سالاۋاتتى ءومىر سالتىن ۇستانعان يمامدار

نەگىزى سالاۋاتتى ءومىر سالتىن ۇستاۋدى سوناۋ مۇحاممەد پايعامباردىڭ داۋىرىنەن باستاۋ العان دەسەك ورىندى بولار. مۇحاممەد پايعامدار حاديستە سالاۋاتتىلىق جايلى «نايزا لاقتىرىپ، اتقا شاپ، سۋعا ءجۇزىپ، ساداق اتۋدى ۇيرەنىڭدەر»، دەگەن ەكەن. سول بۇگىنگى زامانىمىزدى دا ماڭىزدىلعىن جوعالتقان جوق. ايتىلعان دۋالى ءسوز بۇگىنگى تىلمەن ايتقاندا سپورتپەن اينالىسۋعا اكەلىپ تىرەيدى. سپورت ول دەنساۋلىق كەپىلى.

ەندەشە، بۇگىنگى الماتى وبلىسى يمامدارىنىڭ باس قوسىپ ۆولەيبولدان وتكىزگەن ءدۇبىرلى جارىسى سول ايتىلعان سوزىمىزگە ناقتى دالەل شىعار. بۇل جارىس ىلە اۋدانى وتەگەن كەنتىندەگى بالالار مەن جاسوپىرىمدەر سپورت مەكتەبىنىڭ شاڭىراعىندا جالاۋىن كوتەردى.

جارىستىڭ سالتاناتتى اشىلۋىنا اۋىر اتلەتيكادان الەم چەمپيونى جاسۇلان قىدىرباەۆ، الماتى وبلىسىنىڭ باس يمامى ماديار پىرىمقۇلوۆ پەن بالالار مەن جاسوسپىرىمدەر سپورت مەكتەبىنىڭ ديرەكتورى قاپار راۋانوۆ قاتىسىپ، قاتىسۋشىلارعا جاراقاتسىز جەڭىس تىلەدى.

بۇل جارىستى قمدب الماتى وبلىسى وكىلدىگىنىڭ ۇيىمداستىرعانداعى نەگىزگى ماقساتى، يمامداردىڭ سالاۋاتتى ءومىر سالتىن بەرىك ۇستاپ، حالىققا ۇلگى كورسەتۋ. مەشىتتەردە جاماعاتقا ىزگىلىك، مەيرىمدىلىك، قايىرىمدىلىق سەكىلدى ادام بويىنداعى جاقسى قاسيەتتەر تۋرالى ۋاعىز ايتىپ جۇرەتىن يمامدارىمىز سپورتتا دا قۇر جاياۋ ەمەس ەكەندىكتەر ويىن الاڭىندا بارىنشا كورسەتتى. تاڭازاننان باستالعان جارىس كۇن ۇياسىنا باتقاندا بارىپ ءبىر اياقتالىپ، جۇلدەگەرلەر مەن جەڭىمپازدار ۇيىمداستىرۋشىلاردىڭ دايىنداعان ماراپاتتارىنا يە بولدى. بۇل تۋرنير وسىمەن ەكى جىل قاتارىنان ءوتىپ وتىر ەكەن. سوندىقتاندا يمامداردىڭ شەبەرلىكتەرى تولىسا ءتۇسىپ، بەينەبىر كاسىبي ويىنشىلار سەكىلدى جانكەشتىلىكپەن كورسەتكەن ويىن ورنەكتەرىنە جانكۇيرەلەر ەرەكشە قولداۋ كورسەتىپ وتىردى.

نەگىزى، الماتى وبلىسى يمامدار مۇحتياتى جاز ايىندا شاعىن فۋتبولدان  ۇلكەن جارىس  ۇيىمداستىرسا، ەندى مىنە، ۆولەيبولدان ءدۇبىرلى ءتۋرنيردىڭ توماعاسىن ءتۇرىپ وتىرسا كەرەك.

