كوكتەمگى ستۋدەنتتىك ليگا: ءۇش سپورت – رۋحى ءبىر كوماندا

الماتىدا قالا اكىمى ەربولات دوساەۆتىڭ باستاماسىمەن كوكتەمگى ستۋدەنتتىك ىرىكتەۋ ليگاسى باستالدى. بۇل ليگا ستۋدەنتتىك سپورتتى دامىتۋ مەن جاستاردىڭ سالاۋاتتى ءومىر سالتىن ارتتىرۋعا باعىتتالعان. جارىسقا 35 جوعارى وقۋ ورنى قاتىسادى. بيىل العاش رەت جارىس ءۇش سپورت تۇرىنەن – فۋتبول، ۆولەيبول جانە باسكەتبولدان وتكىزىلەدى.

ءتۋرنيردىڭ باستى ەرەكشەلىگى – كوماندالاردىڭ جارىسقا تەگىن قاتىسۋى، ياعني ۇيىمداستىرۋ جارناسى تالاپ ەتىلمەيدى.

ۇيىمداستىرۋشىلار ءتۋرنيردىڭ جاقسى وتۋىنە ەرەكشە ءمان بەرىپ وتىر. جەرگىلىكتى فەدەراتسيالارمەن بىرلەسىپ، بەكىتىلگەن ستاندارتتار مەن ەرەجەلەرگە ساي بىلىكتى تورەلىك جاسالادى. بۇل ويىنداردى جوعارى دەڭگەيدە وتكىزۋگە جانە ءادىل باسەكەلەستىك ورناتۋعا مۇمكىندىك بەرەدى. سونداي-اق، ءتارتىپ پەن ادىلدىكتى ساقتاۋ ماقساتىندا ليگا اياسىندا داۋلى جاعدايلار مەن تالاپتى بۇزۋشىلاردى انىقتاپ، «ادال ويىن» قاعيداسىن قامتاماسىز ەتەتىن ليگانىڭ تارتىپتىك كوميتەتى قۇرىلدى.

وسى ماۋسىمداعى باستى جاڭالىقتىڭ ءبىرى — رەسمي سايتتار اشىلدى. ولار https://asvl.kz، https://asfl.kz، https://sblalmaty.mtgame.ru. دەپ اتالادى.

بۇل پلاتفورمالار كوماندالاردى تىركەۋگە، ويىن كەستەسىن، قۇرامداردى جانە تۋرنيرلىك كەستەلەردى اۆتوماتتى تۇردە قۇرۋعا مۇمكىندىك بەرەدى. سونداي-اق، الاڭداعى بارلىق وقيعالار — گولدار مەن ۇپايلاردان باستاپ، ءار ويىنشىنىڭ جەكە ستاتيستيكاسىنا دەيىن — تولىقتاي ونلاين رەجيمدە كورسەتىلەدى.

بارلىق ماتچتار ليگانىڭ رەسمي YouTube ارناسىندا تىكەلەي ەفيردە كورسەتىلەدى. بۇل ءتۋرنيردى ۇلكەن اۋديتوريا ءۇشىن قولجەتىمدى ەتىپ، ستۋدەنتتىك سپورتقا دەگەن قىزىعۋشىلىقتى ارتتىرا تۇسەدى.

الماتى ستۋدەنتتەر ليگاسى — بۇل جاي عانا جارىس ەمەس. بۇل — ستۋدەنتتەردىڭ سپورتتىق الەۋەتىن دامىتۋعا، جاستار اراسىندا بۇقارالىق سپورتتى ناسيحاتتاۋعا جانە ۋنيۆەرسيتەتتىك قاۋىمداستىقتى نىعايتۋعا ارنالعان ۇلكەن الاڭ.

ماتچتاردىڭ 26–27 ءساۋىر كۇندەرىنە ارنالعان كەستەسى مەن وتەتىن ورىندارى تۋرالى اقپارات:

ماتچتار كەستەسى (26–27 ءساۋىر)
وتەتىن ورنى مەن ۋاقىتى

 فۋتبول

 27 ءساۋىر
باستالۋى: 09:00 – 16:00
مەكەنجايى: “تسسكا” ستاديونى (ساتپاەۆ كوشەسى، 6ب)

 ۆولەيبول

 26–27 ءساۋىر
باستالۋى: 09:00 – 20:00
مەكەنجايى: بالۋان شولاق اتىنداعى سپورت سارايى (اباي داڭعىلى، 44)

 باسكەتبول

 26 ءساۋىر
باستالۋى: 14:00 – 20:00

 27 ءساۋىر
باستالۋى: 09:00 – 19:30
مەكەنجايى: CK Champion (قوجابەكوۆ كوشەسى، 6)

 

سالتانات قاجىكەن،

الماتى