قۇزعا ورمەلەۋدەن الەم كۋبوگى: ريشات حايبۋللين – كۇمىس جۇلدەگەر!

فرانتسيانىڭ شاموني قالاسىندا ءوتىپ جاتقان قۇزعا ورمەلەۋدەن الەم كۋبوگىنىڭ كەزەڭىندە ۇلتتىق قۇراما كوماندانىڭ سپورتشىسى ريشات حايبۋللين كۇمىس مەدال يەلەندى، دەپ حابارلادى تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى.

ول اۋەلى جىلدامدىق باعدارلاماسىنىڭ ىرىكتەۋىندە 5.03 سەكۋند ناتيجە كورسەتىپ، 8-ورىنمەن پلەي-وفف كەزەڭىنە جولداما الدى. جارتىلاي فينالدا توبەگە 4.83 سەكۋندتا كوتەرىلىپ، جەكە رەكوردىن جاڭارتتى (مۇندا الەم رەكوردى 4.64 سەكۋند). ال فينالدا پاريج وليمپياداسىنىڭ قولا جۇلدەگەرى، الەم كۋبوگىنىڭ بىرنەشە دۇركىن يەگەرى امەريكالىق ساميۋەل ۋوتسونعا ەسە جىبەردى.

ازداپ شارشادىم. بىراق وسى جارىستان جۇلدە جەڭىپ العانىما ەرەكشە قۋانىشتىمىن. ماعان شاموني قالاسى قاتتى ۇنايدى. الەم كۋبوگىن وتكىزۋگە تاپتىرماس جەر ەكەن، — دەدى ريشات حايبۋللين فينالدان كەيىن حالىقارالىق قۇزعا ورمەلەۋ فەدەراتسياسىنىڭ ءباسپاسوز قىزمەتىنە بەرگەن سۇحباتىندا.

تاعى ءبىر سپورتشىمىز ءامىر مايمۇراتوۆ ىرىكتەۋدە ەكىنشى ورىن الدى (4.89 سەكۋند). الايدا وتانداسىمىز شەشۋشى كەزەڭدە قارسىلاسىنا ەسە جىبەردى.

شاموني — مەن ءۇشىن ەرەكشە قالا. مۇندا مەن الەم كۋبوگىنداعى العاشقى فينالىما قاتىسقام. كراكوۆتاعى كەزەڭنەن كەيىن كوپ ۋاقىت وتكەن جوق. مەنىڭشە، سوندىقتان وسى جارىستا ءبارى جوعارى ناتيجە كورسەتتى،- دەدى ءامىر مايمۇراتوۆ فينالدان كەيىن حالىقارالىق قۇزعا ورمەلەۋ فەدەراتسياسىنىڭ ءباسپاسوز قىزمەتىنە بەرگەن سۇحباتىندا.