مارات وماروۆ: «ءبىزدىڭ ماقساتىمىز – ناتيجە بەرەتىن فۋتبول ەكوجۇيەسىن قۇرۋ»

استانادا قازاقستان فۋتبول فەدەراتسياسىنىڭ پرەزيدەنتى مارات وماروۆتىڭ قاتىسۋىمەن ءباسپاسوز ءماسليحاتى ءوتتى، دەپ حابارلادى قازاقستان فۋتبول فەدەراتسياسى.

مارات تالعات ۇلى قازاق فۋتبولىنىڭ الداعى ءتورت جىلداعى دامۋى تۋرالى بايانداماسىندا نەگىزگى ستراتەگيالىق باعىتتارعا توقتالىپ، ەلىمىزدەگى فۋتبول ينفراقۇرىلىمى مەن جۇيەسىن دامىتۋدىڭ بىرنەشە ماڭىزدى ماسەلەلەرىن كوتەردى.

وتكەن اپتادا ۋەفا شتاب-پاتەرىنە بارىپ، ۇيىم باسشىسى الەكساندەر چەفەرينمەن كەزدەستىم. ونىڭ قورىتىندىسى بويىنشا ەۋروپالىق فۋتبول قاۋىمداستىقتارى وداعىنىڭ باسشىسىمەن كەلىسىمگە كەلدىك. قازاقستان فۋتبولى الەمدىك فۋتبول ەكوجۇيەسى مەن ينتەگراتسيا ماسەلەسى بويىنشا حالىقارالىق سەرىكتەستىكتىڭ تولىق قولداۋىنا يە بولادى. ۋەفا بىرنەشە رەت ەلىمىزدىڭ فۋتبولىنا رەفورما قاجەت ەكەنىن اتاپ ءوتتى. ءبىز سەرىكتەستىككە تولىق دايىنبىز، — دەپ اتاپ ءوتتى قفف باسشىسى.

مارات وماروۆ ەڭ الدىمەن بالالار جانە جاسوسپىرىمدەر فۋتبولىن جاڭعىرتۋ جولىندا ەۋروپالىق تالاپتارعا سايكەس كەلەتىن سەرتيفيكات العان اكادەميالار جۇيەسىن قۇرۋ جوسپارىن مالىمدەدى.

ايماقتىق فۋتبول مەكتەپتەرىنە ادىستەمەلىك قولداۋدان بولەك، ەۋروپالىق تالاپتارعا ساي كەلەتىن سەرتيفيكاتسيالانعان اكادەميالاردىڭ جاڭا جۇيەسىن قۇرۋدى جوسپارلاپ وتىرمىز.

قازىردىڭ وزىندە Kaspi Group كومپانياسىمەن فۋتبول اكادەمياسىنىڭ قۇرىلىسى تۋرالى كەلىسىم بار. ونىڭ ورنى ءالى تالقىلانىپ جاتىر. استانا، الماتى نەمەسە جاڭادان سالىنىپ جاتقان الاتاۋ قالاسى بولۋى مۇمكىن. قاراعاندى ​​قالاسىندا فۋتبول اكادەمياسىنىڭ قۇرىلىسى بويىنشا Freedom holding كورپوراتسياسىمەن كەلىسىم بار. سونداي-اق جامبىل وبلىسىندا دا اكادەميا سالىنادى. ويتكەنى بۇل ءوڭىر فۋتبول تالانتتارىنىڭ قازىناسىنا اينالعان.

وسى باعىتتاعى جۇمىستاردىڭ ءبىرى – TAV Group كومپانياسىمەن سەرىكتەستىك جونىندە كەلىسىمشارتقا قول قويىلدى. كومپانيا ءوز قاراجاتىنا تالعارداعى ۇلتتىق قۇراما بازاسىندا 5000 شارشى مەتر الاڭدا اكادەميا ورتالىعى مەن جاتاقحانا سالادى. بۇل ارقىلى اكادەمياداعى 15-18 جاس ارالىعىنداعى وقۋشىلاردىڭ سانىن 150-200-گە دەيىن ۇلعايتا الامىز. جاس فۋتبولشىلاردىڭ ساپالى دايىنداۋ ءۇشىن قولايلى جاعداي جاسايمىز. جوبانى جۇزەگە اسىرۋدا حالىقارالىق FIFA Forward 3.0 باعدارلاماسى بويىنشا قارجى تارتىپ، قۇرىلىس قارقىنىن ارتتىرامىز.

