«ALMATY RESORT» qyzmetkerleri soǵys ardagerlerine bardy

Táýelsizdik kúni qarsańynda «Almaty Resort» basshylyǵy men qyzmetkerleri soǵys ardagerlerine bardy.

Balyqbaı Ysqaq jaqynda 100 jyldyq mereıtoıyn atap ótti. Aýyr jyldardyń saldary bolar, qarııanyń búginde janary solyp, qulaǵy estýden qalǵan. Esesine urpaǵy — balalary men nemereleri onyń jaýyngerlik joly týraly maqtanyshpen áńgimeledi. Kegen aýdanynyń týmasy Balyqbaı Ysqaq 115-atqyshtar dıvızııasynyń quramynda soǵysyp, Eýropany azat etýge atsalysqan. Jeńis kúnin Avstrııada qarsy alady. Soǵystan keıin ol Qıyr Shyǵysta qyzmet etip, ómirin quqyq qorǵaý salasyna arnaıdy. Erligi úshin III dárejeli Dańq ordenimen jáne basqa da jaýyngerlik nagradalarmen marapattaldy. Batyrdyń urpaqtary búginde onyń Otan úshin jasaǵan erligin maqtan etip, ony keıingi jastarǵa úlgi etýde.

Lıýbov Nıkolaevna Gorkovskaıa 1925 jyly Lýgansk oblysynda týǵan. Qazir qart ana ókinishke qpraı, tósekke tańylǵan. Biraq onyń kózderinen áli de danalyq pen kúsh-jigerdi ańǵarýǵa bolady. Soǵys jyldarynda ol birinshi Ýkraına maıdanynda baılanysshy bolyp qyzmet etti. Sevastopol, Belarýssııa men Baltyq jaǵalaýyn azat etýge qatysty. Soǵystan keıin «Qazaqfılm» kınostýdııasynda eńbek etip, eki bala tárbıeledi.

Lıýbov Nıkolaevnanyń soǵys jyldaryndaǵy erligi úshin marapaty da az emes. Alaıda, sol maqtan etetin marapattar aýyr jyldardy eske túsiretini ókinishti.

Qaskeleńniń 98 jastaǵy týmasy Anatolıı Nazaruly Popov óziniń jastyǵyn eske alyp, kózine jas aldy. Ol 2-Baltyq maıdanynda baılanysshy bolyp qyzmet ete júrip, Otandy qorǵaıdy.  Soǵystan keıin medıınalyq ýchılıщeni bitirip, 30 jyldan astam ýaqytyn Qazaqstannyń densaýlyq saqtaý salasyna arnaıdy. Búginde ol Otan úshin jasaǵan erligin maqtan tutatyn balalary men nemereleriniń ortasynda, aınalasynda janashyr, qamqor jandar jeterlik. Ardagerlerdi umytpaı, eske alyp, eskerip jatqandaryńyz úshin raqmet! Bul men úshin úlken qurmet!, — dedi aǵynan jarylǵan qarııa.

99 jastaǵy Ivan Matveevıch Begýnov «Almaty Resort» ujymyn kúlimsirep qarsy aldy.

Týystarym men týraly bárin biledi, solar aıtyp bersin.  Men maqtanǵandy unatpaımyn, — dedi qarapaıym ardager.

Ol Jıtomırde dúnıege kelgen. 228-gvardııalyq atqyshtar polkinde pýlemetshi bolyp soǵysqan. Jaıaý áskerdiń alǵa jyljýyn qamtamasyz etip, Eýropany azat etken. Erligi men batyldyǵy úshin ol Qyzyl Tý ordenimen jáne «Erligi úshin» medalimen marapattalǵan. Búginde Ivan Matveevıch áýletiniń ortasynda syı-qurmetke bólenip otyr.

«Almaty Resort» ujymy ardagerlerge qurmet retinde syı-sııapat tartý etip, zor densaýlyq, uzaq ǵumyr tiledi.

Jarqyn bolashaq qurý úshin ótkendi este saqtaý kerek! Beıbit ómir úshin kúresken batyrlarǵa bas ıemiz, — dedi shıpajaı dırektorynyń emdeý-saýyqtyrý jumystary jónindegi orynbasary Saltanat Beısembaeva.

Ol, ardagerlerdiń bizdiń qamqorlyǵymyz ben rızashylyǵymyzdy sezinýi úshin mundaı kezdesýler jıi ótkizilip turatynyn atap ótti.

Nurlan QUMAR,

ALMATY