SportPress.kz قازاقستان سپورت جاڭالىقتارى
ەلىمىز بويىنشا العاشقى قازاق مەكتەبى بولىپ ZAMAN مەكتەبى حالىقارالىق باكالاۆريات (IB) باعدارلاماسىنىڭ تولىق cەرتيفيكاتىن الدى. مەكتەپ باستاۋىش ءبىلىم بەرۋ دەڭگەيىندەگى Primary Years Programme (PYP)، ورتا بۋىن Middle Years Programme (MP) جانە جوعارى سىنىپتارعا ارنالعان Diploma Programme (DP) اككرەديتتەۋىنەن ءساتتى ءوتتى. سايكەسىنشە، قازاق بالالارى الەمنىڭ ۇزدىك ءبىلىم تاجىريبەسىن مەكتەپ تابالدىرىعىنان اتتاعاننان-اق قازاق تىلىندە وقۋعا جول اشىلدى.
بۇل جەتىستىك – قازاقستانداعى قازاق تىلىندە ءبىلىم بەرەتىن مەكتەپتەردىڭ حالىقارالىق ستاندارتتارعا سايكەستىگىن راستايتىن ماڭىزدى قادام. 1968 جىلى جەنەۆادا نەگىزى قالانعان بۇل باعدارلاما قازىرگى تاڭدا 150-دەن استام ەلدەگى 5 مىڭنان اسا مەكتەپتە ەنگىزىلگەن.
IB – بۇل جاي عانا اكادەميالىق باعدارلاما ەمەس. ول وقۋشىلاردى ءبىلىم الۋعا، الەمدەگى جانە ەلىمىزدەگى اۋقىمدى ماسەلەلەردى انىقتاپ، ولاردى شەشۋگە ۇيرەتەدى. IB باعدارلاماسى ارقىلى 3 جاستان 19 جاسقا دەيىنگى وقۋشىلار بىلىمدەرىن حالىقارالىق دەڭگەيدە كورسەتە الادى. مەكتەپتە وقۋشىلار تەك ساپالى ءبىلىم الىپ قانا قويماي، سونىمەن قاتار ءوز بەتىنشە تالداۋ جاسايتىن، كرەاتيۆتى ويلايتىن جانە كوپۇلتتى ءارى كوپمادەنيەتتى ورتادا ءتيىمدى قارىم-قاتىناس جاساي الاتىن كوشباسشى، جوبالىق مەنەدجەر رەتىندە قالىپتاسادى.
IB باعدارلاماسىنىڭ ماقساتى – زياتكەرلىك ءارى جاھاندىق كوشباسشىلاردى دايارلاۋ، ولاردى قازىرگى زاماننىڭ قارقىندى وزگەرىستەرىنە بەيىمدەلۋگە ۇيرەتۋ. ەلىمىزدەگى بىرنەشە مەكتەپ بۇل باعدارلاما بويىنشا سەرتيفيكاتتالعان، دەگەنمەن العاشقى بولىپ قازاق تىلىندە باستاۋىش مەكتەپتەن جوعارعى سىنىپتارعا دەيىن تولىق اككرەديتتەۋدەن العاشقى بولىپ ZAMAN مەكتەبى ءوتتى.
IB باعدارلاماسى ءبىلىمنىڭ دامۋىنا، مۇعالىمدەردىڭ كاسىبي دەڭگەيىن ارتتىرۋعا ۇلكەن سەرپىن بەرەدى. وقۋشىلار ءۇشىن بۇل باعدارلاما – تەڭدەسى جوق مۇمكىندىك، سەبەبى IB ديپلومى الەمنىڭ ۇزدىك ۋنيۆەرسيتەتتەرىندە ءبىلىم الۋعا جول اشادى. ZAMAN مەكتەبىندە IB باعدارلاماسى قازاقستاندىق جانە حالىقارالىق ءبىلىم بەرۋ ادىستەمەلەرىن بىرىكتىرىپ، جان-جاقتى وقىتۋدى قامتاماسىز ەتەدى. ساباقتار قازاق جانە اعىلشىن تىلدەرىندە جۇرگىزىلەدى، بۇل وقۋشىلارعا جاھاندىق ءبىلىم كەڭىستىگىندە باسەكەگە قابىلەتتى بولۋعا كومەكتەسەدى. مەكتەپتە IB باعدارلاماسى بويىنشا وقىتۋ تاجىريبەسى بار جوعارى بىلىكتى مۇعالىمدەر جۇمىس ىستەيدى، – دەپ اتاپ ءوتتى مەكتەپتىڭ نەگىزىن قالاۋشى گاۋحار نۋروۆا.
2025 جىلدىڭ قاڭتار ايىندا مەكتەپ Middle Years Programme (MYP) باعدارلاماسى بويىنشا اۆتوريزاتسيا الدى، ال ماۋسىم اۋىندا جوعارى دەڭگەيدەگى Diploma Programme (DP) باعدارلاماسىنىڭ اۆتوريزاتسياسىن الىپ وتىر. IB باعدارلاماسىنىڭ بارلىق دەڭگەيلەرىن الۋ – مەكتەپتىڭ الەم بويىنشا ساناۋلى ءبىلىم ورداسى كىرەتىن IB Continuum قاتارىنا كىرەتىنىن راستايدى. بۇل مەكتەپتىڭ دامۋى عانا ەمەس، قازاق تىلىندە وتاندىق ءبىلىم بەرۋ ساپاسىن ارتتىرۋ جولىنداعى اسا ماڭىزدى قادامداردىڭ ءبىرى.
قازاقستاندا IB باعدارلاماسىمەن وقىتاتىن مەكتەپتەردىڭ سانى ءالى دە از، ال ZAMAN مەكتەبى – حالىقارالىق ستاندارتتاردى ەنگىزىپ، وقۋشىلارىنا جاڭا مۇمكىندىكتەر اشقان العاشقى ءبىلىم وردالارىنىڭ ءبىرى. مەكتەپتىڭ حالىقارالىق جەتىستىكتەرى – قازاق تىلىندە ءبىلىم بەرەتىن مەكتەپتەردىڭ زاماناۋي ءبىلىم بەرۋ جۇيەسىنە بەيىمدەلۋىنىڭ جانە جاھاندىق ءبىلىم بەرۋ قاۋىمداستىعىنا ينتەگراتسيالانۋىنىڭ ايقىن دالەلى.
نۇرلان قۇمار،
الماتى