وڭىرلەردە جابىق ارەنالار سالۋ ءۇشىن BI Group جانە جەرگىلىكتى اتقارۋشى ورگاندارمەن بىرلەسىپ، ارنايى كونتسەپتسيا دايىندايمىز.

سونىمەن قاتار فۋتبول مەكتەپتەرىنىڭ باپكەرلەرى مەن تاربيەلەنۋشىلەرى اعىلشىن ديۆيزيونىندا ونەر كورسەتەتىن «ۋيكوم ۋوندەرەرس» كلۋبىندا تاجىريبە الماسادى. بۇل جوبا بويىنشا Kaspi Group توبىمەن كەلىسىم جاسالدى، — دەدى مارات وماروۆ.

بۇقارالىق فۋتبولدى دامىتۋ جۇمىستارى جالعاسىن تابادى. ونىڭ ىشىندە ستۋدەنتتىك فۋتبول جاڭا دەڭگەيگە شىعارىلماق.

تاعى ءبىر ماڭىزدى باعىت – ستۋدەنتتىك فۋتبولدى دامىتۋ. ينفراقۇرىلىمى جانە جارىسقا قاتىساتىن كومانداسى بار ۋنيۆەرسيتەتتەر اراسىندا ستۋدەنتتەر ليگاسىنىڭ پيلوتتىق جوباسىن ىسكە قوسامىز. العاشقى كەزەڭدە كوماندالاردىڭ سانى كوپ بولمايدى. بۇل جارىستىڭ ساپاسىن قامتاماسىز ەتىپ، ترانسلياتسيا ۇيىمداستىرۋ جانە قوعام تاراپىنان قىزىعۋشىلىقتى ارتتىرۋ ءۇشىن جاسالادى.

ليگا وسى ۋاقىتتا ءوتىپ ستۋدەنتتىك جارىستاردى قايتالاماي، جوعارى دەڭگەيگە شىعۋدى كوزدەيدى. وزگە دە جوعارى وقۋ ورىندارى ءۇشىن ۇلگى بولادى. عىلىم جانە جوعارى ءبىلىم ءمينيسترى ساياسات نۇربەكپەن كەزدەسۋ ءوتىپ، العاشقى كەلىسىمدەرگە قول جەتتى.

اۋەسقوي كوماندالار اراسىندا ايماقتار كۋبوگىنىڭ تيتۋلدى دەمەۋشىسى InDrive بولادى جانە 250 ميلليون تەڭگە بولەدى. جارىستىڭ جەڭىمپازى ۋەفا ايماقتار كۋبوگى حالىقارالىق تۋرنيرىنە قاتىسادى جانە قر ەكىنشى ليگاسى مەن قازاقستان كۋبوگىنا جولداما الادى، — دەدى مارات تالعات ۇلى.

سونداي-اق فەدەراتسيا پرەزيدەنتى ۇلتتىق قۇرامالاردى دامىتۋ جۇيەلى كوزقاراس پەن ۇزاق مەرزىمدى شەشىمدەردى قاجەت ەتەتىن باسىم باعىتتاردىڭ ءبىرى ەكەنىن ايتتى.

ۇلتتىق قۇرامالار دەپارتامەنتىن باسقارۋ مىندەتى ەلىمىزدەگى ەڭ ۇزدىك مامانداردىڭ ءبىرى رۋسلان تاحير ۇلى بالتيەۆكە جۇكتەلدى. ونىمەن بىرگە تالعارداعى قازاقستان ۇلتتىق قۇراماسىنىڭ بازاسىن ارالاپ، العاشقى مىندەتتەردى ايقىندادىق.

