حاربين-2025: قىسقى ازيادا قىتايدا جالاۋ كوتەرەدى

ءىح قىسقى ازيا ويىندارى 2025 جىلعى 7-14 اقپان ارالىعىندا قىتاي حالىق رەسپۋبليكاسىنىڭ حاربين قالاسىندا وتەدى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

وسى جولى جارىستاردى حاربين جانە ونىڭ شىعىسىندا 200 شاقىرىمدا ورنالاسقان يابۋلي قالاسى دا قابىلداماق. اتاپ ايتقاندا، حاربيندە كونكي سپورتى تۇرلەرى، شايبالى حوككەي مەن كيورلينگ جارىستارى، ال يابۋليدە شاڭعى سپورتى، بياتلون، شاڭعى ءالپينيزمى جوسپارلانعان. اشىلۋ سالتاناتى 7 اقپاندا، جابىلۋ سالتاناتى 14 اقپاندا حاربين قالاسىنداعى Harbin International Convention and Exhibition Center Stadium سپورت كەشەنىندە بولادى.

كەشەندى جارىسقا قۇرلىقتاعى 32 ەلدەن 1147 سپورتشى قاتىسادى. ولار سپورتتىڭ 6 تۇرىنەن (11 ديستسيپلينا – بياتلون، تاۋ شاڭعىسى، كيورلينگ، كونكيمەن جۇگىرۋ، شورت-ترەك، مانەرلەپ سىرعاناۋ، شاڭعى جارىسى، سنوۋبورد، فريستايل-اكروباتيكا، شايبالى حوككەي، سكي-الپينيزم) 196 مەدال جيىنتىعىنىڭ يەسىن انىقتايدى.

«قۇرمەتتى باق وكىلدەرى، كورەرمەندەر. قىتايدىڭ حاربين قالاسىندا وتەتىن قىسقى ازيا ويىندارىنا 3 ايدان از ۋاقىت قالدى. ءبۇلبىز ءۇشىن 2025 جىلداعى ماڭىزدى كەشەندى جارىستىڭ ءبىرى بولماق. 1996 جىلى ءۇشىنشى اق ازيادا وسى حاربين قالاسىندا ءوتىپ، وندا قازاقستان 14 التىن، 9 كۇمىس، 8 قولا جۇلدە جەڭىپ العان. بۇل جالپى ەسەپتەگى 2-ورىن.

جالپى قازاقستان قىسقى ازياداعا سول 1996 جىلعى ويىنىنداردان بەرى قاتىسىپ كەلە جاتىر. وسى ارالىقتا 78 التىن، 62 كۇمىس جانە 56 قولا مەدال (بارلىعى 196) جەڭىپ العان»، — دەپ ايتتى قر تسم سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى ازامات يماشەۆ.

ەلىمىزدىڭ ۇلتتىق قۇراماسى سپورتتىڭ 6 تۇرىنەن 139 سپورتشى (71 ەر، 68 ايەل) الىپ بارادى. ولار 50 مەدال جيىنتىعىنا تالاسادى.

1. بياتلون – 10 سپورتشى;
2. كيورلينگ – 12 سپورتشى;
3. كونكيمەن جۇگىرۋ سپورتى – 20 سپورتشى;
4. مانەرلەپ سىرعاناۋ – 4 سپورتشى;
5. شورت-ترەك – 12 سپورتشى;
6. شاڭعى جارىسى – 12 سپورتشى;
7. شايبالى حوككەي (ەرلەر) – 23 سپورتشى;
8. شايبالى حوككەي (ايەلدەر) – 23 سپورتشى;
9. تاۋ شاڭعى سپورتى – 8 سپورتشى;10.
10. فريستايل-اكروباتيكا – 7 سپورتشى;
11. شاڭعى جارىسى – 8 سپورتشى.

بۇل قاتاردا جوعارى ناتيجەگە قول جەتكىزەتىن الەۋەتكە يە مىنا سپورتشىلارىمىزدى اتاپ وتۋگە بولادى:

بياتلون: اسەت دۇيسەنوۆ، الەكساندر مۋحين، ۆلاديسلاۆ كيرەەۆ، گالينا ۆيشنەۆسكايا-شەپورەنكو، ارينا كريۋكوۆا، ۆاديم كۋرالەس.

شاڭعى جارىسى: ولجاس كليمين، كونستانتين بورتسوۆ، نيكيتا گريدين، سۆياتوسلاۆ ماتاسوۆ، نادەجدا ستەپاشكينا، كسەنيا شالىگينا.

كونكيمەن جۇگىرۋ سپورتى: نۇرالى اقجول، نادەجدا موروزوۆا، ارتۋر گاليەۆ، التاي جاردەمبەك ۇلى، ەۆگەني كوشكين.

شورت-ترەك: ابزال اجعاليەۆ، دەنيس نيكيشا، مەرسايد جاقسىباەۆ، ءادىل عالياحمەتوۆ، ەركەبۇلان شامۋحانوۆ، جانبۋسينوۆا مادينا، ەرمەك ماليكا، اجگاليەۆا الينا، ولگا تيحونوۆا، يانا حان.

فريستايل-اكروباتيكا: اردانا ماحانوۆا، ايانا جولداس، رومان يۆانوۆ رومان، شەرزود حاشيرباەۆ.

ايتا كەتەيىك، جىل باسىندا ويىنداردىڭ ەمبلەماسى مەن تاليسمانى تانىستىرىلدى. باسەكەنىڭ بويتۇمارى — ءسىبىر جولبارىستارى بينبين مەن نيني. بينبين مۇز جارىستارىن، ال نيني قار جارىستارىن بەينەلەيدى.

ەمبلەما قىسقى سپورتتىڭ بىرەگەيلىگى مەن رۋحىن كورسەتسە، ال بويتۇمار مادەني ۇقساستىق پەن جەرگىلىكتى مادەنيەتتەن حابار بەرەدى.

ەسكە سالا كەتەيىك، قازاقستان قىسقى ازيا ويىندارىن ءبىر رەت قىبىلداعان. 2011 جىلى استانا مەن الماتى قالاسىندا وتكەن كەشەندى جارىستا ۇلتتىق قۇراما 32 التىن، 21 كۇمىس جانە 17 قولا جۇلدەگە يە بولىپ، جالپى ەسەپتە العاش رەت 1-ورىن العان. وسىعان دەيىنگى VI ويىندار 2017 جىلى جاپونيانىڭ ساپپورو قالاسىندا وتكەن. قازاقستان كومانداسى 32 مەدالمەن (9 التىن، 11 كۇمىس، 12 قولا) 4-ساتىعا تۇراقتاعان.