اتاقتى قورعاپ قالا المادىق

اسسالاۋماعالەيكۋم، قازاق ەلى!

كوپتەن كۇتكەن گەننادي گولوۆكين مەن ساۋل الۆارەستىڭ قارىمتا كەزدەسۋى ءوتتى. ەلدەن اتتانعاندا سىزدەردەن ءسۇيىنشى سۇرايمىن دەگەن ەدىم. وكىنىشكە قاراي، جەڭىلىستىڭ كەرمەك ءدامىن تاتىپ، جۇرەگىم ەزىلىپ تۇر. ارينە، بۇل – سپورت. تاعدىرىڭ جۇدىرىقپەن شەشىلەتىن ۇلكەن دودا. كاسىپقوي بوكستىڭ قىزىعى دا، قيىندىعى دا وسى. ايتسە دە ەلىمىزدىڭ تالانتتى ۇلىنىڭ ءبىرى گەنناديدى جازعىرۋدىڭ ەش قاجەتى جوق. ناعىز باتىرعا لايىق ونەر كورسەتتى. قارسىلاسى دا وڭاي ەمەس. شيىرشىق اتقان مەكسيكانىڭ  مايتالمانى. ايتسە دە قوس بوكسشى كۇللى الەمگە تاماشا بوكس كەشىن سىيلادى. الدىندا ءوزىم ايتقانداي، «قانعا – قان، جانعا – جان» دەگەندەي، ايانىپ قالمادى. سونىمەن گەننادي گولوۆكين مەن ساۋل الۆارەستىڭ بوكسى جايلى كوزىممەن كورگەنىمدى، كوڭىلگە تۇيگەنىمدى ايتايىن.

جارىس باستالاتىن كۇنى لاس-ۆەگاستا كۇن ىستىق بولدى. اسپان اينالىپ جەرگە تۇسەردەي كۇيدىرىپ، ىستىق جالىنعا قارىپ الدى. دودا بولاتىن «ت-Mobail» ارەناعا جيىلعان جانكۇيەردە ەسەپ جوق. وتىز مىڭ ادام سىياتىن كەشەننىڭ بارلىق ەسىگى ەنتەلەگەن جۇرتتى قابىلداپ جاتىر. ءبىز دە ارناۋلى ەسىكتەن ىشكە كىرىپ، ورنىمىزعا جايعاستىق. كوپتەن كۇتكەن باسەكەنىڭ باستالۋىنا ساناۋلى مينۋت قالدى. ورتاعا تىگىلگەن شارشى الاڭنىڭ كەرمەسى بوكسشىلاردى ساعىنىپ قالعانداي. ازداپ دىرىلدەپ، ءوزىنىڭ سايىپقىراندارىن كۇتۋدە. اشەيىندە توي دەسە ىشكەن اسىن جەرگە قويىپ، داراقىلانىپ كەتەتىن مەكسيكالىقتار بۇل جولى تىپتەن ەسىرىپ كەتكەندەي. كەرنەيلەتىپ، شۋلاپ، سارايدى باسىنا كوتەرىپ ءجۇر. بۇل كاسىپقوي بوكستىڭ، جالپى سپورتتىڭ جانكۇيەرگە ءتان جازىلماعان زاڭدىلىعى. ءيا، كوپ كۇتتىرمەي ساعات ءتىلى تۇسكى ەكىنى سوققاندا دۋمان باستالدى.

