Aıymbetov «Adana Demırspor» klýbyna jeńis syılady (VIDEO)

Túrkııanyń Sýperlıgasyndaǵy «Adana Demırspor» komandasy sapynda oınaıtyn Abat Aıymbetov qatarynan ekinshi golyn soqty. Bul týraly rast.kz habarlady.

Qazaq fýtbolshysy osymen qatarynan ekinshi oıynda mergendigimen kózge túsip otyr. Ol 7 jeltoqsan kúni oınalǵan munyń aldyndaǵy 15-týrda «Gıoztepe» komandasynyń qaqpasynan da sańylaý taýyp, alań ıelerine sapynan jalǵyz goldyń avtory atanǵan edi. Biraq ol joly adanalyqtar 1:3 esebimen jeńilip qalǵan bolatyn.

Týrnır kestesiniń sońǵy ornynda kele jatqan «Adana Demırspor» komandasy sońǵy kezdesýge baryn saldy. Sonyń nátıjesinde 31-mınýtta forvard Iýsýf Barasy esep ashyp, olardy alǵa shyǵardy. Budan keıin 39-mınýtta havbek Iýsýf Sarynyń qaqpa aldyndaǵy alańǵa kólbeý syzyq boıymen jóneltken dobyna Abat aıaǵyn tosa qoıyp, tordyń ishinen bir-aq shyǵardy.

Budan keıin «Beshıktash» oıynshylary ekinshi taımda bir doptyń qarymtasyn qaıtara aldy. Ony 72-mınýtta Alı Al-Moatasammbella saldy.

Aıtqandaı, «Beshıktash» quramynda óner kórsetetin kelesi qazaq fýtbolshysy Baqtııor Zaınýtdınov 46-mınýttan alańǵa shyǵyp, match sońyna deıin oınady.

Osydan keıin chempıonatta birinshi jeńisine jetken «Adana Demırspor» upaı sanyn 5-ke jetkizdi. Ol biraq áli týrnır kestesiniń eń sońynda keledi.

Komandada 14 oıynnan 5 dop soqqan forvard Iýsýf Barasy mergender kóshin bastap keledi. Al Abat Aıymbetov 10 oıynda 2 gol soǵyp, úshinshi bolyp tur. Sebebi, franýz qorǵaýshysy Endrıý Gravııon 8 oıynda 2 ret qaqpany dál kózdep úlgerip, ekinshi orynǵa shyqqan eken.

Endi túrik chempıonatynda úzilis bolady.