسمەيستەر دارەجەسىن يەلەنىپ، الەم چەمپيونى اتانۋ – زور جەتىستىك. ۇلتىمىزدىڭ ابىرويىن اسقاقتاتاتىن ءوزىڭ سياقتى العىر دا اقىلدى ۇرپاقتىڭ ءوسىپ كەلە جاتقانى قۋانتادى. الداعى ۋاقىتتا دا جارقىن جەڭىستەرگە جانە ارمان-ماقساتتارىڭا جەتە بەرۋىڭە تىلەكتەسپىن، – دەلىنگەن جەدەلحاتتا.

قازىبەك نوگەربەك ءۇندىستاننىڭ گانديناگار قالاسىندا وتكەن 20 جاسقا دەيىنگى شاحماتشىلار اراسىنداعى الەم چەمپيوناتىندا كلاسسيكالىق شاحماتتان 11 تۋردان كەيىن 8،5 ۇپاي جينادى.

قازىر قازىبەك نوگەربەكتىڭ FIDE-دەگى رەيتينگى – 2501.

نوگەربەك يننوۆاتسيالىق ءبىلىم بەرۋ باعدارلاماسىندا شاحماتتان پەداگوگ-جاتتىقتىرۋشى ماماندىعى بويىنشا وقيدى. بۇل جەڭىس شاحماتشىعا التىن مەدال عانا ەمەس، الەم كۋبوگىنا جولداما دا الىپ بەردى.