U17، U19 جانە U21 جاستار قۇراماسىندا وينايتىن ويىنشىلاردىڭ نىق بازاسىن قالىپتاستىرۋعا ەرەكشە كوڭىل بولىنەدى. ويتكەنى، ولار الداعى جىلدارى ۇلتتىق قۇرامانىڭ نەگىزگى ويىنشىلارىنا اينالادى.

سول سەبەپتى 15 جاستان باستاپ دايىندىق جۇيەسىندە ناقتى ۆەرتيكال قۇرۋ وتە ماڭىزدى. ويىنشىلار قالىپتاسۋدىڭ بارلىق كەزەڭىنەن ءوتىپ، جوعارى دەڭگەيگە جىلدام بەيىمدەلۋى قاجەت.

قازاقستان ۇلتتىق قۇراماسى باس باپكەرى مىندەتىن اتقارۋشى قىزمەتىنە ءالي ءحانالي ۇلى اليەۆ تاعايىندالدى. ونى بارلىعىڭىز تانيسىزدار. حالىق تا جاقسى قابىلدادى. ۇلتتىق قۇرامادا وينادى. ايماقتاردا جۇمىس ىستەۋ تاجىريبەسى وتە كوپ. ويىنشىلاردى جاقسى بىلەدى ءارى ەلىمىزدە فۋتبولدى دامىتۋ مەن ونىڭ ناتيجەسىنە جاناشىر ادام. ءالي ءحانالي ۇلىنىڭ جۇمىسىنا تولىقتاي قولداۋ كورسەتەمىز، — دەدى ول.

مارات وماروۆ فۋتبولدى دامىتۋدىڭ باستى جولدارىنىڭ ءبىرى ينفراقۇرىلىمدى جاقسارتۋ ەكەنىن اتاپ ءوتتى. وسىعان وراي، جاڭا تولىق كولەمدەگى فۋتبول الاڭدارىن سالۋ جانە قولدانىستاعى نىسانداردى جاڭعىرتۋ بويىنشا بەلسەندى جۇمىستار جۇرگىزىلۋدە.

فەدەراتسيا تولىق كولەمدى فۋتبول الاڭدارىنىڭ سانىن ۇلعايتۋ، وسى ۋاقىتقا دەيىن جاريالانعان ستاديونداردىڭ، جابىق مانەجدەر مەن فۋتبول اكادەميالاردىڭ قۇرىلىستارىن جۇرگىزۋ، سونىمەن قاتار سپورت نىساندارىن جاڭارتۋ باعىتىندا جەرگىلىكتى اتقارۋ ورگاندارى جانە ينۆەستورلارمەن بىرلەسە جۇمىس اتقارادى.

«الاڭ» باعدارلاماسى جالعاسىن تابادى. 2025 جىلى 9 الاڭ پايدالانۋعا بەرىلەدى. ولار اقتوبە، اتىراۋ، جامبىل، باتىس قازاقستان، قوستاناي، قىزىلوردا، ماڭعىستاۋ، پاۆلودار جانە سولتۇستىك قازاقستان وبلىستارىندا سالىنادى.

سونىمەن قاتار فەدەراتسيا قىزىلوردا، سەمەي جانە استانا (قاجىمۇقان مۇڭايتپاسوۆ اتىنداعى ستاديون) قالالارىنداعى ستاديونداردىڭ قۇرىلىسى، شىمكەنت، اتىراۋ جانە قاراعاندى قالالارىنداعى جوبالاردى ىسكە قوسۋ بويىنشا كەڭەس بەرۋ جۇمىستارىن جۇرگىزىپ جاتىر.

بۇگىندە قازاقستاندا تولىق كولەمدى ءبىر فۋتبول الاڭىنا جيىرما التى مىڭ ادامنان كەلەدى. ال انگليادا بۇل كورسەتكىش – ءبىر جارىم مىڭ ادام. گەرمانيادا – ەكى مىڭ، يتاليادا – ەكى مىڭ جارىم. رەسەيدە – ون ەكى مىڭ جارىم. سانداردىڭ وزدەرى-اق ايتىپ تۇر، — دەدى فەدەراتسيا پرەزيدەنتى.

