Fýtzaldan ardagerler arasyndaǵy alaman

Fýtzaldan ardagerler arasynda Almaty oblysynyń ashyq birinshiligi bolyp, júldeli kúmis júldege Alla násip etip jeńip aldyq. Jarys Almaty mańyndaǵy Qyrǵaýyldy eldi mekeninde ornalasqan Balalar men jasóspirimder sport mektebiniń qabyrǵasynda bolyp ótti.

Bul týrnırdi aıtýly sport mektebiniń dırektory, Almaty oblysy ardagerler qoǵamynyń tóraǵasy, aýyl sportynyń janashyry Qaırat Sháripuly Birimjanov uıymdastyrýǵa muryndyq bolǵan eken. Záýlim sport saraıynyń ishi kóz tartady. Ásirese, oıyn alańy halyqaralyq standartqa saı túgeldeı jabdyqtalynyp jasalǵanyna tánti boldyq. Dál osy fýtzal alańynda «Portý» men «Barselona» klýbtarynyń aty álemge áıgili juldyzdy oıynshylary kelip, ÝEFA kýbogy úshin týrnırde dop tepkenin bilemiz. Sondyqtanda esimderi áıgili fýtzal juldyzdary ter tókken jerge bizdiń tabanymyz jerge tıip tańazannan bastap, jeńis úshin jan berisip jan alysqan kezdesýler ótkizdik.

Alaman jarysqa Almaty oblysynyń ár aımaǵynan tipti, sonaý Qarakestek aýylynan komandalar kelip, baq synady. Qatysýshy komandalardyń oıyn deńgeıi óte joǵary bolǵanyna kýá boldyq. Degenmen «Urysta turys joq» demekshi, bizdiń osy jarysqa saılap aparǵan «О́tegen batyr» komandasy qarap, qalmaı qaısarlyq tanytyp fınalǵa deıin jettik. Aldymen oblystyq ashyq birinshiliktiń saltanatty ashylýy bolyp ótti.

Elimizdiń ánurany oınalyp bitkennen keıin, tóreshiler alqasynyń tóraǵasy Abbas Shahızada alaman jarysty bastap jiberdi. Saıdyń tasyndaı saqa oıynshylar bas qosqan bul dodada kimniń baǵy janatyny belgisiz edi. Eki topqa bólingen 10 komandanyń arasynan sýyrlyp top jaryp shyǵý úlken másele edi. Degenmen asqaraly maqsatymyz toptan birinshi bolyp shyǵý bolatyn. Sol úshin de árbir oıyn fınal sekildi jan berisip jan alysqan kezdesýler boldy desem qateselespegen bolar edim. Keskilesken surapyl oıyndar kezinde shyn myqtylardy sheti kórine bastady. Bizdiń «О́tegen batyr» komandamyz alǵashqy oıynyn «Parasat» komandasyna qarsy ótkizip tartysqa tola ótken kezdesýde 1:0 esebimen jeńiske jettik. Alla násip etip óz tobymyzda tórt kezdesý ótkizip, tórteýinde jeńiske jettik. Sóıtip, toptan birinshi orynmen jartylaı fınalǵa joldama aldyq. Jartylaı fınalda óz tobynan ekinshi orynmen shyqqan «Saryózek» komandasymen jolyǵyp, tartysqa toly matchta 2:1 esebimen jeńiske jetip, fınalǵa joldama aldyq. Al, fınalda alǵashqy oıynymyzda «Parasatqa» qarsy jeńispen bastap edik, endi sol komandaǵa qarsy jarystyń bas kýbogyn úshin talasqa túsýdiń joly qaıta túıisken edi. Iá, kúni boıy alańda jan aıamaı baryn salǵan ardager oıynshylarymyz rasymende qatty sharshaǵan edi. Ony ishteı bilsekte syr bildirmeı synǵa túsip barymyzdy salýǵa tyrystyq. Degenmende «Parasat» komandasy bizge qaraǵanda tyń kórinip jeńisti julyp áketti. Iá, sport degen bir jeńis bir jeńilisten turatyny belgili. Qalaı desek te bizdiń «О́tegen batyr» komandasynyń árbir ótkizgen oıyndaryna qalyń kópshilik kórermen joǵary baǵasyn berip, naǵyz chempıon dep aıdar taǵyp aıtyp jatqandary keýdemizdi qýanyshqy bólep, janymyzǵa jylý syılady. Sonymen oıyn sońynda úzdik oıynshylar men úzdik shyqqan komandalardy jarys uıymdastyrýshy BJSM dırektory, sport janashyry Qaırat Sháripuly Birimjanov rızashyshlyqpen quttyqtap, marapattady.

Úzdik shabýylshy ataǵy bizdiń «О́tegen batyr» komandasynyń sańǵyla, sańylaq oıynshysy Ánýar Ábishev marapattaldy. Sonymen birinshi oryndy «Parasat», ekinshi oryndy «О́tegen batyr», úgshinshi oryndy «Qonaev» komandasy jeńip aldy. Baýyrjan Momyshuly atamyz: «Meniń boıymda kúsh-qýatym, qaıratym bar kezde men kárilerdiń tizimine qospańdar», — degen eken. Sport ol- densaýlyq kepili. Endeshe, sportty ómirleriniń shamshyraǵy etip alǵan ardagerlerdiń júgirip salaýatty ómir saltymen aınalysyp júrgenderi jastarǵa úlken úlgi-ónege dep bilemiz. Osyndaı tartymdy, tartysty sporttyq sharany uıymdastyrýǵa 2 MBJSMmen birge Almaty oblysy Deneshynyqtyrý jáne sport basqarmasy da óz úlesin qosqan eken. Aldarynan jarylqasyn deımiz. Árbir jarystyń aıǵaı-shýsyz tártippen ótýi tóreshilerge baılanysty ekeni belgili. Osy týrnırdiń joǵary deńgeıdi ótýine at salysqan óz salasynyń mamandary Abbas Shahızada men Jádiger Rahmanovqa qatysýshylar alǵastaryn aıtyp jatty. Baýyrlarǵa zor alǵysymyzdy aıtamyz. О́ıtkeni, aýyl-aımaqtardaǵy sport ardagerlerine kóńil bólý maqtaýǵa laıyqty qadam dep bilemiz. Osyndaı alaman ardagerler jarysy dástúrlik sıpat alyp jatsa nur ústine nur bolmaq.

Aqyn ORDABAIULY,

ALMATY