«ورداباسى» كلۋبىنىڭ باس جاتتىقتىرۋشىسى قىزمەتىنەن كەتتى

شىمكەنتتىڭ «ورداباسى» فۋتبول كلۋبىنىڭ باس جاتتىقتىرۋشىسى الەكساندر سەدنەۆ قىزمەتىنەن بوساتىلدى. بۇل تۋرالى rast.kz حابارلادى.

بەلارۋس مامانى الەكساندر سەدنەۆ «ورداباسىعا» 2021 جىلى قاڭتار ايىندا باس جاتتىقتىرۋشى بولىپ كەلدى. سول جىلى كوماندا قازاقستان پرەمەر-ليگاسىندا 5-ورىن الدى. ول 2022 جىلدىڭ اقپان ايىندا كلۋبتا قارجى پروبلەماسى تۋىپ جاتقانى جايلى اقپار تاراعانىنا قاراماستان، كەلىسىمشارتىن جالعاستىردى. كوماندا بۇدان كەيىن، سول 2022 جىلى قازاقستان كۋبوگىن جەڭىپ السا، 2023 جىلى چەمپيون اتاندى.

وسى ءۇش جىلدىڭ مۇعدارىندا الەكساندر سەدنەۆ كوماندا فۋتبولشىلارىن 129 ماتچتا الاڭعا باستاپ شىقتى. ونىڭ 63 ويىنىندا جەڭىسكە جەتىپ، 28 تەڭ ويىن تىركەلدى. 38 رەت جەڭىلىس تاپتى.

الايدا «ورداباسى» بيىلعى جىلى ەۋروپا چەمپيوندار ليگاسىنىڭ ويىندارىن وتە ءساتسىز وتكىزدى. كوماندا بيۋدجەتى مەن ترانسفەرلىك قارجىسى وزىنەن بىرنەشە ەسە از ەكى كوماندادان جەڭىلىپ، جارىس جولىنان شىعىپ قالدى. كوۋچتىڭ وتستاۆكاعا كەتۋىنە وسى ساتسىزدىكتەر سەبەپ بولعان سياقتى.

الەكساندر سەدنەۆ 20 تامىز كۇنى قورىتىندى ءباسپاسوز ءماسليحاتىن وتكىزىپ، جانكۇيەرلەردىڭ سۇراقتارىنا جاۋاپ بەردى.

ول ءوز سوزىندە كوماندا باسشىلارى مەن جانكۇيەرلەرگە العىس سەزىمىن ءبىلدىردى، وزىنە قازاقستاننىڭ قاتتى ۇنايتىنىن ايتتى.

ايتقانداي، سەدنەۆ 2018-2019 جىلدارى «اقتوبە» كومانداسىنىڭ دا تىزگىنىن ۇستاعان بولاتىن.