«Ordabasy» klýbynyń bas jattyqtyrýshysy qyzmetinen ketti

Shymkenttiń «Ordabasy» fýtbol klýbynyń bas jattyqtyrýshysy Aleksandr Sednev qyzmetinen bosatyldy. Bul týraly rast.kz habarlady.

Belarýs mamany Aleksandr Sednev «Ordabasyǵa» 2021 jyly qańtar aıynda bas jattyqtyrýshy bolyp keldi. Sol jyly komanda Qazaqstan premer-lıgasynda 5-oryn aldy. Ol 2022 jyldyń aqpan aıynda klýbta qarjy problemasy týyp jatqany jaıly aqpar taraǵanyna qaramastan, kelisimshartyn jalǵastyrdy. Komanda budan keıin, sol 2022 jyly Qazaqstan Kýbogyn jeńip alsa, 2023 jyly chempıon atandy.

Osy úsh jyldyń muǵdarynda Aleksandr Sednev komanda fýtbolshylaryn 129 matchta alańǵa bastap shyqty. Onyń 63 oıynynda jeńiske jetip, 28 teń oıyn tirkeldi. 38 ret jeńilis tapty.

Alaıda «Ordabasy» bıylǵy jyly Eýropa Chempıondar lıgasynyń oıyndaryn óte sátsiz ótkizdi. Komanda bıýdjeti men transferlik qarjysy ózinen birneshe ese az eki komandadan jeńilip, jarys jolynan shyǵyp qaldy. Koýchtyń otstavkaǵa ketýine osy sátsizdikter sebep bolǵan sııaqty.

Aleksandr Sednev 20 tamyz kúni qorytyndy baspasóz máslıhatyn ótkizip, jankúıerlerdiń suraqtaryna jaýap berdi.

Ol óz sózinde komanda basshylary men jankúıerlerge alǵys sezimin bildirdi, ózine Qazaqstannyń qatty unaıtynyn aıtty.

Aıtqandaı, Sednev 2018-2019 jyldary «Aqtóbe» komandasynyń da tizginin ustaǵan bolatyn.