Александр Бублик Галле турнирінің екі дүркін жеңімпазы атанды

Еліміздің бірінші, әлемнің 45-ракеткасы Александр Бублик Германияның Галле қаласында өткен ATP 500 турнирінің жеңімпазы атанды, деп хабарлады Қазақстан теннис федерациясы.

Ол финалда әлемнің 11-ракеткасы, ресейлік Даниил Медведевпен бірінші орын үшін ойнады.

Осыған дейін қарсыластар бір-бірімен алты рет ойнап, соның бәрінде Медведев жеңген еді.

Бубликтің өзі де ресейлік теннисшілерден тек Медведевті жеңе алмай жүргенін мойындаған болатын.

Бұл жолы бірінші партияда есеп 4:3 болған кезде Бублик брейк жасай білді. Есеп — 6:3. Екінші сетте тай-брейкте Бублик сәтті ойнады. Есеп 7:6 (7:4) болды, — делінген хабарламада.

Осылайша, Бублик ATP турнирлерінде бесінші титулын жеңіп алды. Соның ішінде ол 2023 жылы Галле додасында үздік шыққан еді.

Александр Бублик алдағы дүйсенбіде жаңартылатын рейтингіде 30-орынға көтеріледі.