الماتىدا الەم كۋبوگىنىڭ كەزەڭى وتەدى

28 اقپان مەن 2 ناۋرىز ارالىعىندا شىمبۇلاق تاۋ كۋرورتىندا فريستايلدان FIS الەم كۋبوگىنىڭ كەزەڭى وتەدى.

جارىس موگۋل / پاراللەل موگۋل جانە شاڭعى اكروباتيكاسى بويىنشا بولادى. اتاپ ايتقاندا، 28 اقپاندا – جەكە موگۋلدان، 1 ناۋرىزدا – پاراللەل موگۋلدان، 2 ناۋرىزدا – شاڭعى اكروباتيكاسىنان جارىس وتەدى دەپ جوسپارلانۋدا.

فريستايل الەمىندەگى، اسىرەسە موگۋل مەن شاڭعى اكروباتيكاسىنداعى جانكۇيەرلەر مادەنيەتى-ادرەنالين، جىلدامدىق جانە تاڭ قالىستىڭ ميكسى. مۇندا الىپ ستاديوندار جوق، بىراق تىك بەتكەي، تراسسالاردىڭ ەتەگىندەگى شۋلى تريبۋنالار جانە سالقىننان قورىقپايتىن، سۇيىكتى سپورتشىلارىنىڭ ونەرىن ساعاتتاپ كۇتۋگە دايىن جانكۇيەرلەر بار.

فريستايل جانكۇيەرلەرى — ءجاي كورەرمەن ەمەس، ناعىز ەكسترەمالدى سپورتتىڭ باعالاۋشىلارى. ولار ءار تريۋكتى كورەدى، ءار سەكىرىستىڭ الدىندا تىنا قالادى دا، سپورتشىلار عاجاپ تريۋك جاساعاندا ايقاي-شۋعا باسادى. مۇندا سەكۋندتار مەن باللدار عانا ەمەس، سپورتشىنىڭ باتىلى جەتىپ ورىنداعان سپورتتىق ەلەمەنتى دە ماڭىزدى.

جارىس اتموسفەراسىن سوزبەن ايتىپ جەتكىزۋ مۇمكىن ەمەس. ەلەستەتىڭىزشى: ايازدى كۇن، اسەم تابيعات، ءتۇرلى تاۋ-شاڭعى كيىمىن كيگەن ادامدار، بىرەۋ ىستىق ءشاي ۇسىنادى، بىرەۋ قوڭىراۋ سىڭعىرلاتادى، بىرەۋ جالاۋ جەلبىرەتەدى،ال بىرەۋ سۇيىكتى سپورتشىسىنىڭ اتىن ايقايلايدى. اسىرەسە «پاراللەل موگۋل» بويىنشا قاتىساتىن سپورتشىلاردىڭ ونەرى قىزىق، وندا اتلەتتەر ءبىر-بىرىمەن بەلگىلى ءبىر رەتپەن جارىسادى، ال تۋرنير كەستەسىنىڭ الدىڭعى قاتارىنا ۇتقان ادام شىعادى.

فريستايل فاناتتارى ۇلكەن پەنوپلاست قولدار، نەوندى پلاكاتتار، ءتىپتى ۇلتتىق تۋدىڭ تۇسىندەي شاڭعى ماسكالارى سياقتى ەرەكشە اتريبۋتتاردى جاقسى كورەدى. كەي ەلدەردە جەڭىمپازداردى تەك قوشەمەتپەن عانا ەمەس، قاردان شاشۋ شاشىپ قارسى الادى — فاناتتار قاردى ۋىستاپ اسپانعا لاقتىرىپ، كىشىگىرىم بوران اسەرىن تۋدىرادى.

كوپتەگەن جانكۇيەرلەردىڭ وزدەرى شاڭعىمەن نەمەسە سنوۋبوردپەن سىرعانايدى. ولار تەك تاماشالاپ قانا قويماي، سپورتتى وزدەرى دە سەزىنەدى، سەكىرگەننەن كەيىن تەپە-تەڭدىكتى ۇستاۋ نەمەسە تەگىس ەمەس رەلەفتە جىلدامدىقتى ۇستاپ قالۋ قانداي قيىن ەكەنىن بىلەدى. جانكۇيەرلىك مادەنيەتتە سپورتشىلارعا دەگەن سىيلاستىق باعالى، سەبەبى ولاردىڭ ارقاسىسى سەكىرۋ مەن ءتۇسۋدىڭ جىلدامدىعى ءۇشىن قانشا كۇش جۇمسالعانىن تۇسىنەدى.

موگۋل مەن شاڭعى اكروباتيكاسىنداعى جانكۇيەرلەر مادەنيەتى — ەركىندىك، درايۆ جانە شىن جۇرەكتەن قولداۋ. مۇندا ءجاي ايقايلاي بەرمەيدى، مۇندا ادامدار سپورت دەپ ءومىر سۇرەدى.

سپورتشىلار سەكىرەر الدىندا ءبىر-بىرىنە قولداۋ بەرەدى، سپورتتىق مانسابىندا ولار ۇلكەن قيىندىقتاردى بىرگە ەڭسەرىپ، جەڭىستى كۇندەردە دە بىرگە بولادى.

جارىستى ۇيىمداستىرۋدىڭ ارتىندا جارىستى جوعارى حالىقارالىق دەڭگەيدە وتكىزۋ ءۇشىن كۇنى-ءتۇنى جۇمىس ىستەيتىن ۇلكەن كوماندا تۇر.

سالتانات قاجىكەن،

الماتى