باسەكەنىڭ الدىندا ءۇش ەلدىڭ مەملەكەتتىك گيمنى ورىندالدى. ءبىزدىڭ ءانۇراندى كارينا ابدۋللينا ورىندادى. وسى تۇستا مەنىڭ ايتپاعىم، وسىنداي كۇللى الەم تاماشالايتىن دوداعا داۋىسىنىڭ جىگەرى بار، ادامنىڭ جان دۇنيەسىن، تۇلا بويىن شىمىرلاتىپ گيمندى شىرقايتىن ءانشىنى جىبەرمەگەنىنە تاڭعالامىن. ارينە، كارينانى سوگىپ وتىرعانىم جوق. اندەرىن تىڭداعانىم بولماسا، جەتە تانىمايدى دا ەكەنمىن. تەك مەنىڭ ايتپاعىم، بوكس كەشىندەگى كارينانىڭ گيمندى ورىنداۋى كوڭىلىمە قونبادى. ەلدى تانىتۋدىڭ ءبىر جولى، ارقالانىپ ەلىمنىڭ گيمنى شىرقالىپ جاتىر دەگەن ماقتانىش سەزىمنىڭ شالقىماي قالۋى جانىما قاتتى باتتى. بۇل مەنىڭ بولاشاقتا وسىنى ەسكەرسە ەكەن دەگەن تىلەگىم. ال، مەكسيكا مەن اقش-تىڭ ءانۇرانىن شىرقاعان انشىلەر جينالعان جۇرتتىڭ ايىزىن قاندىردى. اسقاقتاتىپ، شىڭىراۋ شەگىنە جەتكىزدى. بىزدە دە جوق ەمەس قوي، رۋحىڭدى وياتىپ، ەڭسەڭدى بيىكتەتەتىن انشىلەر.

سونىمەن، ءبىرىنشى بولىپ شارشى الاڭعا جاس بوكسشىلار شىقتى. ولاردىڭ جارتىسى كاسىپقوي بوكستىڭ اۋىلىنا جاڭا اياق باسقاندار. ءدۇبىرلى دودانىڭ ءدامىن جاڭا تاتىپ جۇرگەن جاستار جانكۇيەرلەرگە تاماشا ونەرىمەن ايشىقتالدى. ۇلكەن شايقاستىڭ الدىندا دەنە قىزدىرعانداي جانكۇيەرلەردىڭ دە كوزىن قىزىقتىرىپ، شامالارى جەتكەنشە جۇدىرىقتاستى. العاشقى ۇشەۋىنىڭ شايقاسى دا قىزىققا تولى بولدى. بىرەۋىنىكى التى راۋندقا، ەكىنشىسى، سەگىز، ون راۋندقا سوزىلدى. قالعاندارىنىڭ جۇدىرىقتاسۋى ۋاقىتىنان بۇرىن اياقتالىپ جاتتى. اسىرەسە، گەنادان وڭباي تاياق جەگەن لەمەنىڭ شايقاسى كوپكە سوزىلمادى. مۇرتى ەدىرەيىپ، جانكۇيەرلەرمەن كەزدەسۋ كەزىندە قوقانلوققى كورسەتكەن گەري و’سالليۆانىڭ ءبىرىنشى راۋندقا عانا شاماسى جەتتى. اۋەلى راۋندتىڭ اياعىنا جەتپەي لەمەنىڭ جۇدىرىعىنان ەسى تانىپ قۇلاپ قالدى. وسىنداي قىزىقتاردان كەيىن ورتاعا گەننادي گولوۆكين مەن ساۋل الۆارەس شاقىرىلدى. كوپتەن كۇتكەن شايقاس باستالدى.

ءبىرىنشى راۋندا ەكى بوكسشى دا ءبىر-ءبىرىن جاڭا كورگەندەي اڭدىسىپ شايقاستى. ءبىر بايقاعانىمىز، ساۋل العاشقى كەزدەسۋىندەگىدەي ەمەس، قاشىپ ءجۇرىپ ۇرىس سالمادى. كەرىسىنشە، ءبىرىنشى نومىرمەن شايقاسقا شىعىپ، الدىعا ەنتەلەپ كەلەدى. بۋىرقانعان بۇلا كۇش گەناعا تاپ بەردى. قازاقستاندىق بوكسشى دا ايانىپ قالمادى. كۇتىپ الىپ، اشىق تۇستان سوققىنىڭ استىنا الدى. ەكەۋى دە الما-كەزەك ۇرىسقا كىرىسىپ، ءبىر-ءبىرىن توپەلەدى. مەنىڭ ويىمشا بۇل راۋند تەڭ ءتۇستى دەپ ەسەپتەر ەدىم.

