بيىل ەلىمىزدە 32 سپورت ورداسى پايدالانۋعا بەرىلدى

مەملەكەت باسشىسىنىڭ تاپسىرماسىنا سايكەس، ەلىمىزدە سپورت ينفراقۇرىلىمىن دامىتۋ باعىتىندا اۋقىمدى جۇمىستار جۇرگىزىلىپ كەلەدى. جىل باسىنان بەرى ەلىمىزدىڭ 14 وڭىرىندە 32 سپورت نىسانى پايدالانۋعا بەرىلدى. ال جىل سوڭىنا دەيىن تاعى 70 نىساننىڭ قۇرىلىسى اياقتالادى دەپ جوسپارلانعان، دەپ حابارلادى تۋريزم جانە سپورت مينيسترلىگى.

جاڭا نىسانداردا بوكس، باسكەتبول، ۆولەيبول، فۋتبول، كۇرەس، ۇستەل تەننيسى جانە باسقا دا سپورت تۇرلەرىمەن اينالىسۋعا مۇمكىندىك بار. بيىل پايدالانۋعا بەرىلگەن ءىرى نىساننىڭ ءبىرى – اقمولا وبلىسىنداعى سپورت كەشەنى. بۇل – مەملەكەت مەنشىگىنە قايتارىلعان اكتيۆتەر ەسەبىنەن تولىقتاي قارجىلاندىرىلعان ەلىمىزدەگى العاشقى سپورت نىسانى. اتالعان سپورت كەشەنىندە ەركىن كۇرەس، قازاق كۇرەسى، بوكس، اۋىر اتلەتيكا، شاڭعى سپورتى جانە جالپى دەنە دايىندىعىنا ارنالعان زالدار بار.

تاعى ءبىر ماڭىزدى نىسان – پاۆلودار وبلىسىنداعى كوپسالالى سپورت كەشەنى. مۇندا ۆولەيبول، باسكەتبول، بوكس، كۇرەس، ساداق اتۋ، توعىزقۇمالاق، ۇستەل تەننيسى جانە ءجۇزۋ سپورتىمەن شۇعىلدانۋعا بولادى. كەشەندە 4 جولاقتى (25 مەترلىك) ءجۇزۋ باسسەينى جۇمىس ىستەيدى، — دەلىنگەن حابارلامادا.

ۆەدومستۆونىڭ حابارلاۋىنشا، بيىل پايدالانۋعا بەرىلەتىن بىرقاتار ماڭىزدى نىساندار قاتارىندا ۇزدىكسىز ءبىلىم بەرەتىن ۇلتتىق سپورت ۋنيۆەرسيتەتى بار. ۋنيۆەرسيتەت ينفراقۇرىلىمىنا ستاديون، جابىق جەڭىل اتلەتيكا مانەجى، وليمپيادالىق باسسەين، سپورت كەشەنى، عىلىمي-زەرتتەۋ جانە مەديتسينالىق قالپىنا كەلتىرۋ ورتالىقتارى كىرەدى. سونداي-اق تۇركىستاندا بايداركا مەن كانوەدە ەسۋ، پارا كانوە جانە اكادەميالىق ەسكەك ەسۋ جارىستارىن وتكىزۋگە ارنالعان ەسۋ ارناسىنىڭ قۇرىلىسى اياقتالادى. ال استانادا ق. مۇڭايتپاسوۆ اتىنداعى جاڭا ستاديوننىڭ قۇرىلىسى باستالدى. اتالعان نىساندى 2026 جىلى پايدالانۋعا بەرۋ جوسپارلانىپ وتىر.

جەتىسۋ وبلىسىنىڭ الاكول اۋدانىندا 160 ورىندىق دەنە شىنىقتىرۋ-ساۋىقتىرۋ كەشەنى مەن 244 ورىندىق جاتاقحانانىڭ قۇرىلىسى ءجۇرىپ جاتىر. بۇل كەشەن ءوڭىر سپورتىنىڭ دامۋىنا سەرپىن بەرەدى. 2024 جىلعى مامىردا ورال قالاسىندا مۇمكىندىگى شەكتەۋلى جاندارعا ارنالعان سپورت كەشەنىنىڭ قۇرىلىسى باستالدى. كەشەندە كوماندالىق سپورت تۇرلەرىنە (ۆولەيبولدى وتىرىپ ويناۋ، گولبول، بادمينتون، بوچچا)، ۇستەل تەننيسى مەن كۇرەس تۇرلەرىنە (گرەك-ريم، ەركىن كۇرەس، دزيۋدو) ارنالعان زالدار سالىنادى.

سونىمەن قاتار مەملەكەت باسشىسى بۇقارالىق سپورتتى دامىتۋ ماسەلەسىنە ەرەكشە نازار اۋدارىپ كەلەدى. 2024 جىلعى دەرەكتەرگە سايكەس، ەل حالقىنىڭ 40%-دان استامى تۇراقتى تۇردە سپورتپەن شۇعىلدانادى. 1000 ادامعا شاققاندا سپورت ينفراقۇرىلىمىمەن قامتۋ دەڭگەيى 55%-دان استى. ەل تۇرعىندارىنىڭ سالاۋاتتى ءومىر سالتىن ۇستانۋعا، سپورتپەن اينالىسۋعا دەگەن قىزىعۋشىلىعىنىڭ، زاماناۋي سپورت نىساندارىنا دەگەن سۇرانىستىڭ ارتۋىنا بايلانىستى بۇل كورسەتكىشتى 2029 جىلعا دەيىن 65%-عا جەتكىزۋ جوسپارلانىپ وتىر، — دەپ حابارلادى مينيسترلىك.

تۋريزم جانە سپورت مينيسترلىگى بۇل باعىتتاعى جۇيەلى جۇمىستى جالعاستىرا بەرەدى.