Áıelder kúresi: Qazaqstan quramasy Túrkııada alty medal ıelendi

Túrkııanyń Kodjaelı qalasynda kúres túrlerinen  halyqaralyq týrnır bolyp jatyr.

Búgin Iashar Dogý, Vehbı Emre men Hamıt Kaplandy eske alýǵa arnalǵan dástúrli týrnırde áıelder beldesýleri aıaqtaldy.

Bul synda Qazaqstan quramasy jalpykomandalyq esepte aldyna Túrkııa men Úndistannyń sportshylaryn jiberip, alty medalmen úshinshi oryndy qanaǵat tutty.

Otandastarymyz 3 kúmis pen 3 qola júldeni aldy. Atap aıtqanda, Svetlana Ankıcheva (-50 kg), Dıana Kaıýmova (-59 kg) men Laýra Almaǵanbetova (-57 kg) kúmis medalge ıe bolsa, Zýlfııa Iahıarova (-55 kg), Irına Kazıýlına (-68 kg) men Elmıra Syzdykova (76 kg) úshinshi orynnan kórindi.

Endi erteń bozkilemge erkin kúres sheberleri shyǵady.

Dastan KENJALIN,

ASTANA