ەكىنشى راۋند تا قىزىقتى بولدى. ەكى مىقتى دا شەگىنگەن جوق. شارشى الاڭنىڭ تەڭ ورتاسىندا ءجۇرىپ شايقاسقا ءتۇستى. راۋند باستالىسىمەن ساۋل ءتورت-بەس رەت گولوۆكيندى سوعىپ جىبەردى. ۇرعاندا دا توسكە بالعا سوققانداي قاتتى ءتيدى. ونىڭ ءۇش جاۋابىن گولوۆكين راۋندتىڭ سوڭىنا دەيىن قايتاردى. دەگەنمەن بۇل راۋندتا تارازى باسىن ون گرامم بولسا دا الۆارەس باسىپ تۇر دەپ ويلايمىن. ءۇشىنشى راۋند ايتارلىقتاي سۇراپىل بولمادى. گولوۆكين دجەپ سوققىلارىمەن سوققانى بولماسا، اۋىر سوققى جاسامادى. وڭ قولىنىڭ سوققىلارى ءدال تيمەدى. كەرىسىنشە، ءساۋلدىڭ ءبىر سوققىسى ءوتىپ كەتتى. مۇندا دا مەكسيكالىق سارى بالانىڭ باسىمدىعى ۇستەم بوپ تۇر. ءتورتىنشى راۋندتى ءبىزدىڭ پايدامىزعا شەشۋگە بولادى. گەنانىڭ اپەركودى تاماشا ءوتتى. يەكتىڭ استىنان كوتەرە سوققان سوققىسى ءساۋلدى ساباسىنا تۇسىرگەندەي. تىزەرلەپ قۇلاماسا دا، مىقتىلىعىنان ءبىر تانىپ قالدى. وعان ساۋل ايتارلىقتاي جاۋاپ قايتپادى. ءتورتىنشى راۋند گەناعا ويىسۋى كەرەك. بەسىنشى راۋند تىپتەن شيەلەنىسكەندەي بولدى. ىشكى بۋىرقانعان كۇش سىرتقا شىعىپ، سويقان ايقاس بولدى. الۆارەستىڭ ءبىر اۋىر سوققىسى ءوتىپ كەتتى. وعان گەنا دا جاۋاپ قايتاردى. ۇساق سوققىلاردى ساناماعاندا اۋىر سوققىلاردى ەكەۋى دە جاسادى. ەگەر ماعان سالسا، بۇل راۋندتى ەكى بوكسشىعا دا تەڭدەي ەتىپ ءبولىپ بەرەر ەدىم.

التىنشى راۋندتىڭ قورىتىندىسى. الۆارەس بۇعان دەيىن بەرگەن سۇحباتتارىندا: «مەن گولوۆكيندى ابدەن زەرتتەپ شىقتىم. الدا كورەرسىزدەر، مەن وعان ۇلكەن سىي دايىنداپ وتىرمىن. بارلىق بوكستارىن قاراپ شىقتىم، وتكەن جولعى ءوزىمنىڭ كەزدەسۋىمنەن دە قورىتىندى شىعاردىم. ونى قالاي جەڭۋدىڭ جولىن بىلەمىن»، – دەگەن بولاتىن. ايتقانىنداي التىنشى راۋندتا ساۋل ءبىر قادام دا شەگىنگەن جوق. سوققىلارىن قارشا بوراتىپ، وزىنە سەنىمدى بولدى. گەننادي دە قاراپ قالمادى. ءوزىنىڭ اۋىر سوققىلارىمەن قارىمتا قايتارىپ وتىردى. وسى شايقاستى كورىپ وتىرىپ، شەشىم ءبىر مىسقال بولسا دا الۆارەس جاققا كەتىپ قالادى-اۋ دەپ قورقىپ وتىرمىن. جەتىنشى راۋندتى ءبولىپ-جارىپ ايتۋ قيىن. ەكى بوكسشى دا ءبىر-بىرىنە اۋىر سوققىلار جاسادى. ونى ساناۋ مۇمكىن ەمەس. تۋرا داۋىل تۇرعانداي بولدى. جانكۇيەرلەردىڭ دە قۇمارتقانى وسى بولار، ورىندارىنان تىك تۇرىپ تاماشالادى. مەنىڭشە، ەكەۋى تەڭ ءتۇستى. ال سەگىزىنشى راۋند ءسوزسىز الۆارەستىڭ قانجىعاسىندا كەتتى دەپ ويلايمىن. شايقاس كەزىندە ءتورت-بەس سوققىسى وڭباي ءتيدى. شىندىققا تۋرا قاراۋ كەرەك، گەنا سوققى جاساعانىمەن دالدىك جەتىسپەدى. ونىڭ ۇستىنە راۋند ۇزاعان سايىن گەنانىڭ كۇشى سارقىلىپ بارا جاتقانداي كورىندى. ال، انا شيكىل سارى ودان سايىن كۇش الىپ، قارقىن قوسىپ كەلە جاتقانداي. توعىزىنشى راۋندتىڭ العاشقى ەكى مينۋتىن گەنا الىپ قويدى. جاقسى-جاقسى سوققىلارىن وتكىزىپ ۇلگەردى. بىراق، سوڭعى مينۋتتا ساۋل قارىمتا قايتارىپ كەتكەندەي. ايتسە دە، مەنىڭ ىشكى دۇنيەم، بۇل كەزدەسۋدىڭ پايداسىن  گولوۆكينگە بەرۋگە بولادى. مەن وعان كەلىسەمىن.

