سپورتتى دامىتۋ مەملەكەتشىل ۇستانىمنان باستالادى

مەملەكەت باسشىسىنىڭ جوعارى جەتىستىكتەر سپورتىن جانە بۇقارالىق سپورتتى دامىتۋعا باعىتتالعان جۇيەلى قولداۋى مەن ستراتەگيالىق شەشىمدەرىنىڭ ناتيجەسىندە قازاقستان حالىقارالىق سپورت ارەناسىنداعى ورنىن نىقتاپ كەلەدى. بۇل تۋرالى تۋريزم جانە سپورت مينيسترلىگى حابارلادى.

بيىلعى العاشقى التى ايدا ەلىمىزگە 13 حالىقارالىق سپورت فەدەراتسياسى مەن ۇلتتىق وليمپيادا كوميتەتتەرىنىڭ باسشىلارى كەلدى. بۇل – قازاقستاننىڭ الەمدىك سپورت قاۋىمداستىعىنداعى بەدەلىنىڭ ارتىپ، اتقارىلىپ جاتقان مەملەكەتتىك ساياساتقا دەگەن سەنىمنىڭ جوعارى ەكەنىن كورسەتەدى.

پرەزيدەنت تاپسىرمالارىن ورىنداۋ ماقساتىندا تۋريزم جانە سپورت مينيسترلىگى حالىقارالىق فەدەراتسيالارمەن ىنتىماقتاستىقتى كەڭەيتۋ، ينفراقۇرىلىمدى دامىتۋ جانە ەلىمىزدە ماڭىزدى سپورتتىق ءىس- شارالاردى وتكىزۋ باعىتىندا كەشەندى جۇمىستار اتقارۋدا، — دەلىنگەن حابارلامادا.

ەلىمىزدىڭ الەمدىك سپورت ارەناسىنداعى باسقارۋشىلىق ءرولىن كۇشەيتۋدەگى العاشقى ماڭىزدى قادام – سالا ءمينيسترى ەربول مىرزابوسىنوۆتىڭ حالىقارالىق دزيۋدو فەدەراتسياسى (IJF) ديرەكتورلار ۇيلەستىرۋ كوميتەتىنىڭ مۇشەسى بولىپ سايلانۋى بولدى. اتالعان كوميتەت 13 ەلدىڭ وكىلدەرىنەن قۇرالعان جانە الەمدىك دزيۋدونىڭ ستراتەگيالىق دامۋىنا جاۋاپتى، 20 كوميسسيانىڭ جۇمىسىن ۇيلەستىرەدى. قازاقستان – بۇل قۇرىلىمدا ورتالىق ازيادان وكىلدىك ەتەتىن جالعىز مەملەكەت.

سونداي-اق ەلىمىزدىڭ حالىقارالىق ۇيىمدارداعى الەۋەتىنىڭ ارتا تۇسكەنىن مەملەكەت باسشىسىنىڭ ءباسپاسوز حاتشىسى رۋسلان جەلدىبايدىڭ IJF-ءتىڭ جاڭا تەحنولوگيالار جانە تيىمدىلىكتى ارتتىرۋ بويىنشا كوميسسياسىنىڭ قۇرامىنا ەنۋى دالەلدەيدى.

ەلىمىزدە ينستيتۋتسيونالدىق جانە سپورتتىق باعىتتار قاتار دامىپ كەلەدى:

2027 جىلى دزيۋدودان الەم چەمپيوناتى قازاقستاندا بولادى. بۇل وتاندىق دزيۋدو تاريحىنداعى ەكىنشى الەم چەمپيوناتى;
2023 جىلدان باستاپ استانادا Grand Slam سەرياسىنداعى Qazaqstan Barysy ءتۋرنيرى ۇيىمداستىرىلىپ كەلەدى (بيىل وتاندىق سپورتشىلار 9 مەدال جەڭىپ الدى. جۇلدە قورى – 154 000 ەۋرو);
2024 جىلدىڭ مامىرىندا ەلوردادا پارادزيۋدودان (IBSA) الەم چەمپيوناتى بولدى. وعان 38 ەلدەن 300-دەن استام سپورتشى قاتىستى;
استانادا حالىقارالىق دەڭگەيدەگى تورەشىلەر مەن جاتتىقتىرۋشىلاردى دايارلايتىن IJF اكادەمياسىن اشۋ جوسپارلانۋدا، — دەلىنگەن حابارلامادا.

سونىمەن قاتار دزيۋدو ەل ىشىندە دە جاپپاي دامىپ كەلەدى – بۇگىندە بۇل سپورت تۇرىمەن 160 000-نان استام ادام اينالىسادى. بۇل قادامدار قازاقستاندى حالىقارالىق سپورت قوزعالىسىندا بەلسەندى ءارى سەنىمدى سەرىكتەس رەتىندە تۇراقتى تۇردە ىلگەرىلەتۋگە باعىتتالعان.