سونىمەن قاتار، مارات وماروۆ فۋتبولدىڭ ساپاسىن ارتتىرۋدىڭ ماڭىزدى قادامدارىنىڭ ءبىرى تورەشىلەر كورپۋسىن تەرەڭ رەفورما جۇرگىزۋ، ونىڭ قۇرامىنا جاڭا تورەشىلەردى دايىنداۋمەن قاتار، قازىرگى تورەشىلەردىڭ جۇمىسىن جاقسارتۋ دا كىرەتىنىن اتاپ ءوتتى.

فەدەراتسيا تورەشىلەر كورپۋسىنىڭ جۇمىسىنا تولىقتاي رەفورما جۇرگىزەدى. ۋەفا شتاب-پاتەرىنە بارعان ءىسساپارىمدا ۋەفا تورەشىلەر كوميتەتىنىڭ جەتەكشىسى روبەرتو روزەتتيمەن كەلىسسوزدەر جۇرگىزدىم. كەزدەسۋ قورىتىندىسى بويىنشا قازاقستانعا كەڭەسشىلەر توبى جىبەرىلەدى. سونىمەن قاتار قازاقستان فۋتبول فەدەراتسياسىنىڭ تورەشىلىك دەپارتامەنتىنىڭ ديرەكتورى قىزمەتىنە مامان بويىنشا رەكومەنداتسيا بەرىلەدى.

دەپارتامەنتتىڭ جاڭا باسشىسىنا تورەشىلەردىڭ جاڭا بۋىنىن دايىنداۋ جانە تورەشىلەر قۇرامىن دامىتۋ مىندەتتەرى قويىلادى. سونىمەن قاتار جاس تورەشىلەردى حالىقارالىق ستاندارتتارعا ۇيرەتەتىن شەتەلدىك مامانداردى تارتامىز. تاعى ءبىر ماڭىزدى مىندەت – تورەشىلەردىڭ ساپاسىن كوتەرىپ، ولاردى حالىقارالىق ويىندارعا شىعارۋ ارقىلى جاڭا دەڭگەيگە جەتۋ.

تەحنيكالىق جاعىنان ستاديوندار جاڭا VAR جۇيەسىمەن جابدىقتالادى، ينفراقۇرىلىمدىق نىسانداردا ۇزدىكسىز بايلانىس پەن ينتەرنەتتى قامتاماسىز ەتۋ ءۇشىن «قازاقتەلەكوم» وپەراتورىمەن كەلىسىم جاسالدى، — دەدى مارات وماروۆ.

قورىتىندىلاي كەلە، فەدەراتسيا باسشىسى جاڭا ماۋسىمدا پرەمەر-ليگانىڭ قۇرىلىمىندا ايتارلىقتاي وزگەرىستەر جوسپارلانعانىن، ول جاقىن ارادا جۇزەگە اسىرىلاتىنىن اتاپ ءوتتى.

بۇل باعىتتا اكىمشىلىك شىعىنداردى ءتيىمدى ەتۋ جۇمىستارى جۇرگىزىلدى. قاجەت ەمەس بيۋروكراتيالىق قۇرىلىمدار مەن دەلدالدار الىنىپ تاستالدى.

وسى ۋاقىتقا دەيىن قازاقستان فۋتبول فەدەراتسياسى مەن قازاقستان كاسىپقوي فۋتبول ليگاسى اراسىندا جارىستى ۇيىمداستىرۋ بويىنشا كەلىسىمشارت بولدى. الايدا بۇل ۇيىم ءتيىمدى جۇمىس اتقارا المادى. اسىرەسە قارجىلىق باسقارۋ جانە شىعىنداردىڭ اشىقتىعى كورسەتىلمەگەن.

شىعىنداردى وڭتايلاندىرۋ ماقساتىندا جارىستاردى ۇيىمداستىرۋ ديرەكتسياسى قۇرۋ شەشىمى قابىلداندى. ەلىمىزدە وتەتىن جارىستاردى وتكىزۋ جانە ۇيىمداستىرۋ بويىنشا نەگىزگى مىندەتتەردى اتقارادى. قازاقستان فۋتبول فەدەراتسياسىنىڭ بۇل قۇرىلىمى فۋتبول كلۋبتارىنىڭ جارنالارىن ءتيىمدى جۇمسالۋىن جانە ويىنداردى وتكىزۋگە بولىنەتىن شىعىنداردىڭ ماقساتتى پايدالانۋىن ناقتى قاداعالايدى.