جارىسقا الماتى وبلىسىنىڭ قاراسايدان وزگە بارلىق اۋداندارىنان كوماندالار كەلىپ قاتىستى. ارينە قازىرگە كەزدە جارىس وتكىزەتىن سپورت زالداردى تابۋدىڭ ءوزى ءبىر ماسەلە. قاي جەرگە بارسا دا الدىمەن جالعا بەرەتىن زالدىڭ اقشاسىن سۇرايدى. ونى كەيبىر جارىس ۇيىمداستىرۋشىلارىنىڭ قالتالارى كوتەرمەيتىنى  انىق. ويتكەنى، جالعا بەرەتىن باعانى اسپانداتىپ قويعان.  كەزىندە «حالىق ارەنا»، «الماتى ارەنا» سەكىلدى ءزاۋلىم سپورت سارايلارىن سالعان كەزدە، «قاراپايىم حالىق ءۇشىن ءبارى تەگىن بولادى»، دەپ جار سالىپ جاريا ەتىپ ءبىر قۋانتىپ قويعان ەسىمىزدە. كەيىنىرەك بەلگىلى بولعانداي ايتىلعان ءسوز ءجاي ءسوز بولىپ قالا بەردى.  قالاداعى سپورت قۇمار بالالار كەڭ سارايلاردىڭ ەسىگىنە بارىپ توسىلىپ، اسپانداعان اقشادان كەيىن قايتىپ جاتتى. دۇرىس، ءيا سۋ مەن جارىعى بار دەگەندەي كوممۋنالدىق قىزمەتىنە قارجى تولەۋدە قاجەت ەتەدى. دەسە دە قاراپايىم قالا تۇرعىندارىنا قولجەتىمدى قىلسا دا داۋ تۋماس ەدى عوي. بىراق ازىرگە ولاي بولماي تۇرعانىن بىلەمىز. سوندىقتان جارىس ۇيىمداستىرۋشىلاردىڭ جاعدايىنا بايلانىستى قارايلاپ قايىرىمىن كورسەتەنىن جاندار ىلۋدە ءبىر دەسە بولادى. سولاردىڭ ءبىرى دە بىرەگەيى، جۇرەگىندە يمانى بار، كوپتىڭ تەك العىسىن عانا الىپ، سپورتقا زور قامقورلىق جاساپ جۇرگەن قازاقستان رەسپۋبليكاسىنا ەڭبەگى سىڭگەن جاتتىقتىرۋشى، بالالار مەن جاسوسپىرىمدەر سپورت مەكتەبىنىڭ ديرەكتورى قاپار راۋانوۆ تى ايتسا بولار ءسىرا.

سپورت مەكتەبىنىڭ باسشىسى يمامدارعا سپورت زالدى تەگىن بەرىپ قانا قويماي، كۇن ۇزاق جارىستىڭ باسىندا جۇگىرىپ ءجۇرىپ قولىنان كەلگەن قىزمەت كورسەتىپ قاتىسۋشىلاردىڭ  زور العىستارىن الدى. سوندىقتاندا ىنتىماعى ۇيىعان سپورت مەكتەبىنىڭ ۇجىمى مەن باسشىلىعىنىڭ بۇل قايىرلى ىستەرىنە بەرەكە تىلەدىك.

سونىمەن ءتۋرنيردىڭ اۋىسپالى باس كۋبوگى تالعار اۋدانىنىڭ كومانداسىنا تابىس ەتىلدى. ەكىنشى كۇمىس جۇلدە ىلە اۋدانىنىڭ كومانداسى جەڭىپ السا، قولا مەدال كەگەن اۋدانىنان كەلگەن كومانداعا بۇيىردى. وسىلايشا سالاۋاتتى ءومىر سالتىن سپورت الاڭدارىندا تارتىستى ويىندارىمەن كورسەتكەن يمامداردىڭ بۇل قادامدارى جاس ۇرپاققا ۇلكەن ۇلگى-ونەگە دەپ بىلەمىز.  حوش، سونىمەن كۇنى بويى سىن الاڭىندا جەڭىس ءۇشىن، ءبىر جاعىنان دەنساۋلىقتارىن شىڭداعان يمامدار اينالاعا جاقسى لەبىز قالدىرىپ، جانكۇيەرلەرەرىمەن جىلى قوشتاسىپ جوعارى كوڭىل كۇيمەن تارقاستى.

تۋرنير سوڭىندا جەڭىمپازدار مەن جۇلدەگەرلەر ەستەلىككە سۋرەتكە ءتۇسىپ جاتتى. الماتى وبلىسى بويىنشا يمامدار اراسىندا وتەتىن بەدەلدى ءتۋرنيردىڭ قاتارىنا كوتەرىلگەن بۇل باسەكە الداعى جىلى گەوگرافيالىق كولەمىندە ۇلعايتپاق ويدا بار ەكەن. سالاۋاتتى ءومىر سالتىن ناسيحاتتاپ جۇرگەن يمامدارعا اللا رازى بولسىن دەيمىز.

 

اقىن ورداباي ۇلى،

الماتى

تورعىن نۇرعابىلقىزى