SportPress.kz قازاقستان سپورت جاڭالىقتارى
ماڭعىستاۋ وبلىسى اكىمى نۇرداۋلەت قيلىبايدىڭ توراعالىعىمەن وتكەن جيىندا اقتاۋ قالاسىندا سالىناتىن جاڭا ستاديوننىڭ تۇجىرىمداماسى تالقىلاندى، دەپ حابارلادى ءوڭىر باسشىسىنىڭ ءباسپاسوز قىزمەتى.
جوبانى «قازاق ەنەرگەتيكا جانە بايلانىس عىلىمي-زەرتتەۋ جوبالاۋ ينستيتۋتى» جشس وكىلدەرى تانىستىردى. جوسپار بويىنشا اقتاۋدا 10 000 كورەرمەنگە ارنالعان كوپفۋنكتسيونالدى ستاديون بوي كوتەرەدى. جاڭا سپورت نىسانى زاماناۋي تالاپتارعا ساي سالىنىپ، فۋتبول اكادەمياسىمەن جابدىقتالادى. مۇندا سپورتشىلارعا قاجەتتى بارلىق جاعداي جاسالىپ، وقۋ-جاتتىعۋ الاڭدارى، كيىم اۋىستىراتىن بولمەلەر، مەديتسينالىق پۋنكت پەن جاتتىعۋ زالدارى قاراستىرىلادى، — دەلىنگەن حابارلامادا.
جوبالاۋ جۇمىستارى كەلەسى جىلى تولىق اياقتالىپ، قۇرىلىس كەزەڭىنە ءوتۋ جوسپارلانعان. وبلىس اكىمى نۇرداۋلەت قيلىباي جوبالاۋ-ىزدەستىرۋ جۇمىستارىن باقىلاۋدا ۇستاۋدى جانە بەلگىلەنگەن مەرزىمدە اياقتاۋدى تاپسىردى.