قىسقا مەرزىم ىشىندە ديرەكتسيا قاراجاتتى وڭتايلاندىرۋ ارقىلى فۋتبول كلۋبتارىنىڭ جارناسىن 10 پايىعا تومەندەتتى. كوپشىلىك ءۇشىن بۇل ايتارلىقتاي قولداۋ بولدى.

بيىلدان باستاپ ءباس تىگۋ كومپانيالارىنىڭ اتاۋلارى قازاقستان پرەمەر-ليگاسىنىڭ اتىنان الىنىپ تاستالىپ، ءبىرىنشى اينالىمعا دەيىن چەمپيونات اتاۋسىز جۇمىس ىستەيتىن بولادى. ءبىز ەكىنشى جارتىجىلدىقتا جاڭا تيتۋلدىق دەمەۋشىنى جاريالايمىز، — دەدى ول.

ونىڭ ايتۋىنشا، فۋتبول كلۋبتارىنان لوگيستيكا بويىنشا قارجىلىق جۇكتەمەلەر، ۇيدە وتەتىن ويىنداردا تورەشىلەردى قابىلداۋ جانە ورنالاستىرۋ مىندەتى الىندى.

لوگيستيكا باعىتىندا شىعىنداردى رەتتەۋ ءۇشىن ءبىزدىڭ سەرىكتەس بولۋعا دايىن Air Astana جانە Fly Arystan اۋە كومپانيالارىمەن كەلىسسوزدەر جۇرگىزىپ جاتىرمىز. كوماندالار مەن تورەشىلەردىڭ ۇشۋ شىعىندارىنا قولداۋ كورسەتىلمەك. بۇل فۋتبول كلۋبتارى مەن فەدەراتسيا ءۇشىن قارجىلىق جۇكتەمەنى ازايتادى. سونىمەن قاتار بارلىق قاتىسۋشىلار ءۇشىن جارىستى ۇيىمداستىرۋدى ءتيىمدى ءارى قولايلى ەتەدى. ءبىز كەلىسسوزدەردىڭ تابىستى بولاتىنىنا ۇمىتتەنەمىز جانە ۇزاقمەرزىمدى سەرىكتەستىك قازاق فۋتبولىنا پايداسىن تيگىزەتىنى انىق.

ءبىز ۋاقىتشا جەتىستىككە ۇمتىلمايمىز، ءبىزدىڭ ماقسات – تۇراقتى فۋتبول ەكوجۇيەسىن قۇرۋ، ول ارقىلى ويىنشىلار، كلۋبتار، جانكۇيەرلەر جانە سەرىكتەستەر ورتاق ناتيجە ءۇشىن جۇمىس ىستەيدى.

قازاقستان فۋتبولى جاڭا دەڭگەيگە شىعىپ، حالىقارالىق ارەنادا باسەكەگە توتەپ بەرۋى ءۇشىن رەفورما كەرەك. سول سەبەپتى وزىق تاجىريبەنى قولدانىپ، تسيفرلىق تەحنولوگيانى ەنگىزىپ، ينۆەستيتسيا تارتىپ، بارلىق پروتسەستەردىڭ اشىقتىعىن قامتاماسىز ەتۋ ارىقلى جاڭارتۋ باعىتىن جالعاستىرامىز.

ۋەفا، مەملەكەت، جەكە بيزنەس جانە فۋتبول سۇيەر قاۋىم قولداۋىمەن العا قويىلعان ماقساتتاردى ورىنداي الامىز. قازاق فۋتبولى مىقتى بولۋعا لايىق! ءبىز جاڭا شىڭداردى باعىندىرۋ جولىندا بارلىق جۇمىستى اتقارامىز، — دەپ تۇيىندەدى قازاقستان فۋتبول فەدەراتسياسىنىڭ پرەزيدەنتى مارات وماروۆ.