ونىنشى راۋند قۇدىرەتتى شايقاس بولدى. ءبىزدىڭ بوكسشى تاماشا سوققىسىمەن ءساۋلدى ءبىر سىلكىپ الدى. ءتىپتى قۇلاۋعا شاق قالعان. ايتسە دە انا پالە تىزەسىن بۇكپەدى. كۇشتى قايدان الاتىنى بەلگىسىز، قايتا ەسىن جيىپ، اتويلاپ شىقتى. بۇل رەتتە مەن تارازى باسىن گەناعا قاراي باسسام، ەشكىم رەنجي قويماس.

ون ءبىرىنشى راۋند تا  كەسكىلەسكەن شايقاس بولدى. كۇش الىپ قۋاتتانعان الۆارەسكە توسقاۋىل بولدى. اۋىر-اۋىر سوققىلارىن وتكىزىپ، ءساۋلدىڭ ميىن شايقاعانداي كورىندى. ايتەۋىر باسى ورنىندا، تەك قۇلامادى. ول دا قاپى قالماي، قارىمتا قايتارىپ جاتتى. بۇل جەردە ءسوزسىز گولوۆكين جەڭدى.

ون ەكىنشى راۋند تا جاعاعا سوققان تولقىنداي بولدى. گەنانىڭ سوققىلارى ءساۋلدىڭ تۇمسىعىنا ءدوپ ءتيىپ جاتتى. باعاناعى اتويلاپ جۇرگەن سارى بالا شارشادى ما، جوق، جۇدىرىققا تويدى ما، ايتەۋىر تەگەۋرىندى قارسىلاس بولمادى بۇل جولى. مەنىڭ ىشكى ويىم، گەننادي سوڭعى ەكى راۋندتا ءسوزسىز جەڭدى. وعان داۋلاسۋعا دا بولماس. ەگەر مەن تورەشى بولسام وسىلاي ىستەر ەدىم. كىم بىلەدى، ءالىپتىڭ ارتىن باعايىق.

ءيا، تورەشىلەردىڭ شەشىمىمەن ساۋل الۆارەس جەڭىسكە جەتتى دەپ ايقايلاعاندا كوڭىلىمىزدىڭ ءتۇسىپ كەتكەنى راس. قالاي بولعاندا دا ءساۋلدى مويىنداۋىمىز كەرەك. ءدال وسى ساتتە مەن  جۋرناليست رەتىندە دە، مامان رەتىندە دە الۆارەسكە قول سوعىپ، باسىمدى يەمىن. تالانتتى بوكسشى، مىقتىنى مىقتى دەپ ايتقان ابزال. بۇل سپورت، بۇل كۇرەس. ول تەك جەڭىستەن عانا تۇرا بەرمەيدى. جەڭىلىستىڭ دە ءدامىن تاتاتىن كەز  كەزدەسەدى. گەنانى جازعىرىپ تۇرعانىم جوق. ول ءسوزسىز مىقتى بوكسشى. كاسىپقوي بوكستاعى ناعىز تالانت. مۇنداي بوكسشى عاسىردا ءبىر تۋادى. وسىنداي اقماڭداي ۇل ءبىزدىڭ ماڭدايىمىزعا بۇيىردى. ول – گەننادي گولوۆكين!

نەسىپ جۇنىسباي ۇلى،

بەلگىلى سپورت ءجۋرناليسى، ارنايى sportpress.kz سايتى ءۇشىن لاس-ۆەگاستان